Ol sońǵy jyldary elimizde ınvestısııalyq qyzmetti júzege asyrý úshin qolaıly jaǵdaı jasaý boıynsha keshendi jumys júrgizilgenin atap ótti.
EYDU-men birge Qazaqstannyń ınvestısııalyq saıasatyna eki sholý júrgizildi, olardyń qorytyndysy boıynsha Úkimet eldiń nvestısııalyq ahýalyn jaqsartý boıynsha tolyq jospardy qabyldady. «Sońǵy 5 jylda biz zańnamamyzdy EYDU standarttaryna sáıkes ózgerttik: kóshi-qon-vızalyq rejımdi, ruqsat júıesin, salyq salýdy, kedendik baqylaýdy jeńildettik», – dedi J. Qasymbek.Reformalar nátıjesinde bıznes ortanyń básekege qabilettiligi artty. Qazaqstan Dúnıejúzilik Banktiń «Doing Business» reıtıngisindegi pozısııasyn 41-den 35-ke deıin jaqsartty. Aǵymdaǵy jyldyń aqpan aıynda EYDU Keńesi Qazaqstandy EYDU Investısııalar jónindegi komıtetiniń qaýymdastyrylǵan múshesi retinde shaqyrý týraly sheshim qabyldady.
Budan ózge, qabyldanǵan sharalar eldiń kórsetkishterine áser etkeni atap ótildi. 2016 jyldyń qorytyndysy boıynsha Qazaqstanǵa tikeleı sheteldik ınvestısııalar aǵymy 2015 jylmen salystyrǵanda 40%-ǵa ósip, 20,6 mlrd. dollardy qurady.
Mınıstr eń kóp ósim taý-ken óndirý jáne óńdeý ónerkásibinde, elektrmen qamtý jáne aqparattyq tehnologııalar salalarynda baıqalǵanyn aıtyp ótti.
Jalpy, búgin óńdeý ónerkásibindegi ınvestısııalar ósimi úrdisi saqtalýda.
Eldik turǵyda TShI-diń eń kóp kólemi kelesi elderge tıesili: Nıderlandy, AQSh, Shveısarııa, Fransııa, Qytaı, Reseı, Belgııa, Ulybrıtanııa.
J. Qasymbek ınvestısııalar tartý júıesin qaıta qalyptastyrý boıynsha júrgizilip jatqan keshendi jumystar týraly aıtty. Onyń aıasynda 2017 jyldyń maýsym aıynyń sońyna deıin ınvestısııalardy qaıdan, qalaı jáne qaıda tartý kerektigin keshendi túrde kórsetetin, barlyq memlekettik organdar men ulttyq kompanııalardyń úılestirý jumystarynyń naqty tetikterin anyqtaıtyn, ınvestısııalardy tartýdyń ulttyq strategııasy ázirlenetin bolady.
«Kazakh Invest» ınvestısııalar jónindegi mamandandyrylǵan ulttyq kompanııasy Qazaqstan Úkimeti atynan iri ınvestorlarmen jáne maqsatty transulttyq kompanııalarmen biregeı kelissóz júrgizýshi retinde is-qımyl jasaıdy. J. Qasymbek atalǵan kompanııaǵa erekshe mártebe berilgenin aıtty: ondaǵy Dırektorlar keńesine QR Premer-Mınıstri basshylyq etedi. Al bul, mınıstrdiń aıtýynsha, ınvestorlardy tartý men súıemeldeý – asa mańyzdy basymdyq ekenin bildiredi.
Qazirgi tańda óńirlerde ınvestorlarǵa qyzmet kórsetetin 19 sektor jumys istep tur. 2017 jyldyń birinshi jartyjyldyǵynyń sońyna deıin «bir tereze» qyzmeti onlaın-rejımde iske qosylatyn bolady.
Aıta ketý kerek, óńirlerde «Kazakh Invest» ókilderi oblys ákimderi men Almaty qalasynyń shtattan tys keńesshileri mártebesine ıe bolady.
J. Qasymbek ınvestorlarmen jumys júrgizetin barlyq jaýapty qyzmetkerlerdi biriktiretin jáne ınvestorlarǵa memlekettik qyzmet kórsetý barysyn onlaın rejımde qadaǵalap otyrýǵa múmkindik beretin follow up – aqparattyq- baqylaý júıesiniń jaqyn arada iske qosylatynyn eske salyp ótti.
Sonymen qatar, ınvestorlarǵa usynatyn daıyn jobalardyń bolmaý máselesin sheshý úshin, jaqyn arada halyqaralyq standarttarǵa saı taýashaly jobalar «qaptamasy» ázirlenetin bolady.
Mınıstr iri halyqaralyq ınvestısııalyq forýmdardyń áleýetin paıdalanýdyń qajettigin atap ótti. Ol úshin qazaqstandyq taraptyń qatysýy usynylatyn, sheteldik ınvestorlyq sharalardyń biryńǵaı kestesi ázirlenetin bolady.
Qorytyndylaı kele, J. Qasymbek Qazaqstanda sheteldik ınvestorlarmen barlyq deńgeılerde júıelik qarym-qatynastar ornatylǵanyn atap ótti. Mınıstr QR Prezıdenti janyndaǵy shetel ınvestorlarynyń keńesi, QR Úkimeti janyndaǵy ınvestısııalyq ahýaldy jaqsartý keńesi, «Shetel ınvestorlarynyń qazaqstandyq keńesi» Qaýymdastyǵy, «Qazaqstannyń Eýropalyq bıznes-qaýymdastyǵy», Investısııalyq ombýdsmen ınstıtýty sekildi uıymdardyń qyzmetine oń baǵa berdi.
