Atyraýdaǵy hımııa-bıologııa baǵytyndaǵy Nazarbaev Zııatkerlik mektebiniń 8-synyp oqýshysy Bektaıyr Tóleshov osyndaı jańalyq oılap tapty. Halyqaralyq «Jasyl kópir» ekologııalyq forýmynyń qazylar alqasy Bektaıyrdyń jumysyn joǵary baǵalap, birinshi orynmen marapattady. Ǵylymı-zertteý saıysynda jeńimpaz atanǵan oqýshy mekteptegi robototehnıka úıirmesine qatysady. «Informatıka men hımııany kiriktirý arqyly ortaq dúnıe jasap shyǵarýǵa bolady, óıtkeni tabıǵattaǵy jáne fızıkadaǵy keıbir qubylystardy bólek pán retinde qarastyrý qıyn», - deıdi jobanyń ǵylymı jetekshisi Raqymjan Qosanov.
Qazirgi bilim berý saıasatynyń negizgi baǵyty - STEM qaǵıdalary arqyly bir mezgilde birneshe pándi kiriktire oqytý. Sol arqyly ǵylym, tehnologııa, ınjınırıng jáne matematıkany ózara sabaqtastyrý jolymen ǵylymı progresske tez jetýge bolady. Atyraýdaǵy Nazarbaev Zııatkerlik mektebi bul baǵytta bıikterden kórinip júr.
Osy bilim ordasynyń taǵy bir talapty shákirti – Jánibek Mýbınov Reseıdiń Korolev qalasynda ótken olımpıadaǵa fızıka páninen qatysyp, birinshi oryndy jeńip aldy. Jánibek Qazaqstandyq KAZSAT-3 jasandy jerserigin modeldeý boıynsha jobasyn qorǵady. «Zymyrandy ushyrǵan soń ony ǵarysh keńistiginde baqylaý qıyn. Jerdegi mamandar bul baǵytta túrli jetistikterge jáne jańashyl múmkindikterge qol jetkizse de, áli de jerserikterin tııanaqty ári turaqty baqylap otyrýǵa múmkindik beretin amaldar oılap tabylǵan joq» - deıdi Jánibek. Ǵylymı jobasynda jerserikterdiń ǵarysh álemindegi jumysyn jan-jaqty sıpattap bergen. 200-den astam daryndy bala qatysqan halyqaralyq saıysta atyraýlyq oqýshynyń mereıi ústem boldy.
Baqytgúl BABASh,
«Egemen Qazaqstan»
ATYRAÝ
