Elbasymyzdyń «Bolashaqqa baǵdar: Rhanı jańǵyrtý» atty baǵdarlamalyq maqalasy búkil baıtaǵymyzǵa jan-jaqty talqylanyp, nebir oılar qozǵalyp, parasatty pikirler bildirilip jatyr.
Tipti dúnıejúzilik deńgeıde de bul qasıeti qat-qabat qujat ulttyq jańǵyrýdyń úlgisi, Qazaqstanǵa ǵana tán ózindik joldyń ónegesi retinde joǵary baǵalana bastady.
Jaqynda ǵana Ordabasy taýynyń bıiginde birshama ýaqyt oı keship júrýdiń sáti tústi. Oblysqa kelgeli kókeıimizde edi. Ordabasy baǵzydan-aq Birlik bıigi atanǵan. Saq, túrki dáýirleriniń bederleri bádizdelip qalǵan. О́kinishke qaraı, qorǵandar qıratylyp, qorymdar tonalǵan. Basqynshylar búldirgen. Otarshyldar oırandaǵan. Bálkim, birtalaı «Altyn adamdarymyz» qaraýlardyń qanjyǵasynda kete bardy.
Bul taýda Aqtaban shubyryndynyń úshinshi jylynda, 1726 jylǵy sáýirde úsh danagóıimiz Tóle bıdiń, Qazybek bıdiń, Áıteke bıdiń áreketteri arqasynda Birlik jıyny ótip, azattyq jolyndaǵy rýh týy kóterilip, alash bostandyǵy attanys bastalǵan.
Tuńǵysh Prezıdentimiz Nursultan Ábishuly Nazarbaev osy Ordabasyda,, Táýelsizdiktiń úshinshi jylynda, kók jelekti kóktemde óz bastamasymen uıymdastyrylǵan uly jıynda «Bereke basy - birlik» baıandamasyn jasaǵan. Tutasý toıy atalǵan úsh eldiń prezıdentteri, jıyrmashaqty memlekettiń delegasııalary, Qazaqstannyń barlyq oblystary men qalalarynan, aýdandary men aýyldarynan arman-ańsarlaryn aıalaı jetken jurt-jıyntyǵy júz elý myńǵa jýyq adam qatysqan Birlik basqosýy Táýelsizdigimizdiń táı-táı basqan qadamyn nyqtaı túsken edi.
Memleket basshysy Ordabasy bıigindegi baıandamasynda: «Bizdi bul kıeli tórge armandy tilek, elim degen perzenttik júrek alyp kelip otyr. Bizdiń de aılaǵanymyz-birlik. Bizdiń de ańsarymyz-elimizdiń kósegesiniń kógergeni, dáýletti de sáýletti ómir súrgeni. Tóle bı, Qazybek bı, Áıteke bı zamanyndaǵy basty maqsat – bul qazaqtyń birligi bolsa, búgingi maqsat ta dál sol. Jalǵyz-aq aıyrmasy - qasıetti babalarymyz bayn qosyp bergen qazaq halqy endi búkil Qazaqstan halqynyń birligine uıytqy bolýǵa tıis. Bereke basy-birlik. Birligimiz berik bolsa, bolashaǵymyz baıandy bolary sózsiz», degen bolatyn.
«Bereke basy – birlik» baıandamasynda Elbasy «Ordabasyǵa oralý-Otanshyldyq rýhymyzdyń jańǵyrýy», deıdi. Baıqap qarasaq, Kóshbasshymyz rýh jańǵyrýy haqynda osy Ordabasy da sóz qozǵap, oı salytty. Birlik bıigindegi, ózi Táýelsizdik týyn jelbirete kótergen Týtóbe túbindegi tekti sózder men tolǵamdy oılary keıingi kóptegen kitaptarynda, maqalalarynda únemi úılesimdi úndesip, jarasymdy jalǵasyp, keńeıip, tereńdep, bıiktep baıyptalady.
Ordabasydaǵy orasan zor, ulttyq uly jıynnyń jalǵasy retinde Ulytaýda da ulaǵatty basqosý ótkizgen Prezıdent taǵy da ultshilik jáne ultaralyq tatýlyq, ata-babalar amanat etken yntymaq týraly tolǵanyp, rýh pen eldik jáne erlik jóninde tebirendi.
Arada on jyl ótkende elimizde «Mádenı mura» murattary júzege asyryla bastady. Memleket basshysy: «Mádenıet-ult kelbetiniń, onyń janynyń, aqyl-oıy men bekzattyǵynyń kórinisi. О́rkenıetti halyq ózz tarıhynyń damý barysyn, mádenıetiniń ilgerlegenin, eliniń dańqyn shyǵaryp, aqyl-oıdyń, ónerdiń álemdik jetistikteriniń altyn qoryna zor úles qosqan uly adamdaryn maqtanysh etedi. Ult osy, mádenıeti men salt-dástúrleri arqyly tanylady», dedi.
Burynyraqtaǵy «Ádilettiń aq joly», «Ǵasyrlar toǵysynda», «Qazaqstan joly» sııaqty birqatar kitaptarynda negizinen ekonomıkalyq saıasattyń máseleleri mánistele turab báribir ulttyq rýh pen namys ulyqtalady. «О́mir ótkelderi» suhbat kitabynda rýhanı tereń tebirenisterge toly. Birer jyl burynǵy Ulytaýda ótken syr-suhbatynda da, byltyrǵy kúz aılarynda jarııalanǵan «Uly Dala ulaǵattarynda» da qazirgi kúnderi Qazaq eli tutastaı derlik den qoıyp, qyzý talqylap jatqan «Bolashaqqa baǵdar: Rýhanı jańǵyrý» maqalasynyń naǵyz negizderi tunyp tur.
Jalpy aıtaıyn degenimiz – Elbasymyzdyń eńbekterindegi jasampazdyq jalǵastyǵyna, júrek dúrsilindeı júıelikke qaıran qalasyń. «El bolý úshin, eń aldymenen, ulttyq rýh, ulttyq qasıetterdi memlekettik saıasat retinde ustanamyz jáne ony árkez maqtan etemiz», deıdi «Uly Dala ulaǵattary» týyndysynda.
Elim, jerim, Otanym, Qazaqstanym dep jan-júregimen shyn uǵynyp,shynaıy sezinetin, ultyn qasıet tutatyn árbir jan «Bolashaqqa baǵdar: rýhanı jańǵyrý» týyndysymen tynystaýda desek, asyra aıtqandyq emes. Prezıdentimiz jyl basyndaǵy halyqqa Joldaýynda Qazaqstannyń úshinshi jahandyq básekege qabilettilikke, ozyq otyz eldiń qataryna qosylýǵa aparatynyn aıqyndady. Úshinshi jańǵyrý úderisteriniń maqsattary men mindetterin kóregendikpen naqtylaǵan Kóshbasshymyz endi,mine, rýhanı jańǵyrýdyń Joldaýyn jarııalap, sáýlesi bar sanalardy dúr silkindirip, serpilis týdyryp otyr.
«Jańǵyrý ataýly buryńǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zaman syrynan súrinbeı ótken ozyq dástúrlerdi tabysty jańǵyrtýdyń alǵy sharttaryna aınaldyra bilý qajet. Eger jańǵyrý ulttyq-rýhanı tamyrynan nár ala almasa, ol adasýǵa bastaıdy», dep jazylǵan maqalada.
Prezıdent XXI ǵasyrdaǵy ulttyq sana týraly taldamasynyń aldynda jer júzindegi ózgeristerge, túsinikti-túsiniksiz kúrdeli qubylystarǵa shol jasaıdy. Kún sanap ózgerip jatqan dúbirli dúnıede sana-sezimimiz ben dúnıetanymymyzǵa ábden sińip qalǵan taptaýryn qaǵıdalardan arylmasaq, kósh basyndaǵy eldermen terezemizdi teńep, nyq túıistirý múlde múmkin emestigin eksheıdi.
Tekti jurttardyń tarıhı tamyrlarynan bastaý alatyn rýhanı kody týraly aıta kelip, Elbasymyz: «Jańa turpatty, jańǵyrýdyń eń basty sharty-sol ulttyq kodyńdy saqtaı bilý.
Onsyz jańǵyrý degenińizdiń qur jańǵyryqqa aınalýy op-ońaı. Biraq, ulttyq kodymdy saqtaımyn dep boıyndaǵy jaqsy jamannyń bárin, ıaǵnı bolashaqqa senimdi nyǵaıtyp, alǵa bastaıtyn qasıetterdi de, kejegesi kúni tartyp, turatyn, aıaqtan shalatyn ádetterdi de ulttyq sananyń aıasynda súrlep qoıýǵa bolmaıtyny aıdan anyq»,-deıdi.
Táýelsizdik alǵaly beri kóp jaǵdaılarda saıasatkerlerdiń zııalylardyń ardagerlerdiń arasynda ıdeologııa týraly nebir pikirlerdiń aıtylyp ta jazylyp ta júrgeni belgili. «Bizde ıdeologııa jasalmady», «Ideologııamyz nashar» «Ideologııa joq» deýge deıin baratyndar, buryńǵy qasań qaǵıdalardy qaıtalaı «qaıǵyratyndar» az emes. Memleket basshysy mundaı kózqarastardyń da negizsizdigin dáleldep, ótkir jaýap beredi.
«Ult nemese jeke adam naqty bir mejege bet túzep, soǵan maqsatty túrde umtylmasa, erteń iske aspaq túgili, eldi qurdymǵa bastaıtyn popýlıstik ıdeologııalar paıda bolady. О́kinishke qaraı, tarıhta tutas ulttardyń eshqashan oryndalmaıtyn eles ıdeologııalarǵa shyrmalyp, aqyry s túbine ketkeni týraly mysaldar az emes. О́tken ǵasyrdyń basty úsh ıdeologııasy-kommýnızm, fashızm jáne lıberalızm bizdiń kóz aldymyzda kúıredi», deıdi Prezıdentimiz.
Memleket basshysy meńzegendeı, búginde radıkaldy ıdeologııalar ǵasyrynyń kelmeske ketkenin, alaıda olardyń qaýipti qaldyqtary men syrqatty sarqynshaqtary sanalardy sarsyltyp kele jatqanyn umytpaı, ulaǵatty umtylystar men sergek serpilisterge basymdyq berýimiz kerek. Endi Elbasymyz erekshelegendeı, asa aıqyn, túsinikti jáne bolashaqqa jiti kóz tikken baǵdarlar qajet. Eń bastysy, olar eldiń, qoǵamnyń, adamdardyń múmkindikteri men shama-sharqyn muqııat eskerýge tıis. Osylardy oı-sanalarǵa ornyqtyrýýdy berik ustanatyn Ult Kóshbasshysy realızm men pragmatızm ǵana taıaý onjyldyqtardyń urany bolýǵa jaraıtynyna, barlyq is-áreketter men tynys- tirshiliktiń negizgi arqaýy etýdiń mańyzdylyǵyna erekshe ekpin túsiredi.
Pragmatızm haqynda parasatty oılaryn oımyshtaı ortaǵa salǵan Elbasy bylaı dedi: «Pragmatızm-ózińniń ulttyq jáne jeke baılyǵyńdy naqty bilý, ony únemdi paıdalanyp, soǵan sáıkes bolashaǵyńdy josparlaı alý, ysyrapshyldyq pen astamshylyqqa, dańǵoılyq pen kerdeńdikke jol bermeý degen sóz. Qazirgi qoǵamda shynaıy mádenıettiń belgisi – orynsyz sán-saltanat emes. Kerisinshe, ustamdylyq qanaǵatshyldyq pen qarapaıymdylyq, únemshildik pen oryndy paıdalaný kórgendilikti kórsetedi».
Kórgendilik, tektilik, joǵary jaýapkershilik, sondaı-aq obal, saýap, uıat syndy kıeli uǵymdar, qanaǵatshyldyq pen qarapaıymdylyq qasıetter sana sapasyna tikeleı qatysty. Osynaý ulaǵatty uǵymdar men qymbat qasıetterdi bizdiń asyl ata- babalarymyz ǵasyrlar boıy berik ustanyp, urpaqtan-urpaqqa ulastyryp otyrǵan. Bireýler ádeıilep, ázázildenip, arasyna syna qaǵyp, syzat túsirýge tyrysatyn din men dástúrimizdiń tańǵalarlyqtaı úılesetini de bizdiń ulttyq kodymyzdyń o bastaǵy negizderiniń myqtylyǵynda. О́kinishke qaraı, kóp nárselerden aıyryldyq nemeseajyrap qala jazdadyq. Talaı-talaı tektilik turpattarymyzdy buryńlatyp, kúńgirttendirip aldyq.
Ulystyń uıytqysy atanǵan Ońtústik Qazaqstan óńirinde ózindik óreli de óristi ózgeshelikter az emes. Elbasymyz: «Ońtústikte baq-bereke, birlik pen yntymaq bolsa, búkil baıtaǵymyzda baq-bereke, birlik pen yntymaq bolady», degen. Kelegen saıyn jyly jaqtaǵy jaqsylyqtardy jiti baıqap, jyly pikirlerin bildiredi, ásirese jurttyń umtylysyn, erekshe eńbeksúıgishtigin súısine aıtady. Sonymen qatar, keıbir kemshilikterdi de ázilge súıep synap kórsetedi.
Ońtústikte, oblys ortalyǵynda, barlyq aýdandar men aýyldarda toıhanalar, saltanat saraılary, meıramhanalar óte kóp. Bir jaǵynan durys ta shyǵar. Biraq, memleket basshysynyń maqalasynda naq-naq atalǵandaı, ysyrapshyldyq, astamshylyq, orynsyz sán-saltanat, dańǵazalyq, kerdeńdik sııaqty tolyp jatqan eselder dertke aınalǵany da ras. Tipti toǵysharlyqtyń topastanýǵa tutasyp, battasyp bara jatqan jaǵdaılary da joq emes.
Iıa, qatty-qatty oılanatyn, oılanyp qana qoımaı qoǵam bolyp, árbirimiz jáne barshamyz bolyp qolǵa alatyn, daýasyn taýyp, tezirek emdeıtin dertter az emes. Eń aldymen ulttyq sanamyz sapaly jaqtaryn uly mura retinde qasterleýimiz kerek.
Nursultan Ábishuly ultymyzdyń qasıet pen ósıetti qadirleıtinin, halqymyzdyń qaı alsaq ta, olardan tek úlgi men ónege, aqyl men parasat, adamgershilik pen ıman, dostyq pen baýyrmaldyq aıqyn kórinip, anyq tanylatynyn buǵan deıingi birneshe eńbekterinde erekshelep kórsetken. Mine, sol ulttyq uly muralardy ulyqtaı otyryp, búgingi álemniń ozyq jańalyqtaryn jatyrqamaı meńgerip, aýrýlarymyzdy jasyrmaı, keselderden jedel arylýǵa tıispiz. Arylý úshin ulttyq salt-dástúrlerimizdiń, tilimiz ben mýzykamyzdyń, ádebıetimizdiń, ıaǵnı ulttyq rýhymyzdyń jańǵyrýyna sóz júzinde emes, is júzinde jetýimiz qajet. Bizdiń óńirdegi basqosýlarda, talqylaýǵa arnalǵan túrli jıyndarda, kezdesýlerde tek sózdarlyqqa salyna bermeı, naqtyly istermen, bastamalarmen ónege óristetý týraly aıtylýda. Toılardyń ózinde túbegeıli ózgertýge, jańǵyrtýǵa bolady. Ol úshin tyń bastamalar da, sondaı-aq zańdyq negizder de kerek.
Máselen, osy óte kóp sóz etiletin toı-tomalaqtar jóninde ózgelerden úırenýge bolady. Árıne, qazaq toılarynyń tańǵajaıyp jaqtaryy, ulttyq salt-dástúrlerge negizdelgen qaıtalanbas qasıetteri az emes. Alaıda, ysyrapshyldyq, astamshylyq, dańǵazalyq sekilderden arylýda alysqa barmaı-aq namystanbaı-aq, ózbekterden ónege alý kerek. Zańdyq jaǵdamttar boıynsha da adam shaqyrýdy shekteý, ýaqytyly bastap, túngi saǵat on birden keıin toılardy tejeý týraly ózbek, tájik baýyrlardan tikeleı kóshirip almasaq ta, arnaıy zań qabyldaýdy oılastyrǵan abzal-aý.
Maqalanyń birinshi taraýyndaǵy «Bilimniń saltanat qurýy» bóliminde de Elbasymyz ultymyzdyń ulaǵattylyǵyn mánisteıdi. Bilimdi, kózi ashyq, kókiregi oıaý bolýǵa umtylý bizdiń qanymyzda bar qasıet ekenin erekshe kórsetedi. Táýelsizdik jyldarynda «Bolashaqtan» bastap, básekege qabilettilik maqsatynda mereıli ister atqarylǵanyn ańǵartady. Bilimniń saltanaty jalpyǵa ortaq bolýǵa tıis ekenin alǵa tartyp, qundylyqtar júıesinde bilimdi bárinen bıik qoıatyn ult qana tabysqa jetetinine basa nazar aýdarady. Maqalada aıtylǵandaı, álemdegi eń jaqsy 100 oqýlyqty ártúrli tilderden qazaq tiline aýdaryp, jastarǵa dúnıe júzindegi tańdaýly úlgiilerdiń negizinde bilim alýǵa múmkindik jasaý – úlken úrdis.
Bilim berý salasyynda Ońtústik Qazaqstan oblysynda qol jetken tabystar barshylyq. О́kinishke qaraı, qordalanyp qalǵan kemshilikter kóbirek. Prezıdentimizdiń tapsyrmasyna, rýhanı jańǵyrý týraly týyndysynda mejelengen mindetterge sáıkes sony serpilister jasaýymyz kerek.
Elbasy óz eńbeginiń besinshi bóliminde XX ǵasyrdaǵy alapat alasapyrandaǵy oırandar men tóńkerilisterge, syrttan tańylǵan soraqylyqtarǵa toqtalady. «О́tken XX ǵasyr halqymyz úshin qasiretke toly, zobalań da zulmat ǵasyr boldy», deıdi Prezıdentimiz. Sóıtip, ulttyq damýymyzdyń ózimizge tán joly, birjola kúıretilgenin, qoǵamdyq qurylymnyń bizge jat úlgisi eriksiz tańylǵanyn, ultymyzǵa adam aıtqysyz demografııalyq soqqy jasalyp, onyń jarasy bir ǵasyrdan beri áli jazylmaı kele jatqanyn, qazaqtyń tili men mádenıeti qurdymǵa kete jazdaǵanyn, elimizdiń kóptegen óńirleri ekologııalyq apat aımaqtaryna aınalǵanyn jany aýyra jazǵan.
Árıne, ótken ǵasyrdyń birqatar ıgilikteri bolǵanyn da baǵalap, baǵamdaı kele ındýstrııalandyrýdy, áleýmettik jáne óndiristik ınfraqurylymdardyń qurylýyn, jańa ıntellıgensııanyń qalyptasýyn jańǵyrýlar qataryna jatqyzady. «Biraq, bul - ulttyq emes, aýmaqtyń jańǵyrýy edi», deıdi Elbasshymyz. Bizge revolıýsııalyq emes, evolıýsııalyq damý joldary tán ekenin taldap, revolıýsııalardyń áli de óńin ózgertip, ulttyq, dinı, mádenı, separatıstik perde jamylǵanynan saqtandyrady.
Sananyń ashyqtyǵy haqynda ashyq aıtady. Halyqaralyq tájirıbeler taǵylymyna toqtalady. «О́zindiki ǵana tańsyq, ózgeniki-qańsyq» dep keri tastaı, ózgelerdiń tabystarynan úırený, ozyq jetistikterdi qabyldaı bilý órleýdiń kilti ekenin qolǵa ustatqandaı kórsetken.
Ekinshi taraýdaǵy alty mindettiń asa aıqyn qoıylýy aıryqsha. Ne isteý kerektigin naqtylaýy bólekshe. Kútiletin nátıjelerdi de taldap bergen. Osy maqalaǵa oraı, Memleket basshysy elimizdiń kórnekti jazýshylary Beksultan Nurjekeevti, Dýlat Isabekovti, Smaǵul Elýbaevty qabyldap, emin-erkin suhbat qurdy. Birtalaı máseleler ashyq qozǵaldy. Latyn álipbıine kóshý jóninde zııalylar zııatty pikirler, utyrly usynystar bildirdi. Shynynda da qazaq tiliniń qoldanylýynda, grammatıkalyq, emlelik erejelerinde, dybystyq jazylý jáne aıtylý zańdylyqtarynda kóptegen kemshilikter bar. Olar kezinde kırıllısaga kóshýge baılanysty josyqsyz,jónsiz jiberilip, ǵasyrlar boıy qalyptasqan qazaqy tildik tektilik dástúrlerin buzýmen keledi. Etimiz ólip, betimiz shydap, tilimiz ábden úırenip ketkendikten, syrttaı qaraǵanda bári durys sekildi seziledi. Biraq, talaı jaǵdaıattardy jóndep, ulttyq tildiń zańdylyqtaryn qazaqy qalpyna keltirip, kırıllısalyq álipbı salǵan álekterden batyl arylyp, artyq-aýys qaripterdi azaıtyp, jazylý men aıtylýdaǵy aǵattyqtardy latyn álipbıine kóshý arqyly tezete bilsek, kánekı. Bul maqsatqa jetý úshin til men ádebıet salalarynyń ǵalymdary, ustazdar qaýymy, árıne, aqyn-jazýshylar, jýrnalıster shynaıy belsendilik, bilimdilik pen biliktilik kórsetip, aıanbaı ter tógýge tıis.
Onomastıka jóninde de Ońtústikte ózindik ózekti máseleler joq deı almaımyz. Bul máselede asyǵýǵa da, keshigýge de bolmaıdy. Nebir úlken, keń, uzyn kósheler álde-kimderge berilip ketken, al albyrt shaǵy da, kemeldengen kezeńi de, ómiriniń sońy da osynda ótken handardyń hany Abylaı atamyzǵa jarytymdy kóshe buıyrmaǵan.
«Týǵan jer» baǵdarlamasy boıynsha biz tıisti jobalar jasaýǵa kiristik. О́tken jyly oblysymyzǵa memleket jáne qoǵam qaıratkerleri, iri-iri bıznesmender, burynǵy jáne qazirgi basshylar, ǵalymdar, aqyn-jazýshylar óner qaıratkerleri, taǵy basqalar bar – barlyǵy eki júzdeı túlekterimizdi jınap, «Týǵan jerdi túletý-perzenttik paryz» atty aıtýly jıyn ótkizgenbiz. Sol basqosýdyń tájirıbesin Elbasy maqalasyna sáıkes damytyp, jetildirip, jańǵyrtamyz. Qazaqstanymyzdyń qasıetti, kıeli jerleri týraly aıtqanda, Otyrar, Túrkistan, Saıram, Ordabasy, Qazyǵurt, Qarataý, Sozaq, taǵy basqalary qaı-qandaı patrıottyq da kóz aldynan tizilip óte bastaıtyny túsinikti.
Elbasynyń bizdiń oblystaǵy Túrkistandy ulttyq nemese qurlyqtyq qana emes, jahandyq aýqymdaǵy qundylyqtar qatarynda arnaıy atap jazdy. Bıyl «Túrkistan-Túrki áleminiń mádenı astanasy» is-sharalary jan-jaqty qanat jaıǵan. TÚRKSOI uıymy túrki áleminiń mádenı astanalaryn tańdaý jobasyn 2012 jyldan beri júzege asyrýda. Bul qurmetke alǵash Astana qalasy odan keıin Túrkııanyń Eskishahar, tatarstannyń Qazan, Túrkimenstannyń Mary, Ázirbaıjannyń Shekı qalalary ıe bolǵany belgili. «Túrkistan-Túrki áleminiń mádenı astanasy» jobasyn neǵurlym mándi de mazmundy, taǵylymy mol sapada atqarý maqsatynda TÚRKSOI halyqaralyq uıymy, QR Mádenıet jáne sport mınıstrligi jáne bizdiń oblystyń basshylyǵy, tıisti mekemeleri men uıymdary, búkil jurtshylyǵy júıeli jumystar atqaryp jatyr. Merekeniń ashylý saltanaty Túrki dúnıesiniń tekti tóri Túrkistanda Áz Naýryz merekesimen birge ótti. Oǵan 15 memlekettedi 25-ke jýyq túrkitildes ulttardan 300-ge jýyq meıman, baıtaǵymyzdyń barlyq óńirlerinen ókilder qatysty. Elbasymyzdyń bastamalary osylaısha óziniń óristi jemisin berýde.
Túrkııany túletken, batyl reformalardy júzelegen Atatúrik «Bizge eshteńeniń de keregi joq, bizge tek umtylys kerek», degen eken. Jurtynyń selqostanǵan, sanalardyń súlesoqtanǵan jaǵdaıattaryn baıqap, aryl kerektigin ańdap. Elbasymyz Nursultan Nazarbaev «Bizge bárinen de birlik pen yntymaq kerek», deıdi. Sebebi qazaq úshin, qazaqstandyqtar úshin Máńgilik Eldiń máńgilik strategııasy – birlik pen yntymaq. Ata-babalar amanaty da osy. Tatýlyq tuǵyry turaqtylyqty saqtap, jańa jaǵdaıda jańǵyrmasaq, ózgermesek, sanadaǵy sarqynshaq qoqystardan qutylmasaq, Elbasy maqalasynda aıtylǵandaı, tarıhtyń shańyna kóshilip qalýymyz múmkin.
Iıa, búkil elimiz erekshe jaǵdaıda. Jańǵyrýǵa degen umtylys ta, qulshynys ta oıanýda. Sana sapasy serpiliste. Sol serpilistiń kúsheıe túspegi, jeńisteri men jemisteri júıeli bolmaǵy, uzaǵynan súıindirmegi lıazim. Barshamyz sóz ben istiń birligine, naqtyly nátıjelerge umtylaıyq.
Janseıit Túımebaev,
Ońtústik Qazaqstan oblysynyń ákimi
