Talqylaýǵa úkimettik emes uıymdardyń ókilderi, belgili jýrnalıster, sondaı-aq «Atameken» Ulttyq kásipkerler palatasynyń ókilderi qatysty. Jıyn basynda sóz alǵan mınıstr D.Abaev Memleket basshysy vedmostvonyń aldyna elimizdiń aqparat keńistigin nyǵaıtý, otandyq aqparat quraldarynyń deńgeıin kóterý, kommenıkasııalyq ınfraqurylymdy damytý boıynsha birqatar mindetter júktegenin aıtty. «Biz osy mindetterdi basshylyqqa ala otyryp, zań jobasyn ázirleýge oǵan aqparat salasy mamandarynyń, úkimettik emes uıymdardyń, jalpy qoǵam ókilderiniń jan-jaqty atsalysýyna múmkindik bergenbiz. Joba ázirlengennen bergi ýaqytta kóptegen talqylaýlar men qyzý pikirtalastar ótkizildi. Búgingi tańda kópshiliktiń usynys-pikirleri eskerile kele, jobanyń negizgi baǵyttary boıynsha ustanymdarymyz bir arnadan tabylýda deýge bolady», dedi mınıstr.
Jańa qujat talqylaýǵa shyǵarylǵannan keıingi aralyqta oǵan qatysty 200-den astam usynys túsip, sonyń 70 paıyzy qujatqa engizilgen. Jalpy alǵanda, qujatqa 250-ge jýyq túzetýler qarastyrylǵan. Osy túzetýler negizinde 4 kodeks pen 12 zańǵa ózgerister men tolyqtyrýlar engizilmek.
Zań jobasy qoǵam talqysyna usynylǵan toǵyz aıǵa jýyq ýaqyt ishinde tıisti jumys tobynyń úsh otyrysy ótip, elimizdiń barlyq óńirinen kelgen ókilderdiń qatysýymen qoǵamdyq talqylaýlar uıymdastyrylǵan bolatyn. Mınıstrlik janyndaǵy Qoǵamdyq keńeste de talqylanǵan.
«Zań jobasymen jumys barysynda qarapaıym azamattar tarapynan da kóptegen ótinishter tústi. Ásirese, balalardy qorǵaýǵa baǵyttalǵan beıneleri men jeke derekterin jarııalaýdy shekteýge, «balanyń jasyna saı aqparat» uǵymyn engizý syndy sharalar qabyldandy», dedi mınıstr.
D.Abaevtyń aıtýynsha, búgingi tańda «kıberbýllıng», ıaǵnı áleýmettik jeliler, baılanys quraldary arqyly qýdalaý, ar-namysyna nuqsan keltiretin áreket jasaý máselesi óte ózekti bolyp otyr. Mınıstrlik zań jobasynda osy tektes máselelerdi nazarǵa alýǵa nıetti.
Zań jobasy barlyq ortalyq memlekettik organdarmen, Prezıdentke esepti qyzyǵýshylyq tanytqan organdarmen, sondaı-aq 14 oblystyń, Astana men Almaty qalalarynyń ákimdikterimen, bas-aıaǵy 35 organmen kelisilgen. Qazirgi tańda qujat jobasy Úkimette qaralýda.
Jıyn barysynda Aqparat jáne kommýnıkasııalar mınıstrligi BAQ salasyndaǵy memlekettik saıasat departamentiniń dırektory Eldos Náshiráli BAQ-tardyń ekonomıkalyq júktemesin jeńildetý, ıaǵnı usaq zań buzýshylyqtar boıynsha tırajdy tárkileý nemese BAQ-tyń jumysyn ýaqytsha toqtatý syndy normalardy alyp tastaý usynylyp otyrǵanyn aıtty. Budan basqa, memlekettik organdar, uıymdar jáne BAQ-tar arasynda ózara is-qımyl jónindegi arnaıy ókilder, qurylymdyq bólimsheler týraly da ózgeris engizilip otyr.
Jalpy, zań jobasy BAQ, teleradıo taratylymy, aqparattandyrý jáne baılanys salalaryndaǵy qatynastardy quqyqtyq turǵyda reglamentteýge baǵyttalǵan.
Arnur ASQAR,
«Egemen Qazaqstan»
Sýretterdi túsirgen Erlan OMAROV,
«Egemen Qazaqstan»
