«Biz, ınvestısııalyq saıasatty ózgertýdiń qajettiligin jaqsy túsinemiz. Sol sebepti saladaǵy jumystyń aımaqtarda turalap qalǵanyn qalamaımyz. Sondyqtan, oblys ákimderiniń ınvestısııalar jónindegi orynbasarlarymen qosymsha keńester ótkizdik. Keıbir basshylardyń osy salada jumys isteýge áli de daıyn emes ekenin baıqadyq. Tildi tıisti deńgeıde bilmeıtinderi de kóp nárseni ańǵartady. Iá, olardyń basqa jumystary da jetip-artylatynyn bilemiz. Osyǵan baılanysty biz Prezıdent Ákimshiligine tıisti xat ázirleýdemiz. Investısııa tartý jumysyn retke keltirý kerek», dedi B.Saǵyntaev. Onyń aıtýynsha, shet el ınvestısııalaryn tartýdyń burynǵy júıesi tolyǵymen ózgertildi. Osy salada arnaıy «Kazakh Invest» ulttyq kompanııasy quryldy. Al kompanııanyń dırektorlar keńesi Úkimet basshysy deńgeıine deıin kóterildi. Sonyń ózi ınvestısııalyq saıasattyń basymdyǵyn, Qazaqstan úshin qanshalyqty mańyzdy ekenin kórsetse kerek.
Premer-Mınıstr jaqynda AQSh-ta ótken «Shevronnyń» basshysy Ýotson myrzamen kezdesýine toqtaldy. «Ol sońǵy jıyrma bes jyl ishinde Qazaqstan qalaı ósse, «Shevron» da solaı damyǵanyn aıtty. Aldaǵy ýaqytta kompanııa óz óndiristerin keńeıtý aıasynda 39 mlrd dollar kóleminde ınvestısııa salýdy josparlap otyr. Bul – álem boıynsha munaı-gaz salasyndaǵy eń iri ınvestısııa», dedi Úkimet basshysy.
Basqosýda baıandama jasaǵan Investısııalar jáne damý mınıstri Jeńis Qasymbek sońǵy bes jylda túbegeıli ózgergen elimizdegi ınvestısııalar salasyndaǵy zańnama halyqaralyq talaptarǵa saı keletindigin tilge tıek etti. Investorlar úshin vızalyq jeńildik qana emes, salyq, keden men ruqsat berý boıynsha yńǵaıly jaǵdaılar jasalǵan. «Osynyń arqasynda Qazaqstan Dúnıejúzilik banktiń «Doing Vusiness» reıtınginde 41-orynnan 35-orynǵa kóterildi. Al ótken jyldyń qorytyndysynda elimizge tartylǵan sheteldik ınvestısııalardyń jalpy kólemi 20,6 mlrd dollarǵa deıin ósken. Bul 2015 jylmen salystyrǵanda 40 paıyzǵa artyq. Ol aqshanyń basym bóligi taý-ken, óńdeý kásibi, elektr energııasymen qamtamasyz etý men aqparattyq tehnologııalarǵa salynady», deıdi J.Qasymbek. Mınıstrdiń málimetinshe, Qazaqstan ekonomıkasyna ınvestısııa salý jaǵynan Nıderland kósh bastap tur. Odan keıin AQSh, Shveısarııa, Fransııa, Qytaı men Ulybrıtanııa keledi.
Mınıstr shet el ınvestısııalaryn tartyp qana qoımaı, ony ustap qalý qajettigine de toqtady. Reınvestısııalar úshin barlyq jaǵdaılardy jasaý mańyzdy. Sol úshin bıyl maýsym aıynyń aıaǵyna deıin Dúnıejúzilik bankpen birlesip, ınvestısııalardy tartýdyń ulttyq strategııa ázirlenbek. Strategııa ınvestısııany qaıdan, qalaı jáne qaı salaǵa tartý qajet ekenin aıqyndaıdy. Onyń aıtýynsha, – «Kazakh Invest» ulttyq kompanııasynyń búginde shet elde jáne jergilikti jerlerde arnaıy bólimsheleri jumys isteıdi. Kompanııa Úkimettiń atynan barlyq kelissózderdi júrgizetin bolady. Al kompanııanyń óńirlerdegi ókilderi oblys ákimderiniń keńesshisi qyzmetin qosa atqarady.
Jıyn barysynda Dúnıejúzilik banktiń ınvestısııalyq ahýal máseleleri boıynsha keńse basshysy Ivan Nımak tabys izdegen ınvestorlardyń Qazaqstanǵa nazar aýdarǵany jón ekenin aıtty. «Kazakh Invest» ulttyq kompanııasy» AQ basqarma tóraǵasy Maqsat Qabashev kompanııa ınvestorlarynyń memlekettik organdarmen ózara qatynasy, mindeti men maqsaty týraly áńgimeledi.
Ashat RAIQUL,
«Egemen Qazaqstan»
