Jıynǵa Semeı, Pavlodar, О́skemen, Kýrchatov qalalaryndaǵy áskerı bólimderdiń jaýyngerleri qatysty. Olar radıasııalyq, hımııalyq, bıologııalyq qorǵanys máseleleri boıynsha synǵa tústi.
– Árıne, dalada jattyǵý jumystaryn ótkizý ońaı bolmady, – deıdi Ulttyq ulannyń «Shyǵys» óńirlik qolbasshylyǵy baspasóz qyzmetiniń jetekshisi Baǵdat Amangeldi. – Aýa raıy tosyn minez tanytsa da jaýyngerler talap údesinen shyǵa bildi. Oqý baǵdarlamasy tolyq oryndaldy dep aıta alamyz. Dalada áskerı qyzmetkerler áskerı tehnıka men qarý-jaraqtardy, jeke quramdy túrli radıasııalyq, hımııalyq, bıologııalyq qaldyqtardan tazartty. Jáne osyndaı qaýipti zattardyń qaı jerde bar ekendigin de anyqtaı aldy.
Polıgondaǵy jattyǵý jumystary aıaqtalǵan soń, qorytyndy esepteri tapsyryldy. Sondaı-aq, Qorǵanys mınıstrligi «Shyǵys» óńirlik qolbasshylyǵyndaǵy radıasııalyq, hımııalyq, bıologııalyq (RHB) qorǵanysy qyzmetiniń basshysy, polkovnık Qaırat Turǵynbekov pen Ulttyq ulannyń «Shyǵys» aımaqtyq qolbasshylyǵyndaǵy RHB qorǵanysy qyzmetiniń jetekshisi, podpolkovnık Abaı Qasenov oqý-jattyǵý jumystarynyń nátıjesi boıynsha estafeta ótkizdi.
– Men birinshi ret RHB qorǵanysy degenniń ne ekendigin tájirıbe barysynda kórdim, sebebi osyndaı dalalyq polıgon jumystaryna tuńǵysh ret qatysýym, – deıdi Ulttyq ulannyń «Shyǵys» aımaqtyq qolbasshylyǵynyń 6679 áskerı bólimindegi RHB qorǵanysy qyzmetinde dozımetrshi-maman, qatardaǵy jaýynger Mıras Qalıev. – Aldaǵy ýaqytta osy Ulttyq ulan men óńirlik qolbasshylyq birigip, túrli apatty jaǵdaı oryn alǵan jerler bolsa, sondaı qaýipti aımaqtardaǵy radıasııalyq, hımııalyq, bıologııalyq zııandy zattardy qaýipsizdendirip, tazartýǵa múmkindikteri bar dep oılaımyn.
– Bizdiń osyndaı jumystarymyz mamandarymyzdyń kásibıligin arttyrýǵa kómektesedi dep oılaımyz, – deıdi Ulttyq ulannyń «Shyǵys» aımaqtyq qolbasshylyǵyndaǵy RHB qorǵanysy qyzmetiniń jetekshisi, podpolkovnık Abaı Qasenov. Polıgondaǵy jattyǵýlardyń nátıjesinde Ulttyq ulannyń «Shyǵys» óńirlik qolbasshylyǵy birinshi oryndy jeńip aldy.
Raýshan NUǴMANBEKOVA
SEMEI
