Ol alǵash ret 1992 jyly Naýyrzym aýdanynda bastalǵan bolatyn. Aıtys dese, delebesi qozatyn kórermender aqyndardy balasynǵan joq, aýdandyq mádenıet úıiniń aýzy-murnynan shyǵyp otyrǵan edi. Bir qyzyǵy, alǵashqy aıtysta qazylar alqasyna tóraǵalyq etken belgili satırık jazýshy Ǵumar Ahmetchın 25 jyl boıy osy mindetti súıispenshilikpen atqaryp keledi. Ol Meńdiǵarada ótken 25-shi aıtystyń da qazylar alqasyn basqardy.
− Alǵashqy aıtysta bas júldeni alǵan Saltanat О́telbaeva 7-synypta oqıtyn, ol qazir oblystyq, respýblıkalyq aıtystarǵa qatysyp júrgen tanymal aqyn, mádenıet salasyndaǵy bildeı maman. Úshinshi oryndy 5-synypta oqıtyn Qydyrbek Qıysqan degen shynashaqtaı qara balaǵa berip, qolyna velosıped ustatyp edim. Endi sol Qydyrbek ózimmen birge qazylar alqasynda otyr, tamasha termeshi, ánshi, respýblıkaǵa belgili jýrnalıst. Onan da qyzyǵyn aıtaıyn, «Jas tulpar» aıtysynyń birinde úshinshi oryndy tili mirdiń oǵyndaı qalaqtaı ǵana qara balaǵa bergen edik, endi sol Erlan Qalmaqov ótken jyldan bastap, oblystyq mádenıet basqarmasynyń tizginin qolyna aldy. О́zi jaqsy jazba aqyn. 25-shi aıtysqa Erlannyń ózi kelip, mektep oqýshylarynyń aıtysyn damytýǵa úles qosqanymdy aıtyp, oblystyq bilim basqarmasynyń basshysy Bátıma Daýymova men mádenıet basqarmasynyń basshysy retinde ózi qol qoıǵan Alǵys hatty tapsyrdy. Aıtysta qanatyn ushtaǵan balalardyń osylaı óskenine eńbegim dalaǵa ketpegen eken dep, tóbem kókke jetkendeı boldy, − dep aǵynan jaryldy Ǵumar Ǵarıfuly.
− Aıtysqa jatpaı-turmaı daıyndalatynbyz, ózimizdi kádimgi aqyn sezinetin edik. Men sol aıtysta Sánııa degen qyzǵa: «Erjetip, attyń jalyn tartqan kezde, Aýylyńa ádeıi izdep baryp qaıtam» degenim esimde. Zal qol shapalaqtap, dýyldap ketti, – dep esine alady Qydyrbek Qıysqan.
Meńdiǵarada ótken 25-shi aıtysqa oblystyń ár shalǵaıynan 16 oqýshy qatysty. Táýelsizdik alardan buryn qazaqtyń sany 2 paıyz ǵana dep esepteletin Rýdnyı qalasynda qazir birneshe qazaq mektebi bar. Aıtysqa jyl saıyn aqynyn shyǵaratyn da Rýdnyı qalasy. Baıaǵyda qazaq tiliniń ıisi shyqpaı, tym-tyrys jatatyn Denısov, Qarasý, Sarykól aýdandary da bıyl bir-bir aqynyn úkilep jiberipti. Kúni boıy kórermenin balapan jyrmen jelpintken aıtysta qazylar alqasy bas júldege meńdiǵaralyq oqýshy Dinmuhamed Qusaıynovty laıyq kórdi. Odan keıingi júldelerdi qanjylaǵan oqýshylar men talaı shákirtti ónerge baýlyǵan belgili aıtysker aqyn Búrkit Beketov úzdik tálimger retinde marapattaldy.
Tili orysshaǵa bura tarta beretin Qostanaıdyń qazaqylanýyna kıeli ónerdiń de úlesi joq dep kim aıtar endi?
Názıra JÁRIMBETOVA,
«Egemen Qazaqstan»
Qostanaı oblysy,
Meńdiǵara aýdany
