Aýyr atletıka
Túrikmenstan astanasy Ashhabadta aýyr atletıkadan Azııa chempıonaty ótip jatyr. Búginge deıin tórt ziltemirshimiz óner kórsetti. Úsh kúnniń qorytyndysy boıynsha, Qazaqstan Ulttyq quramasynyń qorjynynda bir altyn medal bar. Jalǵyz júldeniń ıegeri – 69 kılo salmaqta synǵa túsken Albert Lınder.
Endi jarys tuǵyryna taǵy úsh qazaqstandyq sportshy shyǵady. Azııa chempıonaty 30 sáýir kúni aıaqtalady.
Hokkeı
Hokkeıden Qazaqstan Ulttyq quramasy Kıevte ótip jatqan álem chempıonatynyń birinshi dıvızıon komandalary arasyndaǵy dodasyna qatysýda. Hokkeıshilerimiz osyǵan deıin muz aıdynda tórt kezdesý ótkizip, úsheýinde jeńiske jetip, bir ret utylyp qaldy. Tórt oıyn qorytyndysy boıynsha, jerlesterimiz segiz upaımen óz tobynda ekinshi orynda keledi. Toptaǵy sońǵy oıyndy Qazaqstan quramasy búgin Vengrııa hokkeıshilerimen ótkizedi.
Aıta keteıik, álem chempıonatynyń elıtalyq dıvızıonyna óz tobynda birinshi jáne ekinshi oryn alǵan komandalar ǵana shyǵady.
Fýtbol
Qazaqstan Fýtbol federasııasy Shymkenttiń «Ordabasy» klýbyna óz alańynda oıyn ótkizýge shekteý qoıdy. QFF ókilderiniń aıtýynsha, Qajymuqan Muńaıtpasov atyndaǵy ortalyq stadıonnyń jaryǵy FIFA talaptaryna saı kelmeıdi.
Eske salsaq, Qazaqstan Fýtbol federasııasy osyǵan deıin «Atyraý» jáne «Aqtóbe» klýbtaryna da óz alańynda oıyn ótkizýge shekteý qoıǵan bolatyn.
Boks
Gennadıı Golovkınniń maýsym aıynda jekpe-jek ótkizbeıtini belgili boldy. Bul týraly boksshynyń promoýteri Tom Leffler málimdedi. Onyń aıtýynsha, Djeıkobsqa qarsy jekpe-jekten keıin Golovkın úshin brıtandyq boksshy Sonderspen kezdesý ótkizýge ýaqyt tym azdyq etedi. Sondyqtan, ol jekpe-jekten Golovkınniń komandasy bas tartqan.
Leffler 6 mamyrda ótetin Alvares («Kanelo») – Chaves kezdesýiniń jeńimpazy Golovkınniń kelesi qarsylasy bolýy yqtımal ekenin aıtady.
Ázirlegen
Álı BITО́RE,
«Egemen Qazaqstan»
