Semınarǵa jergilikti joǵary oqý oryndarynyń rektorlary, ǵalym oqytýshylary, partııalar, úkimettik emes uıymdar ókilderi, memlekettik organdar qyzmetkerleri, qoǵamdyq pikir kóshbasshylary qatysty. Aldymen Qostanaı oblysy ákiminiń orynbasary Marat Júndibaev qatysýshylardy mańyzdy sharanyń ótýimen quttyqtap, olardyń jumysyna tabys tiledi.
Semınar-trenıngtiń alǵashqy bóliminde Almaty qalasynan kelgen QMEBI ýnıversıteti Buqaralyq kommýnıkasııa departamentiniń dosenti, fılosofııa ǵylymdarynyń kandıdaty Gúlnar Asanbaeva, L.N.Gýmılev atyndaǵy EUÝ janyndaǵy Qazirgi zamanǵy zertteýler ınstıtýtynyń dırektory, fılosofııa ǵylymdarynyń kandıdaty, saıasattaný Phd doktory Muhıt-Ardager Sydyqnazarov, L.N. Gýmılev atyndaǵy EUÝ «Eýrazııa» gýmanıtarlyq zertteýler ǵylymı ortalyǵynyń dırektory, Ulttyq tarıhshylar kongresiniń ǵalym-hatshysy, professor, tarıh ǵylymdarynyń doktory Zııabek Qabyldınov, Qazaqstan Respýblıkasynyń Din isteri jáne azamattyq qoǵam mınıstrligi Úkimettik emes uıymdarmen ózara is-qımyl salasyndaǵy memlekettik organdardyń qyzmetin úılestirý basqarmasynyń basshysy Gúlbara Sultanova Elbasy maqalasyna oraı tereń mazmundy baıandamalar jasady.
«Tórtinshi ındýstrııalyq revolıýsııa bizge kóptegen qolaısyz jaǵdaıdar ákeledi. Shamaly jylda búgingi kóptegen mamandyqtar kereksiz bolyp qalady. Olardyń jumysyn robottar atqarady. HIH-HH ǵasyrda jýrnalıstıkanyń standarttary qalyptasty. Tehnologııanyń asa jyldam damýyna baılanysty sol standarttar qazir kómeskire bastaǵan», – degen Gúlnar Dosqalıqyzy Qazaqstandaǵy BAQ mysalynda jýrnalıstıkanyń problemalaryn ortaǵa saldy. Sonymen qatar basqa spıkerler de Elbasy maqalasynda aıtylǵan máselelerge tereń taldaý jasady. Jas urpaqty otanshyl, patrıot etip tárbıeleý, ultymyztyń jahandaný men tórtinshi ındýstrııalyq revolıýsııa ákeletin qıyndyqtarǵa tótep bere alýy, ózge mádenıetterdiń jeteginde ketpeýi úshin qoǵamdyq-saıası is-sharalardy ıdeologııalyq qoldaý, sol úshin atqarar jumystardyń baǵyt-baǵdaryn jasady.
Semınar-trenıngtiń ekinshi bóliminde qatysýshylar seksııalarǵa bólinip jumys istedi.
Názıra Járimbetova
«Egemen Qazaqstan»
QOSTANAI
