Qyzylordada jergilikti «Qaısardy» 3:0 esebimen utqan temirjolshylar sońǵy tórt oıynnyń ózinde qarsylastar qaqpasyna jaýapsyz 13 gol soqty. Qazir «Astana», joǵaltqan upaı sany boıynsha esepter bolsaq, ózin ókshelep kele jatqan «Qaırattan» jeti upaı alda tur.
Almatylyqtar bul týrda «Aqjaıyqty» qabyldap, 4:1 esebimen kúırete jeńdi. «Qaırattyń» qyr sońynan qalmaı kele jatqan qos klýb – «Tobyl» men «Ertis» ózara oınap, kim myqtyny anyqtaı almady. Bul jaǵdaı «Qaırattyń» bıylǵy maýsymda tuńǵysh ret ekinshi orynǵa kóterilýine múmkindik berdi.
Birin-biri ala almaǵan Qostanaı men Pavlodar klýbtaryna «Ordabasy» jaqyndaı tústi. Ońtústik- qazaqstandyqtar Temirtaý qalasynda 2:1 esebimen «Shahterden» basym túsken bolatyn.
Týrnır kestesiniń tómengi jaǵynda aıtarlyqtaı ózgerister oryn aldy. Atap aıtqanda, FIFA «Atyraýǵa» qarsy jazalaý sharasyn jeńildetip, «tárkige» ushyraǵan toǵyz upaıdyń altaýyn qaıtardy. Mundaı sheshim qanattandyrǵan munaıshylar Tarazǵa baryp, jergilikti klýbtan 2:1 esebimen basym tústi. Sóıtip, «Atyraý» áli kúnge deıin jeńistiń dámin tatpaǵan «Shahterdi» artqa tastap, týrnır kestesinde bir satyǵa joǵarylady.
Toǵyzynshy týr mynadaı nátıjelermen aıaqtaldy:
«Oqjetpes» – «Aqtóbe» – 2:1 (1:1), Shaff, 1 (1:0). Chertov, 11 – óz qaqpasyna (1:1). Dosmaǵambetov, 90+2 (2:1). «Taraz» – «Atyraý» – 1:2 (0:0), Lı, 62 (0:1). Zaınýtdınov, 73 (1:1). Maksımovıch, 89 (1:2). «Qaırat» – «Aqjaıyq» – 4:1 (2:0), Islamhan, 1 (1:0). Goý, 32 (2:0). Valıýllın, 48 – óz qaqpasyna (3:0). Súıimbaev, 58 (4:0). Valıýllın, 82 (4:1). «Tobyl» – «Ertis» – 0:0 (0:0). «Shahter» – «Ordabasy» – 1:2 (0:2), Kovalchýk, 2 (0:1). Kovalchýk, 37 (0:2). Shahmetov, 57 (1:2). «Qaısar» – «Astana» – 0:3 (0:2), Tvýması, 28 (0:1). Maevskıı, 34 (0:2). Murtazaev, 76 – penaltıden (0:3).
Surmergender kóshin burynǵysha Jerar Goý («Qaırat») bastap keledi. Onyń enshisinde 9 gol bar. Bes gol soqqan Jýnıor Kabananga («Astana») ekinshi orynda. Al úshinshi oryndy tórt goldan soqqan Alekseı Shetkın («Tobyl») men Aslan Darabaev («Ertis») bólisip tur.
Búgin, mamyrdyń 2-si kúni ótetin 10-týrda myna komandalar ózara kúsh synasady:
«Oqjetpes» – «Shahter», «Aqjaıyq» – «Tobyl», «Atyraý» – «Qaısar», «Ertis» – «Ordabasy», «Astana» – «Qaırat», «Aqtóbe» – «Taraz».
Qaırat ÁBILDINOV,
«Egemen Qazaqstan»
