Bul kádimgi ózimiz ishindegi sýyn iship, laqtyryp tastaı beretin plastık qutylardyń qaqpaǵy. Kúndelikti ómirde qoldanatyn zattardyń barlyǵy da qajetti, qaldyqtardy tastaýǵa bolmaıdy. Olardyń báriniń de óz baǵasy bar deıdi eriktiler. Aksııa barysynda oqýshylardyń jınaǵan plastık qaqpaqtarynyń salmaǵy 6 kúnde 38 kıloǵa jetip, sany 15 myń 780 bolypty.
Qaıyrymdylyq sharasynyń maqsaty – aýyr naýqasqa shaldyqqan balanyń jeke esep shotyna aqsha aýdarý. Urany – «Qaqpaq jınaı bersek – aýrý balalar sany azaıady!». Birinshi bolyp Pavlodardaǵy №17, №24 mektepterdiń shákirtteri men ata-analar qaýymy qoldap, belsendilik tanytty. Jınalǵan qaqpaqtar qaıta óńdeýge jiberiledi. Odan túsken aqsha bir kúndik bolsa da naýqas balanyń emine jumsaldy.
– Bul shara bizdiń oqýshylarymyzdy meıirimdilikke tárbıeleıdi. Ekinshiden, eriktiler aıtqandaı, qaldyqtardyń da, qaqpaqtardyń da kúndelikti turmysta qajettigin bilip ósedi. Qaldyqtan dúnıe jasap shyǵaratyn shetelderdegi tıimdi tájirıbe, osylaı bizdiń ómirimizge de enýde, – deıdi qalalyq oqý bóliminiń qyzmetkeri Baljan Ádilhanova.
Aıtsa aıtqandaı-aq, meıirimdiliktiń úlken-kishisi joq. Jan jylýy degen osy. Oqýshylar mektepte monıtorıng ótkizip, kún saıyn aqparattyq qabyrǵaǵa qansha qaqpaq jınalǵany jóninde habarlap otyrady. Osy shara barysynda qaqpaq jınaýshy belsendi synyptar atalyp ótedi. Al eń belsendi oqýshylar eriktiler tarapynan marapattalady.
Farıda BYQAI,
«Egemen Qazaqstan»
Pavlodar
