Bıyl da Astana qalasyndaǵy Nazarbaev Zııatkerlik mektebiniń sport alańy daryndy balalar men jetekshilerdiń kómegimen basqarylatyn ǵajaıyp robottar álemine aınaldy.
Is-shara oqýshylar arasynda ǵylymı-tehnıkalyq shyǵarmashylyqty damytý, joǵary tehnologııa jáne ınnovasııa salasyna qyzyǵýshylyqty arttyrý, bolashaq mamandyqty tańdaýdaǵy pánaralyq baılanysty nyǵaıtý, robototehnıka boıynsha muǵalimderdiń kásibı damýyn, sondaı-aq robototehnıkalyq júıeni qurý boıynsha perspektıvalyq ǵylym jáne tehnıka salasyna nazar aýdarý, qazirgi zamandaǵy ǵylymı-tehnıkalyq shyǵarmashylyqty damytý maqsatynda uıymdastyrylǵan.
Aımaqtyq jarys kegelrıng, sýmo, fýtbol, shyǵarmashylyq jobalardy qamtıtyn kategorııalarǵa (negizgi, shyǵarmashylyq, erkin, fýtbol) jas ereksheligi boıynsha bólinip ótkiziledi.
Ár jyl saıyn qatysýshylar sany kóbeıip barady. Mysaly 2016 jyly olımpıadaǵa ne bary 4 mekteptiń 19 komandasy qatysatyn bolsa, bıyl komandalar sany 50-ge deıin ósken. Jalpy óz robottarynyń sheberligin kórsetken balalar sany 100-den asyp, qala boıynsha qatysýshy mekemeler sany 17-ge jetti.
Erejege sáıkes jarys bastalmaı turyp oqýshylar robottaryn bólshektep karantınǵa qoıady, sodan keıin qazylar alqasy robottardy tekserýden ótkizip bolǵannan soń, balalar robottardy qurastyryp, saıysqa daıarlaıdy.
Ár jyly baıqaý belgili bir taqyrypta uıymdastyrylady. Osy maýsymnyń taqyryby - "Sustainobots [Robots for Sustainability]" ("Turaqty damýǵa beıimdelgen robottar").
Osy maýsymnyń tapsyrmasy aımaqtyń turaqty damýyna óz septigin tıgizetin robot qurastyrý. Ol robot kelesi maqsattardyń birin qamtý kerek: “Arzan ári taza energııa kózi”, “Turaqty qalalar men eldi meken”, “Klımat ózgerýimen kúresi”, “Jer ústi ekojúıesin saqtaý”.
Olımpıada nátıjesi boıynsha úzdik atanǵandar: Astana qalasyndaǵy Nazarbaev Zııatkerlik mektebi (shyǵarmashylyq, fýtbol kategorııalary boıynsha), №3 mektep gımnazııasy men №68 orta mektebi (erkin kategorııasy boıynsha) jáne Astana qalasyndaǵy Halyqaralyq mektebiniń oqýshylary.
Atalmysh jelilik olımpıada bir ýaqytta elimizdiń árbir aımaǵynda ótkizildi. Aımaqtyq kezeńniń jeńimpazdary 2017 jyldyń 1 shildesinde Astana qalasynda ótetin Respýblıkalyq kezeńge joldama alady.
