Merekege qala turǵyndarymen qosa, Astana qalasynyń ákimi Áset Isekeshev te at basyn tiredi. Elorda basshysy konserttik baǵdarlamany tamashalap, túrli taǵamdardan dám tatty, asyq oınaý sheberligin pash etti.
Halyqtyq serýenge kelýshiler nazaryna «Yntymaǵy jarasqan Máńgilik el» atty merekelik konsert usynyldy. Shara barysynda elordanyń shyǵarmashylyq ujymdary óz ónerlerin ortaǵa saldy. Atap aıtqanda, «Naz» memlekettik bı teatrynyń jáne Memlekettik akademııalyq fılarmonııanyń artısteri, Memlekettik Omby orys halyq ansambli, «Týǵan jer» ansambli (Petropavl q.) jáne «Vaınah» án jáne bı ansambli. Ujymdar qazaq, orys, ózbek, ýkraın, kavkaz halyq ánderi men bılerin oryndady. Sonymen qatar, Qazaqstan halqynyń birligi kúnine arnalǵan konserttik baǵdarlamaǵa ulttyq mádenı ortalyqtar úles qosty.
Qazaqstanda tatý-tátti ómir súrip jatqan túrli ulys ókilderin biriktiretin erekshelikterdiń biri - mol dastarqan. Merekege oraı «Qazaq Eli» monýmentiniń aldyndaǵy alańda 25 ulttyń taǵamdarymen 50 metrlik dastarqan jaıyldy. Qonaqtar ázerbaıjan, ózbek, qyrǵyz, polıak, koreı, ýkraın, belorýs, bolgar, armıan, kúrd, nemis, evreı jáne t.b. taǵamdarynan aýyz tıdi.
