Keshe Qazaqstan Parlamenti Májilisiniń Tóraǵasy Oral Muhamedjanov Rýmynııanyń elimizdegi Tótenshe jáne ókiletti elshisi Emıl Rapchamen kezdesti, dep habarlady osy palatanyń baspasóz qyzmeti.
Álemdik qarjy daǵdarysynyń áserine qaramastan, eki el arasyndaǵy ekonomıkalyq baılanys báseńdegen joq, qaıta qarqyn aldy. Aıtalyq, 2009 jyly Qazaqstan men Rýmynııa arasyndaǵy saýda aınalymy 878 mln. AQSh dollary kóleminde bolǵan edi. Al 2010 jylǵy kórsetkish 1,4 mlrd. AQSh dollaryn qurady. Ústimizdegi jyldyń alǵashqy aılary da oń nátıje berip otyr. Kezdesýde taraptar saýda-ekonomıkalyq baılanystyń qarqyn alyp, aldyńǵy jylmen salystyrǵanda 20 paıyzǵa óskenine toqtalyp ótti.
Oral Muhamedjanov: «Qazaqstan Respýblıkasynyń Prezıdenti Nursultan Nazarbaevtyń Rýmynııaǵa barǵan sapary jáne Rýmynııa Prezıdenti Traıan Baseskýdiń bizdiń elge jasaǵan sapary qos memlekettiń yntymaqtastyq qarym-qatynasynyń arta túsýine serpin berdi. Áli de baılanystyń jaqsy bola túsetinine úmit artamyz», – dedi.
О́z kezeginde Emıl Rapcha Qazaqstan álem nazaryndaǵy el ekenin, Astanada halyqaralyq mańyzdy basqosýlardyń jıi ótýi saıası-ekonomıkalyq baılanystardyń óris alýyna jol ashatynyn aıtyp ótti. Sonyń biri jýyrda ótken Eýropa Qaıta qurý jáne damý banki basqarýshylar keńesiniń otyrysy ekeni anyq.
Eki el Parlamentinde yntymaqtastyq jónindegi depýtattyq top bar. Qazaqstan Parlamentindegi toptyń quramyna 22 depýtat engen. Taraptar eki eldiń mádenı-rýhanı baılanystaryn damytý týraly oılarymen bólisti.
Elshi Májilis Tóraǵasyna Rýmynııa Parlamenti depýtattar palatasynyń tóraıymy Roberta Alma Anastaseniń shaqyrýyn tabys etip, zań shyǵarýshylyq tájirıbesimen almasý maqsatynda óz eline saparmen barýǵa shaqyrdy.