Jıyndy Keńestiń belsendi múshesi Nurlan Dosymov ashyp, júrgizip otyrdy. Ol Prezıdenttiń «Bolashaqqa baǵdar: rýhanı jańǵyrý» maqalasyn jastarǵa arnalǵan úndeý dep qabyldaıtynyn aıtty. О́ıtkeni, ondaǵy talaptardyń bárin jastar iske asyrýy kerek. Sonyń ishinde sanasy bıik, týǵan el men jerge jany ashıtyn, súıetin jastar ǵana osy maqaladaǵy jobalardy iske asyratyn bolady, dedi ol.
Dóńgelek ústelde kezekti sóz Májilis depýtaty Gennadıı Shıpovskıhke berildi. Aıta ketetin jaıt, osy dóńgelek ústelge qatysqan 15 shaqty adamnyń ishinde ulty bólek bolsa da onyń qazaq tilinde maqaldatyp, máteldetip sóılegen sózderi ózgelerden ozyq boldy. Sonyń ishinde ol «Týǵan jer» baǵdarlamasynyń patrıottyq sezimdi oıatýdaǵy mańyzy zor ekendigine toqtaldy. Barlyq jastar óziniń týǵan jerine, kishi otanyna jaqsylyq jasaýǵa daıyn bolýlary kerek. «Týǵan jerdiń tútini de ystyq» degen qaǵıdany júregimizge túıip, bárimizde ózimizdiń kishi otanymyzǵa qolushyn berýge tyryssaq, ol jerdiń ekologııasyn da, ınfraqurylymdaryn da jaqsartýǵa bolady, dedi ol. Odan ári óziniń taza qazaq aýylynda óskenin aıtqan depýtat eshqashan da qazaq jastarynyń saqal qoımaǵanyn kóldeneń tartty. Al qazirgi keıbir jastar dástúrli emes aǵymdardy ustanyp, saqal qoıyp, balaqtaryn sholtıtyp júrgenderi, qyzdardyń nındzıa qusap, kózderin ǵana qaldyryp, basqa jerin túgel qara matamen shymqap júrgenderi bizge jat. Ondaıdan ini-qaryndastarymyzdy aýlaq bolýǵa shaqyrýymyz kerek, dedi ol. Basqa sóıleýshiler de ózgermeli álemde týyndap jatqan jańa qaýip-qaterler jaǵdaıynda qoǵamdyq sanany ózgertý – Qazaqstannyń damýyna negiz bolyp qalatyn turaqtylyq, birlik pen kelisimdi nyǵaıtýǵa árkez múmkindik beredi dep sanaıtyndyqtaryn aıtty.
Qazir Qazaqstan qoǵamy áleýmettik jańarý men rýhanı progreske baǵyt alǵan saıası ultty qalyptastyrý jolynda tur. Álemde aldyńǵy qatarly oryndardy ıelený úshin bizdiń árqaısymyz óz sanamyzdy ózgertip, eskirgen taptaýryndardan arylýymyz qajet. Sondyqtan da, Memleket basshysynyń maqalasynda naqtylanǵan tezıster zańdy jáne qazirgi tańda asa qajet bolyp otyr. Áleýmettik jańarýdyń basty elementi tehnologııalyq turǵyda oılaýdyń sapaly deńgeıine kóterilýdi jáne zamanaýı qoǵamnyń talaptaryna saı kelýdi, áleýmettik jáne rýhanı jańarýdyń aldyńǵy qatarly ádistemelerin meńgerýdi maqsat etýmen qatar, ǵasyrlar boıy jınaqtalǵan ulttyq qundylyqtarǵa negizdelgen baı tájirıbeni, sondaı-aq, ultymyzdyń basqalarǵa uqsamaıtyn basty erekshelikterin saqtap qalýymyz da shart ekendigin esten shyǵarmaýǵa tıispiz, degen oılar aıtyldy.
«Jańany úırený, bilim alýǵa umtylý, kásibı biliktilikti arttyrý men jańashyldyqtar aldyndaǵy qorqynyshtyń joqtyǵy – básekege qabilettiliktiń joǵary ekendigin kórsetedi, biz muny saqtap qana qoımaı, árkez jetildirip otyrýymyz qajet», – dep sanaıtyndaryn aıtty dóńgelek ústelge qatysýshylar.
Jaqsybaı SAMRAT,
«Egemen Qazaqstan»
