Taıaýda munda 2017 jyldyń 1 toqsandaǵy áleýmettik-ekonomıkalyq damý qorytyndylaryna ári atalǵan kezeńdegi bıýdjettiń oryndalý barysyn talqylaýǵa arnalǵan keńeıtilgen májiliske qatysqan edik.
О́ńir basshysy óziniń kirispe sózinde atap kórsetkendeı, mundaǵy negizgi kórsetkishter men derekter kópishilikke belgili. Otyrysta sonyń bárin taǵy da qaıtalap eze bergennen maı shyqpaıtyny taǵy da aıan. Budan góri ekonomıkalyq ósimdi odan ári ósirýge septigin tıgize alatyn, áli de bolsa paıdalanylmaı jatqan múmkindikter men rezervterdi atap kórsetkende utymdy bolmas pa edi?
О́ńirdiń 2017 jyly 1 toqsandaǵy áleýmettik-ekonomıkalyq damýy jóninde negizgi baıandamany jasaǵan oblys ákiminiń orynbasary Asqar Bııahmetovtiń sózi jarty saǵatqa sozylǵanymen, budan tushymdy taldaý taba almadyq. Onyń ashy ishekteı sozylǵan sózinde naqtylyq pen tastúıin tujyrym, dáıekti dálel jetispeı jatty. Kún tártibindegi basty máseleleriniń biri bıýdjetten bólingen qarajattardyń qalaı ıgerilip jatqany jóninde de mardymdy eshteńe aıtylmady. Buǵan qatysty esep berýshiniń tıisti zertteýler men monıtorıngtik baqylaýlar júrgizý isi qolǵa alyndy degen sózi de tym jalań, jalpylama kúıinde aıtyla salǵandaı áser qaldyrdy.
Tabys kózderin izdestirý men tolyqtyrý joldarynyń biri salyq túsimderi boıynsha bereshek somany óz ornyna keltirý bolsa kerek-ti. Oblysta merziminde tólenbeı qalǵan salyq mólsheri ósip bara jatqan joq pa eken? Eger mundaı kórinister oryn alǵan bolsa onyń kólemin tómendetý joldary qalaı bolmaq? Bul úshin óndiristik óńirdegi árbir kásiporynmen júrgizilgen jumys kóńilden shyǵa ma? A.Bııahmetov tarapynan osyndaı basy ashyq saýaldarǵa da tolyqqandy jaýaptar qaıtarylmaı qalǵany ókinishti-aq.
Sondaı-aq, óz áriptesinen qalyspaı jarty saǵatqa jýyq ótken toqsandaǵy ónerkásiptiń jaǵdaıy, sonyń ishinde shaǵyn orta bıznestiń jáı-kúıi qalaı bolǵany osy kezeńdegi bıznes ókilderiniń problemaly máseleleri týraly baıandaǵan oblys ákiminiń orynbasary Qaırat Bekenovtiń sózi de májiliske qatysýshylardy serpilte qoımady.
Tek oblystyń 1 toqsandaǵy aýyl sharýashylyǵy salasy damýynyń qorytyndylary jáne 2017 jylǵa qoıylǵan mindetter týraly baıandaǵan oblys ákiminiń orynbasary Muhtar Jumaǵazıevtiń tujyrymdary kóńilden shyqqandaı boldy. Sondaı-aq, ol búgingi kúnniń basty máselesiniń biri – kóktemgi egis kezinde qandaı tehnologııalar men tásilderge arqa súıeý kerektigi jóninde de aıtyp ótti.
Sóz sońynda úsh aıdyń qorytyndysyna bola osynshama dúıim eldi jınap alqaly jıyn ótkizýdiń qajeti bar ma edi degen saýalǵa jaýap qaıtarǵymyz keledi. Oblys ákimi Berdibek Saparbaevtyń tujyrymdaýynsha, birinshi toqsannyń qorytyndysy boıynsha keń aýqymdy taldaýlar júrgizý óte qajet. Bulaı bolatyn sebebi jyldyń alǵashqy úsh aıyn qosatyn birinshi toqsanda tizgin óz betimen ketip qalsa keıin onyń ornyn toltyrý óte qıynǵa túsedi.
Qysqasy, alǵashqy toqsan jyl qorytyndysyn aıqyndaıtyn sheshýshi kezeń, dep túıindedi ol óz oıyn.
Temir QUSAIYN,
«Egemen Qazaqstan»
Aqtóbe oblysy
