Joǵary bilim berýdi modernızasııalaý jaǵdaıynda qazirgi qoǵamdaǵy pedagogıkalyq mamandyqtyń rólin arttyrýdy jáne básekege qabiletti bolashaq ustazdyń kreatıvti quzyrettiligin qalyptastyrýdy kózdeıtin olımpıada 7 kezeń boıynsha ótkizildi.
Qatysýshylar «Men – kreatıvti pedagog bolamyn!» tanystyrylymy, «Men – kreatıvti kóshbasshymyn!» baıqaýy, «Bilgirler» blıs-týry, «Qazaqstannyń úshinshi jańǵyrýy: básekege qabiletti kreatıvti pedagogtyń modeli» ǵylymı jobany qorǵaý, «Men – kreatıvti pedagogpyn!» shyǵarmashylyq baıqaýy, «Erýdıt» teorııalyq týry jáne «Pedagogıkalyq sheberliktiń qupııalary» ınnovasııalyq sabaqtyń fragmentin kórsetý kezeńderi boıynsha ózara saıysqa tústi.
Saıysqa qatysýshylarǵa bolashaq muǵalimderge esimi elge belgili pedagogtar qazylyq jasady.
– Bilimdi, bilikti hám jaqsy ustaz – bul qaı ýaqytta da eń aldymen kásibı deńgeıi joǵary, zııatkerlik jáne shyǵarmashylyq áleýeti mol tulǵa. Ol oqytýdyń jańa ádis-tásilderin ómirge endirýge daıyn, oqý-tárbıe isine shynaıy janashyrlyq tanytatyn qoǵamnyń eń ozyq bóliginiń biri dep esepteledi. Jáne solaı bolýǵa tıis. Joǵary oqý ornynda bilikti muǵalimdi daıarlaý úshin oqytýshynyń da, stýdenttiń de qajymas eńbegi qajet. Bul turǵyda osy taqilettes pedagogıkalyq olımpıadalar bolashaq ustazdar daıarlaý júıesinde basty element bolyp tabylady jáne olardyń kásibı ósýin qamtamassyz etedi, – dep atap ótti TarMPI rektory Darııa Qojamjarova sharanyń ashylý rásiminde.
Qazylar alqasynyń sheshimi boıynsha bilim báıgesiniń bas júldesin Taraz memlekettik pedagogıkalyq ınstıtýtynyń stýdentterinen quralǵan «TarMPI Pride» toby jeńip aldy. 1-orynǵa Qaraǵandy qalasyndaǵy «Bolashaq» akademııasynyń «Qyran» toby laıyq dep tanylsa, 2-oryndy Abaı atyndaǵy Qazaq ulttyq pedagogıkalyq ýnıversıtetiniń «Intelligent» toby men Qazaq memlekettik qyzdar pedagogıkalyq ýnıversıtetiniń «Sapa» toby ózara bólisti. Al, 3-oryn Taraz ınnovasııalyq-gýmanıtarlyq ýnıversıtetiniń «Bolashaq», «Erýdıt» toptary men Ońtústik Qazaqstan pedagogıkalyq ýnıversıtetiniń «Alfanur» jáne Taraz memlekettik pedagogıkalyq ınstıtýtynyń «KÝP 21 veka» komandalaryna buıyrdy.
Eki kúnge sozylǵan baıqaý qorytyndysy boıynsha «júzden – júırik, myńnan – tulpar» shyqqandar dıplomdarmen, Alǵys hattarmen jáne baǵaly syılyqtarmen marapattaldy.
