– Men 2012 jyldan beri osy áskerı salada qyzmet etip kele jatyrmyn. Bıyl komandırler bizdi iriktep, talapqa saı keledi degen áskerı qyzmetshilerdi osy sherýge qatystyratyn boldy. Osyndaı senimge ıe bolǵandardyń biri – men bolamyn, − deıdi ol. − Sherýge qatysatynymdy estigende qýanyshpen qatar, jaýapkershilikti sezindim. Mıllıondaǵan adam tamashalaıtyn bul sherýge qatysý zor mártebe dep bilemin. Sherýge qatysýdy árbir sarbaz armandaıdy. Men sońǵy ret Uly Otan soǵysynyń 70 jyldyǵyna oraı ótkizilgen sherýge qatysyppyn. Endi, mine, bıyl ekinshi ret qatysqaly otyrmyn. Bizdiń maqsat – sherýdi jurt aıta júretindeı zor abyroımen ótkizý. Daıyndyq oıdaǵydaı ótýde. Árbir áskerı bólim ózderine tapsyrylǵan mindetterdi joǵary deńgeıde oryndap jatyr.
Osyndaı sherý ótkizý arqyly biz búkil álemge elimizdiń áskerı qýatyn kórsete alamyz. Bul – óte mańyzdy. Sarapshylar dúnıe júzi memleketteri qarýly kúshteriniń reıtıngisin jasaıtyn kezde mundaı sherýler oń áserin tıgizedi.
Sondaı-aq, jas urpaq áskerı sherýdi kórip ósse, onyń boıynda patrıottyq hám maqtanysh sezimi oıanady. Patrıot jastar eli men jerine qyzmet etýge árqashan daıyn bolady. Jaman aıtpaı jaqsy joq, eger el basyna kún týa qalsa, onda osyndaı azamattar birinshi bolyp qoldaryna qarý alyp, elin, jerin jaýdan qorǵaıtyn bolady.
Otanshyl jastar – el qorǵany. Men áli úılengen joqpyn. Bolashaqta otbasyn quryp jatsam, ulym da men sekildi áskerı salada qyzmet istese deımin. Bul – qyzyǵy men shyjyǵy mol sala. Munda tek naǵyz er azamattar ǵana qyzmet etedi. Keıde sharshaımyn. Degenmen, sondaıda ata-babalarymyz aq naızanyń ushymen, aq bilektiń kúshimen qorǵap qalǵan qasıetti de kıeli jerim úshin, Otanym úshin ter tógip júrgenimdi oılasam, janym jadyrap sala beredi. Sharshaǵanymdy umytyp, ózimdi sergek sezinemin.
– Osy áskerı salada qyzmet etip kele jatqanyńyzǵa 5 jyl tolypty. Osy ýaqyt aralyǵynda siz qyzmet etetin bólimde qandaı ózgerister boldy?
− Iá, qyzmetke alǵash kelgen jylmen qazirgi kezdi salystyrsam, arasy jer men kókteı eken. Men sizge aıtaıyn, qazirgi tańda Qazaqstannyń Qarýly Kúshteri zor qarqynmen damýda. Jyldan-jylǵa emes, aıdan-aıǵa órkendep keledi dese bolady. Memleket basshysy Qarýly Kúshterge zor kóńil bólýde.
Bizdiń salada basqarý júıesi naqty jolǵa qoıylǵan. Áskerı bólimder sý jańa qural-jabdyqtarmen, zamanaýı qarý-jaraqtarmen jabdyqtalyp jatyr. Sarbazdarǵa da zor jaǵdaı jasalǵan. Olar áleýmettik máselelerdi oılap bastary qatpaıdy. Bizdiń eń basty maqsatymyz – el qaýipsizdigin qamtamasyz etý. Osyǵan oraı, bizdiń bólim kúndiz-túni kóz ilmeı Qazaq eliniń kók aspanyn jiti baqylap otyrady. Sebebi, bizdiń jumysta bir sát bosańsýǵa bolmaıdy. Muny óte jaqsy túsinemiz.
– Keıde «Ana jaqta soǵys órti tutanypty. Myna jaqta lańkestik oryn alypty» degen habarlar estilip qalyp jatady... – Mundaı jaısyz habarlardy estigende júregimiz aýyrady. Soǵys bolǵan elde turaqtylyq joıylady. Bul ekonomıkanyń kúıreýine ákelip soǵady. Eger dereý kelissózder jasalmasa, soǵys órti órship, saldarynan qanshama beıbit turǵyn jazyqsyzdan jazyqsyz oqqa ushyp, júzdegen, myńdaǵan sarbaz sheıit bolyp jatady. Soǵys degen úlken tragedııa.
Qudaıǵa shúkir, Elbasynyń salıqaly saıasatynyń arqasynda bizdiń elimizde beıbitshilik týy jelbirep tur. El aman, jurt tynysh. Bile-bilgen adamǵa budan artyq baqyt joq. Tek Qazaqstanda emes, búkil álemde soǵys bolmasyn dep tileımin!
Áńgimelesken
Ǵalymjan ELShIBAI,
«Egemen Qazaqstan»
Sýrette: Nurlybek ÁBÝOV
