Qazaqtyń batyr uldaryn ózime úlgi tutamyn

Túrli sebeppen sábı kúnimde balabaqshaǵa bara almadym. Maǵan alǵash árip tanytyp, saýa­tym­dy ashqan ózimniń anam. Ol meniń óleńge qushtar ekenim­di bilgendikten, únemi yntalandyryp otyrýshy edi. Shaǵyn taqpaqtar men óleńderdi ońaı jattap alǵanyma shyn nıetimen qýanatyn. Mektep tabaldyryǵyn attamaı turyp-aq men 30-dan astam óleń jattap aldym, al 6-synyptan bastap óz óleńderimdi shyǵaratyn boldym.  

Jazǵy demalys aılarynda aýylǵa baryp, ájemniń janynda bolatynmyn. Ol kisiden kópte­gen qyzyqty áńgimeler, tartym­dy tarıhı oqıǵalar estip, sýsyn­daıtyn­myn. Jazatyn óleńderime osy áńgimelerdiń de yqpaly kóp boldy.

Al áskerı qyzmetker bolý armanyn meniń boıyma ákem ekti. Ol maǵan óziniń jas kúnindegi ás­ke­rı formasymen túsken sýret­terin kórsetip, tartylǵan sym­daı, tip-tik turǵan soldattardyń ádemi sýretterin maqtap, ofıser bolý­dyń artyqshylyqtaryn áńgi­melep qyzyqtyratyn. Men de qaqqan qazyqtaı bolyp jú­retin, kıimderi boıyna quıyp qoı­ǵan­daı shap-shaq tura­tyn, ıyǵyndaǵy pogondary jar­qyraǵan ofıser bolý armanyn sol kezderden bas­tap sanama sińir­gen edim.  

Mekteptiń 9-synybyn bitir­gen jyly ózimniń armanym­dy oryndaıtyn jol – armııa gene­raly, Halyq qaharmany Saǵad­at Nurmaǵambetov atyn­da­ǵy respýblıkalyq «Jas ulan» mek­tebi ekenin bildim. Son­dyq­tan, 10-synyptan osy oqý ornyna túsip, bolashaq ofıserler daıyndaıtyn mektepte oqyp jatyrmyn. Árıne, oqý orny­na túskenshe men áskerı ómirdiń is júzinde qandaı bolatynyn bil­medim. Sóıtsem, ol adamdy shuǵyl ózgertip, temirdeı tár­tipke úıretetin oryn eken. Son­dyq­tan da erkin ósken men sııaqty balalarǵa oqý alǵashynda óte qıyn boldy. Tipti, oqýdan shyǵyp ketsem be eken dep te oıladym. Biraq ájemniń, ata-anamnyń, jaqyn-juraǵattardyń aldyndaǵy jaýapkershilik meni uıaltyp, qaıtse de oqýdan shyqpaýǵa bel býdym.

Qazir men áskerı mektepti bitirgeli turǵan túlekpin. Alǵa qoıǵan mindetter men maqsattarymdy aıqyn bilemin. Al azamattyq ómirdegi kóptegen joldastarym áli kúnge aldaryna aıqyn maqsat qoımaǵanyn kórip júrmin. Áskerı mektep tárbıelegen meniń maqsattarym belgili, senimim nyq. Men ózimdi táýelsiz Otanym – Qazaqstannyń qorǵanysyna arnaǵan janmyn, osy joldan meni eshteńe de taıdyra almaıdy. Áskerı ómir­diń birshama qıynshylyqtaryn kórdim, daladaǵy shatyrda turý­dyń, qutydan qaınamaǵan sý ishýdiń, okop qazýdyń aýyrlyǵyn sezindim, sonyń bárine ózimniń tóze alatynyma kózim jetti. Eń bas­tysy, osyndaı ómir maǵan unaı­dy. Meni osyndaı tózim­di­lik­ke, ójettikke, er isine «Jas ulan» mektebi shyńdady.

Meniń eki qaryndasym, bir inim bar. Jasymnan men olarǵa qamqor bolýǵa tyrystym. Endi áskerı qyzmette jaqsy nátıjelerge qol jetkizsem, olar menen úlgi alady, meni maqtan tutatyn bolady. Shamamnyń kelgeninshe men olardyń úmitin aqtaýǵa tyrysamyn. Sondaı-aq, ata-anam men jaqyndarymnyń da Qazaqstan armııasyna adal da úlgili qyzmet etken meniń isterim men qaharmandyǵyma rıza bolǵandaryn kórsem deımin. О́z mindetimdi adal atqaryp, Otan qorǵaý jolynda barlyq qıynshylyqtardan jol tap­sam jáne osy iste qyraǵylyq tany­ta alsam – óz maqsatyma qol jetkize alǵanym. Men ózime Baýyr­jan Momyshuly, Saǵadat Nur­maǵambetov jáne qazaqtyń basqa da batyr uldary men qyzdaryn úlgi tutamyn.  

Ámirjan SÁRSENBEK,

armııa generaly S.Nurmaǵambetov atyndaǵy «Jas ulan» mektebin bıyl bitirýshi