«El-Klasıko» nemese qazaqstandyq qarsy turý

Mine, osy aıtqan «El-Kla­sıko» qyzyǵy Qazaqstan chempıonatynyń 10-týrynda «Astana Arena» stadıonynda ótti. Bul oıynda «Qaırattyń» elordadan úsh upaı arqalap qaıtatyn múmkindigi bar edi. Matchtyń birinshi taımynda esep ashyp, sońǵy mınýttarǵa deıin utys tizginin qolǵa ustap turǵan. Biraq, bul joly jeńis buıyrmady. Islambek Qýattyń alystan teýip kirgizgen ádemi golyna kezdesýdiń 87-mınýtynda astanalyq Srdjan Grahovas dál sondaı mergen soqqymen jaýap berdi. Sóıtip, «Astana» ózin ókshelegendermen aradaǵy tórt upaı alshaqtyqty saqtap qaldy. Al «Qaırat» bolsa, týrnır kestesinde bir saty tómen syr­ǵyp, Pavlodarda «Ertisti» 1:0 esebimen tize búktirgen «Orda­basyǵa» jol berdi. 

Bul týrda oıda joq jerden «Tobyldyń» 1:0 esebimen sa­ǵyn syndyrǵan «Aqjaıyq» alǵashqy altylyqtyń arasyna kelip qosyldy. FIFA-dan al­ty upaıyn qaıtaryp alǵan «Atyraýǵa» jan bitti dersiń. Munaıshylar osymen qatarynan ekinshi jeńisine qol jetkizdi. Bul joly olar «Qaısardy» 1:0 esebimen jeńip, Syr boıynyń fýtbolshylaryn Qyzylordaǵa qur qol qaıtardy.

Týrdaǵy aıta ketetin bir jańalyq – kósh sońyndaǵy «Shahter» bıylǵy maýsymdaǵy alǵashqy jeńisin toılady. Ken­shiler «Oqjetpestiń» qaq­pasyna jaýapsyz eki gol soqty. Biraq osyǵan qaramastan, «Shahter» burynǵysha eń sońǵy orynda keledi.

Onynshy týr «Aqtóbe» klý­byndaǵy ahýaldyń ońyp turmaǵanyn kórsetti. Osydan eki jyl buryn ǵana júldege talasyp júrgen komanda búgingi kúnde kósh sońyndaǵylardyń qataryn kóbeıtti. Bul týrda aqtóbelikter óz alańynda «Ta­razdan» aılasyn asyra almady.

Onynshy týrdyń ná­tıjeleri mynadaı bolyp tirkeldi:

«Oqjetpes» – «Shahter» – 0:2 (0:1), Táttibaev, 20 (0:1). Táttibaev, 71 (0:2). «Aqjaıyq» – «Tobyl» – 1:0 (0:0), Sergıenko, 76 (1:0). «Atyraý» – «Qaısar» – 1:0 (0:0), Maksımovıch , 49 (1:0). «Ertis» – «Ordabasy» – 0:1 (0:0), Fontanelo, 74 (0:1). «Astana» – «Qaırat» – 1:1 (0:1), Qýat, 34 (0:1). Grahovas, 87 (1:1). «Aqtóbe» – «Taraz» – 1:1 (0:1), Feshýk, 24 (0:1). Baıtana, 57 (1:1).

Surmergender arasyndaǵy básekede ázirge ózgeris joq: Je­rar Goý («Qaırat») 9 gol­men top bastap keledi. Jýnıor Ka­bananga («Astana») 5 doppen ekinshi orynda tur.

11-týrdyń oıyndary 6 ma­myrda ótedi. Bul kú­ni my­na ko­mandalar ózara kez­­desip, kúsh synasady: «Ta­raz» – «Oqjetpes», «Qaı­­sar» – «Aqtóbe», «To­byl» – «Astana», «Shah­­ter» – «Er­tis», «Or­­da­ba­sy» – «Aq­­jaıyq», «Aty­­raý» – «Qaırat».

Qaırat ÁBILDINOV,

«Egemen Qazaqstan»