Baıqaýdyń eń kishkentaı qatysýshysy alty jasar Elıseı Mysın (Reseı) men Artýr Mıhlın (Qazaqstan) «Qazaqstan úmiti» marapatyna laıyq dep tanyldy. Sımfonııalyq orkestrmen óner kórsetip úırengen Elıseı Astana sahnasyn jatyrqamady. Saltanatty marapattaý keshinde norveg kompozıtory Edýard Grıgtiń «I Dovregubbens Hall» «Taý koroliniń úńgirinde» kompozısııasyn oryndap, sahnamen qoshtasqysy kelmeı, kópshilikti bir kúldirdi. Reseıdiń Stavropol qalasynan kelgen Elıseı – búkilreseılik jáne halyqaralyq baıqaýlar men festıvaldardyń jeńimpazy.
– Tóbesinde úlken shary bar alyp baǵan (sirá «Báıterek» bolsa kerek) maǵan qatty unady. Munda barlyǵy jap-jańa eken. Men Astanaǵa taǵy da qydyryp kelgim keledi, – deıdi alty jasar balaqaı.
Báıgede baq synaǵan 18 jasqa deıingi – bastaýysh, orta jáne joǵary mýzykalyq bilim mekemelerinde oqıtyn jas pıanısterge baıqaý sharty boıynsha qazaqstandyq kompozıtorlardyń shyǵarmasyn oryndaý mindettelgen bolatyn. Osy turǵyda Qazaqstan kompozıtory N.Meńdiǵalıevtiń «Dombyra týraly ańyz» atty týyndysyn fortepıanoda úzdik oryndaǵany úshin Petr Akýlovqa (Reseı) arnaýly syılyq tapsyryldy. On jasar talapker ótken A.Bakýlov atyndaǵy II Búkilreseılik jas pıanıster baıqaýynyń I syılyq ıegeri. Jalpy, jarysqa qatysyp jatqan júldegerlerdiń qaı-qaısysy da osal emes.
Saltanatty jıynda sóz alǵan Mádenıet jáne sport mınıstri Arystanbek Muhamedıuly kópshilikti festıvaldyń sátti aıaqtalýymen quttyqtady.
– Álemniń otyzǵa tarta elinen qatysqan 130-ǵa jýyq balanyń árqaısysy irikteý týrynda qazaqstandyq kompozıtorlardyń shyǵarmalaryn oryndady. О́z eliniń injý-marjandary sanalatyn jas mýzykanttardyń arqasynda ultymyzdyń kompozıtorlary álemge tanyla tústi, – dedi mınıstr.
Bir aptaǵa sozylǵan mýzykalyq baıqaýda úmitkerler tamasha óner kórsetip, bolashaqtarynan úlken úmit kútýge bolatyndyǵyn dáleldedi. Jas erekshelikterine qaraı bólingen úsh toptyń úzdikterine syılyqtar tabys etildi.
Álemniń túkpir-túkpirindegi talanttarǵa qoldaý bildirý, halyqaralyq shyǵarmashylyq baılanystardy keńeıtý maqsatynda jas pıanısterdiń halyqaralyq baıqaýy Astanada 2013 jyldan beri ótkizilip keledi. Jobanyń kórkemdik jetekshisi – orys fortepıano mektebin jańǵyrtý jolynda jańashyldyǵy men kórkemdik taldaýlarymen erekshelenetin Denıs Masýev. Talantty pıanıstiń birneshe jyldyq gastroldik kestesi aldyn ala qurylady. Ol bir aıda álemniń jıyrmadan astam elinde konsert beredi, solardyń qatarynda Astana da bar.
– Festıvaldyń fantastıkaǵa toly áserin sózben aıtyp jetkizý qıyn. Bizben birge bolǵan barshańyzǵa alǵysym sheksiz. Astana bizdiń konkýrsymyzdyń ajyramas bir bóligine aınaldy. Búgin Astanada klassıkalyq mýzyka óneriniń jańa juldyzdary dúnıege keldi dep senimdi túrde aıta alamyn, – dep qatysýshylar men kórermen qaýymǵa jyly lebizin arnady álemge áıgili mýzykant.
Aıa О́MIRTAI,
«Egemen Qazaqstan»
Sýretti túsirgen Orynbaı BALMURAT, «Egemen Qazaqstan»
