Issapar kezinde A.Mamın Túrikmenstan Prezıdenti G.Berdimuhamedovpen kezdesip, ekonomıka, ǵylymı-tehnıka jáne mádenı yntymaqtastyq jónindegi Qazaqstan-Túrikmenstan úkimetaralyq komıssııasynyń 9-shy otyrysyna qatysty.
Prezıdent G.Berdimuhamedovpen áńgimelesý barysynda eki el arasyndaǵy saýda-ekonomıkalyq baılanystardyń barlyq spektrleri boıynsha yntymaqtastyqtyń perspektıvalary talqylandy.
QR Premer-Mınıstriniń Birinshi orynbasary A.Mamın ÚAK otyrysy Túrikmenstan Prezıdentiniń 18-19 sáýir kúnderi Qazaqstanǵa jasaǵan memlekettik saparynan keıin birden ótkizilip otyrǵanyn aıtty. Bul sapar yntymaqtastyqty tereńdetip, ári qaraı damýǵa zor serpin berdi.
Taraptar kólik ınfraqurylymy men ortaq shekaranyń bolýy, eki memleket arasynda ózara tıimdi yntymaqtastyq ornatýǵa múmkindik beretinin jáne ekijaqty saýdany damytýǵa bar kúsh-jigerimizdi jumsaý kerektigin atap ótti.
2016 jyly syrtqy saýda aınalymy 2015 jylmen salystyrǵanda 59%-ǵa ulǵaıyp, 283,5 mln AQSh dollaryn qurady.
Taraptar Túrikmenstan Prezıdentiniń Qazaqstanǵa jasaǵan memlekettik sapary aıasynda joǵary deńgeıde qol jetkizilgen ýaǵdalastyqtardy, onyń ishinde orta merzimdi perspektıvada taýar aınalymyn 1 mlrd AQSh dollaryna deıin jetkizý qajettigin basa aıtty.
Túrikmenstan Prezıdenti G.Berdimuhamedov Astanada ótetin «EKSPO-2017» mamandandyrylǵan kórmesine belsene qatysýǵa nıetti ekenin bildirdi.
Dál sol kúni Ashhabadta QR Premer-Mınıstriniń Birinshi orynbasary A.Mamın men Túrikmenstannyń Mınıstrler kabıneti Tóraǵasynyń orynbasary B.Annameredovtyń tóraǵalyǵymen ekonomıka, ǵylymı-tehnıkalyq jáne mádenı yntymaqtastyq jónindegi Qazaqstan-Túrikmenstan úkimetaralyq komıssııasynyń 9-shy otyrysy ótti.
ÚAK-niń 9-shy otyrysynyń qatysýshylary buryn qol jetkizilgen ýaǵdalastyqtardyń júzege asyrylýyn talqylap, otyn-energetıka sektory, kóliktik-kommýnıkasııalyq, ǵarysh salasy, aýyl sharýashylyǵy, qorshaǵan ortany qorǵaý, bilim jáne mádenıet salalarynda yntymaqtastyqty odan ári damytýdyń naqty sharalaryn atap ótti.
Otyrysta saýda-ekonomıkalyq baılanystar, eksporttyq-ımporttyq operasııalar kólemin ulǵaıtý, jetkiziletin taýarlar men kórsetiletin qyzmetter kólemin arttyryp, nomenklatýrasyn keńeıtý arqyly ekonomıkalyq yntymaqtastyqty nyǵaıtyp, qoldanystaǵy sharttyq-quqyqtyq bazany jetildirý qajettiligi aıtyldy.
Qazaqstandyq kompanııalardyń Ashhabad – Aýǵanstan shekarasyndaǵy jol ýchaskesiniń qurylysyna qatysýǵa, 243 shaqyrymdy quraıtyn (31,6 tonna rels, baǵyttaýysh burmalar) Túrkmenabad – Mary temirjol ýchaskesin jańǵyrtýǵa, sondaı-aq Farap qalasyndaǵy rels-dánekerleý kásiporny men Serdar qalasyndaǵy vagon jóndeý zaýytyn jańǵyrtýǵa qatysý týraly aldyn ala ýaǵdalastyqqa qol jetkizildi.
Budan bólek, taraptar Túrikmenstan úshin ǵarysh apparattarynyń qurylys jobasyn talqylap, ǵarysh salasynda mamandardy daıarlaý týraly, Mańǵystaý oblysy men Balqan ýálaıatynda shekaralas saýda aımaǵyn qurý, Araldy qutqarý halyqaralyq uıymy aıasynda yntymaqtastyqty nyǵaıtý jaıynda sóz qozǵady.
Otyrys qorytyndysy boıynsha Hattama qabyldandy.
