Sapar barysynda A.Mamın Túrikmenstan Prezıdenti G.Berdimuhamedovpen kezdesip, Ekonomıkalyq, ǵylymı-tehnıkalyq jáne mádenı yntymaqtastyq jónindegi 9-shy Qazaqstan-Túrikmenstan úkimetaralyq komıssııasynyń otyrysyna qatysty.
Premer-Mınıstrdiń birinshi orynbasary A.Mamın úkimetaralyq komıssııa otyrysynyń yntymaqtastyqty odan ári damytýǵa jáne tereńdetýge eleýli serpin bergen Túrikmenstan Prezıdentiniń 18-19 sáýirdegi Qazaqstanǵa memlekettik saparynan keıin ile-shala ótip otyrǵanyn atap ótti.
Taraptar kólik ınfraqurylymy men ortaq shekarany eskergende eki el arasynda ózara tıimdi yqpaldastyqty jolǵa qoıý úshin úlken áleýettiń bar ekenin aıta otyryp, ekijaqty saýdany aıtarlyqtaı ósirý úshin kúsh-jigerdi shoǵyrlandyrý qajet ekenin atap kórsetti.
2016 jyly syrtqy saýda aınalymy 2015 jylmen salystyrǵanda 59 paıyzǵa artyp, 283,5 mln AQSh dollaryn qurady.
Taraptar Túrikmenstan Prezıdentiniń Qazaqstanǵa memlekettik sapary sheńberindegi joǵary deńgeıde qol jetkizilgen ýaǵdalastyqtardy júzege asyrý boıynsha, sonyń ishinde orta merzimdi perspektıvada taýar aınalymyn 1 mlrd AQSh dollaryna deıin jetkizýde ekijaqty sharalar qabyldaý qajettigin atap ótti.
Túrikmenstan Prezıdenti G.Berdimuhamedov óz eliniń Astanada ótetin EKSPO-2017 halyqaralyq mamandandyrylǵan kórmesine belsendi qatysýǵa nıetti ekenin bildirdi.
Sol kúni Ashǵabadta Qazaqstan Premer-Mınıstriniń birinshi orynbasary A.Mamınniń jáne Túrikmenstan Mınıstrler kabıneti Tóraǵasynyń orynbasary B.Annameredovtiń tóraǵalyǵymen Ekonomıkalyq, ǵylymı-tehnıkalyq jáne mádenı yntymaqtastyq jónindegi Qazaqstan-Túrikmenstan úkimetaralyq komıssııasynyń 9-shy otyrysy ótti.
Oǵan qatysýshylar buǵan deıin qol jetkizgen ýaǵdalastyqtardy júzege asyrý barysyn talqylap, yntymaqtastyqtyń, otyn-energetıka sektoryn, kólik-kommýnıkasııa salasyn, aýyl sharýashylyǵyn, qorshaǵan ortany qorǵaý, bilim berý men mádenıetti qosa alǵanda, basym baǵyttaryn damytý boıynsha naqty sharalar belgiledi.
Otyrysta qazirgi bar kelisimsharttyq-quqyqtyq bazany jetildirý, saýda-ekonomıkalyq baılanystardy ulǵaıtý, eksporttyq-ımporttyq operasııalar kólemin arttyrý, jetkiziletin taýarlar men kórsetiletin qyzmetterdiń nomenklatýrasy men kólemderin keńeıtý esebinen ekonomıkalyq yntymaqtastyqty nyǵaıtý qajettigi atap ótildi.
Qazaqstandyq kompanııalardyń Ashǵabad – Aýǵanstan shekarasy joly ýchaskesiniń qurylysyna qatysýy, 243 shaqyrymǵa sozylatyn Týrmenabat -Mary temir jolynyń ýchaskesin jańǵyrtýǵa, sondaı-aq, Farap qalasyndaǵy rels dánekerleý kásiporny men Serdar qalasyndaǵy vagon jóndeý zaýytyn jańǵyrtýǵa qatysýy týraly aldyn ala ýaǵdalastyqtarǵa qol jetkizildi.
Onyń syrtynda taraptar Túrikmenstan úshin ǵarysh apparattary qurylysynyń jobasyn jáne ǵarysh salasyndaǵy mamandardy oqytý, Mańǵystaý oblysy men Balkan ýálaıatynda shekaralyq saýda aımaǵyn qurý, Araldy halyqaralyq qutqarý qory sheńberindegi yntymaqtastyq máselelerin talqylady.
