Memleket basshysy táýelsizdik jyldarynda Qazaqstan áskeriniń kásibı biliktiligi artqanyna toqtalyp, onyń qataryndaǵy eń laıyqty azamattardyń joǵary ataqtarǵa ıe bolyp kele jatqanyn aıtty.
«Búgingi rásimniń Qazaqstan Qarýly Kúshteriniń 25 jyldyǵy qarsańynda ótýiniń erekshe sımvoldyq máni bar. Bul – el egemendiginiń senimdi kepiline aınalǵan aıbyndy armııamyz úshin mańyzdy tarıhı beles. Onyń áleýeti táýelsizdik jyldarynda áskerı reformalardyń, qarý-jaraq pen tehnıkanyń júıeli jańartylýynyń arqasynda aıtarlyqtaı nyǵaıdy», – dedi Nursultan Nazarbaev.
Qazaqstan Prezıdenti jańa jahandyq qaýip-qaterler jaǵdaıynda elimizdiń qaýipsizdik pen qorǵanys salasyndaǵy barlyq qurylymdarynyń kásibı jáne jaýyngerlik daıyndyǵynyń joǵary deńgeıde bolýyn qamtamasyz etý qajettigine nazar aýdaryp, bul rette komandırler korpýsynyń erekshe rólin atap ótti.
«Sizder jaýyngerlik ónegeli úrdisti, babalardyń erlik dástúrin jalǵastyryp, barlyq jeke quram úshin qaltqysyz qyzmettiń úlgisin kórsetip kelesizder. Áskerı daıyndyq deńgeıiniń artýy, áskerdegi jáne quqyq qorǵaý organdaryndaǵy minsiz ahýal sizderdiń basshylyq etý isin saýatty júrgizýlerińizge baılanysty. Kúsh-qýattaryńyz, bilimderińiz ben tájirıbelerińiz qaýipsizdikti qamtamasyz etýge, quqyqtyq tártipti, elimizdiń konstıtýsııalyq qurylymyn saqtaýǵa baǵyttalýǵa tıis. Sizder qoǵamdaǵy eń jaýapty mıssııany – qazaqstandyqtardyń beıbit ómiri men táýelsizdigimizdiń qundylyqtaryn qorǵaý isin júzege asyryp kelesizder», – dedi Elbasy.
Sońynda Memleket basshysy rásimge qatysýshylarǵa zor densaýlyq, baq-bereke jáne tabys tiledi.
Rásim barysynda general-leıtenant áskerı ataǵy T.Muhtarovqa, ulttyq qaýipsizdik general-leıtenanty arnaýly ataǵy S.Ábishke, Á.Sadyqulovqa, general-maıor áskerı ataǵy D.Adyrbekovke, E.Aldajumanovqa, J.Ahmetovke, T.Ábishevke, T.Ámirıevke, V.Bekkerge, S.Ismaılovqa, Q.Qaraqulovqa, B.Qurmanbaevqa, Q.Tasybekovke, avıasııa general-maıory áskerı ataǵy T.Qoıshyqulovqa, kontr-admıral áskerı ataǵy Q.Eseneevke, ulttyq qaýipsizdik general-maıory arnaýly ataǵy K.Adambekovke, polısııa general-maıory arnaýly ataǵy B.Aımaǵambetovke, M.Qyzylovqa, 3-sanattaǵy joǵary biliktilik synyby T.Tatýbaevqa, 3-synypty memlekettik ádilet keńesshisi synyptyq sheni Q.Igembaevqa, E.Sybanqulovqa, Á.Shyndalıevke berildi.
