Alańǵa QR Qarýly Kúshteriniń Joǵarǵy Bas Qolbasshysy Nursultan Nazarbaev keldi. Áskerı parad qolbasshysy, QR Qarýly Kúshteri Qurlyq áskeriniń bas qolbasshysy, general-maıor Murat Bektanov QR Qorǵanys mınıstri Sáken Jasuzaqovqa áskerı parad týraly baıandama jasady. Qorǵanys mınıstri Joǵarǵy Bas qolbasshyǵa parad daıyn dep baıandady.
Sherýde 5000-nan astam áskerı qyzmetshi saltanatty marshpen júrip ótedi, 300-ge jýyq áskerı tehnıka men zamanaýı qarý-jaraq túrleri jurtshylyq nazaryna usynylady. 70-ke jýyq áýe tehnıkasy Qazaqstannyń avıasııalyq áleýeti men jaýyngerlik ázirligin pash etedi.
Dástúrli túrde jaıaý ásker legin «Jas Ulan» respýblıkalyq mektepteriniń barabanshylar qurama rotasy bastaıdy. Alǵash ret barabanshylar sapyna Astana, Almaty, Qaraǵandy, Shymkent qalalaryndaǵy respýblıkalyq «Jas Ulan» áskerı mektepteriniń úzdik tárbıelenýshileri iriktelip alyndy. Ári qaraı sherýdi QR Qorǵanys mınıstrliginiń ofıserleri, Qurlyq áskerleri, Áýe qorǵanysy kúshteri jáne Áskerı-teńiz kúshteri, Desanttyq-shabýyldaý áskerleri, teńiz jaıaý áskeri, bitimgershilik kúshterdiń, arnaıy maqsattaǵy bólimshelerdiń ofıserleri, áskerı qyzmetshi áıelder, áskerı polısııa jáne aýmaqtyq qorǵanys brıgadasynyń paradtyq eseptoptary jalǵastyrady.
Sonymen qatar, alańǵa 2016-2017 jyldary áskerı arsenalymyzdy tolyqtyrǵan zamanaýı áskerı tehnıka men qarý-jaraq túrleri shyǵarylady. Qazaqstandyqtar «Qaz Grad», «Smerch», «Prıma» oq atýdyń reaktıvti júıeleri, «Kobra» jaýyngerlik barlaý mashınalary, «Shtýrm-S» tankige qarsy zymyran kesheni, «Gıasınt» zeńbirekter batareıasy, «Tıýlpan» ózdiginen júretin mınaatqyshy, «Tochka-Ý» taktıkalyq zymyrandary, «Arlan» brondy dóńgelek mashınalary, «Natısk» ushý apparattary men radıoelektrondyq barlaý júıeleri, «Federal» arnaıy brondalǵan avtomobılder legi, «Tıgr» arnaıy polısııa avtomobıli syndy birqatar jańa tehnıka túrlerin tamashalaı alady. Áýe qorǵanysy kúshteriniń eń úzdik ushý apparattary Astana aspanynda «25» merekelik datasyn jáne «Báıterek» atty joǵary pılotaj fıgýrasyn kórsetedi.
Aıta keteıik, paradqa shyǵarylatyn áskerı tehnıkalardyń jartysyna jýyǵy Qazaqstanda shyǵarylǵan. Atap aıtqanda, «Arlan» brondy tehnıkasy, «Qaz Grad» reaktıvti júıeleri, «Djıgıt» zeńbirek qondyrǵylary jáne negizgi kólik bolyp sanalatyn KaMAZ kólikteri otandyq qorǵanys ónerkásipterinde shyǵarylǵan.
