«Bıyl Qarýly Kúshterimizdiń 25 jyldyq merekesin atap ótýdemiz. Men shırek ǵasyr buryn táýelsiz elimizdiń tól armııasyn qurý týraly dál búgingi kúni Jarlyqqa qol qoıǵan bolatynmyn. Sodan beri az ǵana ýaqyt ótse de, Qarýly Kúshterimiz bes qarýy saı zamanaýı úlgidegi aıbyndy armııaǵa aınaldy. Saıyp qyran sarbazdarymyz búginde uly dalanyń senimdi qorǵany, azamattyǵymyzdyń almas aldaspany. Biz qazirgi zaman talaptaryna saı keletin áleýetti áskerimizdi jasaqtadyq. El qaýipsizdiginiń basty baǵyttary aıqyndaldy. Áskerı doktrınamyz qabyldandy. Ekonomıkamyz qarqyndy damyǵan saıyn elimizdiń Qarýly Kúshteri de jetilip, nyǵaıa tústi. Áskerı qaýipsizdigimiz «Qazaqstan-2050» baǵdarlamasynyń basty baǵyttarynyń biri bolyp sanalady. Bizdiń áskerimiz TMD elderiniń ishinde aldyńǵy qatarly ásker retinde tanyldy», – dedi Memleket basshysy.
Sonymen qatar, Elbasy áskerı qyzmetshilerdi batyr babalarymyzdyń erlik jolyn odan ary jalǵastyrýǵa shaqyryp, Uly Otan soǵysynyń ardagerlerine rızashylyǵyn bildirdi.
«Bolashaq urpaq úshin Táýelsiz, qýatty Qazaqstandy qurýǵa múmkinshilik jasaǵandaryńyz úshin barlyq ardagerlerge shynaıy rızashylyǵymdy bildiremin. Bizdiń elimizdiń Qarýly Kúshteri sizderdiń jaýyngerlik dańqtaryńyzdy jalǵastyrýshylar. Otandy qorǵaý jáne onyń qaýipsizdigine qamqorlyq tanytý – elimizdiń árbir azamatynyń boryshy ári mindeti, – dedi QR Qarýly Kúshteriniń Joǵarǵy Bas Qolbasshysy. – Qarýly Kúshterimiz ár ýaqytta da Táýelsizdigimizdiń basty tiregi bolyp qala beredi. Sizder ózderińizdiń qasıetti boryshtaryńyzdy adal atqaryp, týǵan jerimizdiń tynyshtyǵyn qorǵańyzdar, ózderińizdiń kásibı sheberlikterińizdi, jaýyngerlik daǵdylaryńyzdy arttyryp, jaýyngerlik baýyrlastyq pen birlikti nyǵaıtyńyzdar. Mereıtoılyq sherýdiń qazaqstandyq armııanyń áskerı qýatyn, joǵary rýhyn kórsetetindigine senimdimin».
