Bul kúni áskerı orkestrmen 500 jaýynger «Ordabasy» alańynan «Ortalyq» saıabaqqa deıin saltanatty marshpen júrip ótip, sap túzedi.
Merekelik jıynǵa qatysqan oblys ákimi Janseıit Túımebaev barsha Ońtústik jurty men jaýyngerlerdi Otan qorǵaýshylar kúnimen jáne Qazaqstan Respýblıkasy Qarýly kúshterine 25 jyl tolýymen quttyqtady.
«Búginde Elbasynyń, Qazaqstan Qarýly Kúshteriniń Bas qolbasshysy Nursultan Nazarbaevtyń strategııalyq kóregendiginiń arqasynda Qazaqstan armııasynyń jańa kelbeti, otanshyl rýhy qalyptasty. Qarýly Kúshter memleketimizdiń turaqty kepiline aınaldy. Sondyqtan bul kún – Otandy qadirleıtin, onyń tarıhyn qurmetteıtin, aıbyndy áskerimizdiń ataǵyn asqaqtatatyn, memleketimizdiń qýatyn aıǵaqtaıtyn kún», – dedi ákim.
Budan keıin óńir basshysy eldiń qorǵanys qabiletin kúsheıtýge, ulttyq qaýipsizdikti qamtamasyz etýge, azamattardyń múddeleri men quqyqtaryn, zańdylyqty qorǵaýǵa úles qosqan 17 azamatty Qazaqstan Respýblıkasynyń «Qurmet» ordenimen, QR memlekettik nagradasy «Erligi úshin» medalimen jáne «Oblysqa sińirgen eńbegi úshin» belgisimen, OQO ákiminiń Gramotasy jáne Alys hatymen marapattady. Sonymen qatar, 10 azamat QR Qorǵanys mınıstriniń «Minsiz qyzmet úshin» medalimen nagradtaldy.
Konserttik baǵdarlamamen jalǵasyn tapqan merekelik sharada «Máńgilik el tuǵyry – Qýatty Armııa» teatrlandyrylǵan kórinisi qoıylyp, patrıottyq ánder shyrqaldy. Sonymen qatar, merekelik basqosýda ońtústikqazaqstandyqtar tikeleı translıasııa arqyly Astana qalasynda ótken QR Qarýly Kúshteriniń 25 jyldyǵyna arnalǵan áskerı paradty tamashalady.
Aıta keteıik, elordanyń Qazaq eli alańynda ótken sherýde 5000-nan astam áskerı qyzmetshiler saltanatty marshpen júrip ótse, 400-ge jýyq áskerı tehnıka men zamanaýı qarý-jaraq túrleri jurtshylyq nazaryna usynyldy. Al 70-ke jýyq áýe tehnıkasy Qazaqstannyń avıasııalyq áleýeti men jaýyngerlik ázirligin pash etti.
Foto: Samat Myrzalıev.
