Kemelerdiń júrý kestesi – saǵat 12:00-den 21:00-ge deıin. Baǵasy da ózgergen joq: eresekter úshin 1000 teńge, jeti jastan asqan balalar úshin – 500 teńge.
Byltyrǵy maýsymda kásiporyn 20 myńǵa jýyq jolaýshyǵa qyzmet kórsetken. «Esil-Astana» QKQK keme qyzmetiniń basshysy Beıbit Jýmınniń aıtýynsha, túlekter keshi men elorda kúnin merekeleý kezinde jolaýshylar sany artady.
Ústimizdegi jyly qalaǵa týrıster kóp keletindikten alty jolaýshylar kemesi men qosymsha eki kater tartylady.
«Qazirgi kezde ákimdikpen birlesip ózenniń arnasyn tazalaý boıynsha jumystardy júrgizip jatyrmyz. Sý tasqynyna oraı ózendegi sý kóbeıdi, sondyqtan onyń deńgeıin baqylap otyramyz. Búginde tehnıka daıyndalýda – baıap, tazalaýdamyz. Navıgasııa maýsymyn bastar aldynda mindetti túrde tehnıkalyq tekserýden ótip, júzýge ruqsat alamyz. Bul da ózindik tehnıkalyq baıqaý», – dedi Beıbit Jýmın.
Sý kólikteri qubylmaly aýa raıy kezinde jáne qatty jelde ózende júzýdi toqtatady.
Keme qyzmetiniń basshysy qaýipsizdik sharalaryna toqtaldy. Aılaqta jolaýshylardy minýi men túsýin baqylaıtyn ınspektorlar kezekshilik etedi. Kemede tártipti kapıtan men eki motorıst-mehanık baqylaıdy. Sonymen qatar elordanyń qutqarý qyzmeti de jumys isteıdi.
Kemelerde qutqarý dóńgelekteri bar, suraǵan jolaýshylarǵa qutqarý jıletteri beriledi.
Navıgasııa maýsymy qazan aıyna deıin jalǵasady.
