«Qurmetti dostar! Qaıta uıymdastyrý jumystaryna baılanysty QR Investısııalar jáne damý mınıstrligi týrızm ındýstrııasy departamenti dırektory qyzmetinen ketip baramyn, biraq týrızm máńgi júregimde qalady», - dep jazdy Iǵalı óziniń Facebook-tegi jeke paraqshasynda.
Eske sala keteıik, Marat Iǵalı QR Investısııalar jáne damý mınıstrligi týrızm ındýstrııasy departamenti dırektory qyzmetine 2016 jyly 23 qyrkúıekte taǵaıyndalǵan bolatyn. Osy aralyqta týrızm salasynda eleýli jumystar atqaryldy - 2016 jyldyń jeltoqsan aıynda Iran men Qazaqstan ózara toptyq týrıstik qatynasty jeńildetilgen rejımi týraly kelisimge qol qoıdy.
2017 jyldyń qańtar aıynda QR IDM ekonomıkalyq jáne saıası turǵyda turaqty memleketter men EYDU-ǵa múshe elder úshin vızasyz rejım engizgen bolatyn.
Bunyń aldynda M. Iǵalı elimizdiń ózge de vedomstvolarynda túrli laýazymdardy atqarǵan bolatyn. Sonyń ishinde Aqtóbe oblysy ákimdiginiń apparat basshysy, QR Qorshaǵan ortany qorǵaý mınıstriniń keńesshisi, QR Indýstrııa jáne jańa texnologııalar mınıstrligi Týrızm ındýstrııasy komıtetiniń basshysy jáne QR Premer-Mınıstriniń orynbasarynyń keńesshisi bolyp jumys istedi.
