Ant

Egemen elimizdiń irgesiniń berik bolýy úshin onyń Qarýly Kúshteri qyzmetiniń erekshe oryn alatynyn aıtyp jatýdyń ózi artyq bolar. Sar­darlarymyz ben sarbazdary­myz­dyń bul turǵyda atqaryp jatqan jumys­tary jaıly baspasóz betteri de óz oryndaryn usynýda. О́ıtkeni, el qor­ǵandarynyń Otan tynysh­ty­ǵyn kúzetýdegi abyroıly eńbekterin qa­laı madaqtasaq ta jarasady. Astana mańynda ornalasqan 68665 áskerı bóliminde Qazaq gýmanıtarlyq zań ýnıversıtetiniń áskerı kafedra­sy­nyń elýge tarta tálimgerleri Otan aldyndaǵy qyzmetin adal atqarý úshin saltanatty túrde ant berdi. Atalǵan áskerı bólim sarbazdary­nyń arnaıy daıyndalǵan kórinis­teri­nen keıin bolashaq kishi sardarlar (serjant) arnaıy sapqa turyp, ant berý rásimin bastap ketti. Sal­tanatty sharany kýrsanttardyń ata-analary men týǵan-týystary kelip tamashalady. – Árbir er azamat áskerı bory­shyn ótep, óz Otanyn qorǵaý kerek. Sondyqtan da ol áskerı daıyndyqtan ótýi lázim. Sol daıyndyqtan ótý úshin aldymen ant beredi. Búgingi bizdiń is-sharamyz osyǵan saıyp otyr. Stýdentterimiz birinshi kýrstyń ekinshi semestrinen bastap úshinshi kýrstyń sońyna deıin áskerı daıyndyqpen oqıdy. Budan keıin bulardyń barly­ǵy Qorǵanys mınıstriniń buıryǵy­men zapastaǵy serjant ataǵyn alady. Bıyl el táýelsizdiginiń 20 jyldyq merekesimen tuspa-tus kelgeni – bola­shaq sardarlar bolatyn stýdent­teri­miz­diń táýel­sizdikpen tól qurdas bo­lyp otyr­ǵan­dyǵy der edik. Bulardyń bizdegi alǵan bilimi men tálimi erteń ózderine tap­tyrmas qural bolady. Teorııany prak­tıkamen ushtastyryp, osy daıyn­dyqtar barysynda shyny­ǵady. Eń bastysy dala jattyǵýlary men túngi sabaqtarda olar naǵyz ás­kerı ómirge kiredi. Sonymen qatar, qarý-jaraq pen ás­kerı tehnıka­lardy kózben kórip, qol­men ustaıdy. Bul olar úshin barlyǵyn da sarap­tap, kóńilge túıýlerine mol múmkindikter beredi, – deıdi Qazaq gýmanıtarlyq zań ýnı­versıteti áskerı kafedra­sy­nyń bas­tyǵy, zapastaǵy polkovnık Naıman Oqapov. Sondaı-aq otyz bes jyl ǵumy­ryn áskerge arnaǵan qart sardar erteń el qorǵaýǵa bir saty jetpeı turǵan nemeresi Dımashty arnaıy kór­sin dep osy saltanatty sharaǵa alyp kelgendigin  aıtty. Merekelik jıynǵa arnaıy kelgen bolashaq kishi sardar Rústem Qalı­ulynyń ájesi Kúláı Dosmambetova nemeresiniń el ulany bolyp, azamattyq boryshyn óteý aldynda ant bergenine sheksiz qýanyshty ekenin aıta kele, elimizdiń tynyshtyǵy máńgilik bolǵaı degen analyq tilegin jetkizdi. Seksen­niń seńgirine shyq­qan áje tilegin jurt­shy­lyq rızashy­lyqpen qabyl aldy. Erteńgi el bolashaǵy ulandary­myzdyń ataqtaryn abyroımen qor­ǵap, elin qorǵar azamattardyń qata­ryn tolyqtyraryna senim zor. Ant qabyldaý rásimindegi symdaı tar­tyl­­ǵan órenderdiń kózderindegi ush­qyn osyny ańǵartqandaı. Ábdirahman QYDYRBEK. Sýretti túsirgen Orynbaı BALMURAT.