Jańa kásiporyn

Búgingi ǵylym men óndiristiń qatar damýy qaı salanyń bolmasyn básekege qabilettiligin arttyratyny anyq. Mal ónimderiniń sapasy tarazy basyna túsken­dik­ten, sharýalar ozyq tehnologııany paıdalanýǵa batyl bet burǵan. Tórt túlik jáne qus etiniń sapasy men ekologııalyq tazalyǵyna úles qosqan óndiris ornynyń jumysy osylaı alǵa basty deýge bolady. Ile aýdany Boraldaı kenttik okrýginiń óndiristik aımaǵyna ornalasqan «Kormovık – Evrotehnologııa» seriktestigi tórt túlik mal men úı qustaryna qajetti azyqtyq qospa daıyndaýmen aınalysatyn birden-bir kásiporyn sanalady. Jyldyq qýattylyǵy 10 myń tonna. Bul kásip­oryn údemeli ındýstrııalyq-ınnovasııalyq baǵ­dar­­lama aıasynda qulashyn keńge jaıǵan. Qazirdiń ózinde gollandııalyq tehnologııamen jaraq­tan­dy­rylǵan zaýyt ónimderin Jetisý óńiri, Jam­byl, Ońtústik Qazaqstan jáne Shyǵys Qazaqstan ob­lys­­tary­nyń sharýalary tapsyryspen alýda. Daı­yn­dalǵan dárýmender mal men qusqa belgili re­sept­pen daıyndalady. Sodan soń quty ydys­tarǵa, paketterge salynyp, tutynýshyǵa jónel­ti­le­di. Sondaı-aq, jeke tapsyrys berýshilerdiń tilekteri de nazardan tys qalmaıtynyn aıtqan jón. Innovasııalyq tehnologııany engizgen kásip­oryn ónimi elimizdiń qus fabrıkalary, bordaqy­laý alańdary men taýarly-sút fermalarynda úlken suranysqa ıe. Zaýyt árbir aýylsha­rýa­shy­lyq qurylymdaryna ǵylymı negizdelgen azyq daıyndasa, quramajem mıkroelementterge, dárý­men­der­ge baı. Negizinen qospalar mal­dyń kúıin jaqsartady. Atalǵan qos­panyń iri qara men jylqynyń, qaz, úırek, úndik, taýyq, balyqtyń tez je­tilýi men salmaq qosýyna erekshe áseri bar. Al osynda daıyndalǵan ar­naıy qospa buzaý men qulynǵa, qo­zyǵa qajetti analyq sútti almastyra alatynyn da aıtqan jón. Kásiporyndy iske qosýǵa 200 mln. teńgedeı qarjy jumsalypty. Azyq­tyq qospa jasaýǵa shıkizattyń bir bóligi Eýropadan ákelinse, bir bóligi elimizde daıyndalady. Dál osyndaı ónim shyǵaratyn kásiporyn elimizde osy «Kormovık» qana. Sondyqtan ónim ótkizýde esh  kedergi joq, kerisinshe suranys kóp. – Búgingi basqarý júıesi zaýyt ju­my­syn tolyǵymen qadaǵalaýǵa múm­kindik beredi. Jalpy, mundaǵy tehnologııa gollandııalyq ádispen basqa­ry­la­dy. Bári avtomattandyrylǵan. Adam kúshi az jumsalady. Men tehnolog bergen azyqty kompıýterge sala­myn. Arnaıy baǵdarlama barlyq ju­mysty ózi atqaryp shyǵady. Nátı­jesinde biz sapaly ónim alamyz, – deıdi serik­testiktiń óndiris­tik meńgerýshisi Samat Shambaev. Zaýyt ózin jan-jaqqa tanytý úshin 400 tonna ónim shyǵarýdy mejelegen. Al túsken suranysqa qaraı tolyq qýatty­lyq­qa kóshetin kúnder de alys emes. Kúmisjan BAIJAN, Almaty oblysy.