ÁLEM TANYǴAN ÁSEM ShAHAR
Men Shymkent qalasynyń týmasymyn. Biraq, 1994 jyldan beri Los-Anjelos, Nıý-Iork qalalarynda turyp kelemin. Qazaqstanǵa, onyń ishinde Astanaǵa jyl saıyn kelmesem de, kelip-ketip júrgen ýaqyt aralyǵyn uzatqan emespin. Desek te, osy jyldyń ózinde bul meniń Astanaǵa ekinshi ret taban tireýim.
Astanany, Qazaqstandy, Elbasymyzdy búkil dúnıe júzi búginde tolyqtaı tanydy dep aıta alamyn. О́tken jyly Qazaqstannyń tóraǵalyǵymen ótken EQYU, bıylǵy Islam konferensııasy uıymynyń basqosýlary sonyń aıshyqty dáleli. Men kınorejısser retinde Eýropanyń kóptegen elderi men qalalarynda boldym. Alaıda, Astana sııaqty qarqyndy damyp, óziniń bolashaǵy jolynda qulashyn keńge jaıyp kele jatqan birde-bir qalany keziktirgen emespin. Bul rette Astana dúnıe júzi elderine úlgi bolyp, kóshtiń aldynda keledi. Jáne bir eskeretin jáıt, menimen birge Qazaqstan jerine kelip otyrǵan áriptesterim, ári jaqyn dosym Armand Assante, Mıshel Rodrıges sekildi basqa da álem juldyzdarynyń Astana jaıly pikirleri osyndaı. «Qazaqstandy Eýropa elderi bile bermeıdi» degen jańylys pikir bar. Oǵan stereotıp retinde qaraǵan jón. Ondaı pikirlerden boıdy alys ustaıtyn zaman jetti. Astananyń bolashaǵy budan da zor ekenine senimim nyq.
Erkin Iаlgashev, amerıkalyq kınorejısser.
* * *
BAS QALAMNYŃ BOLAShAǴY BAIаNDY
Astana qalasynyń ósip-órkendeýi meniń kóz aldymda ótti. Qyzmet babynda talaı-talaı qalalardyń dámin tattym. Biraq, osy týǵan qalamdaı kórikti de, ystyq qalany kórgen emespin. Biz ózimizdiń jumys babymyzǵa baılanysty sońǵy jyldary Astanada ótip jatqan halyqaralyq iri basqosýlardyń, forýmdardyń uıymdastyrý sharalarynda júrdik. Búkil dúnıe júziniń nazaryn aýdarǵan EQYU sammıti men IYU-ǵa múshe memleketter Syrtqy ister mınıstrleriniń basqosýynda biz qalamyzdyń tynyshtyǵy men tártibin saqtaý maqsatynda erekshe uıymshyldyqpen eńbek ettik.
«Syrt kóz – synshy» demekshi, kelgen qonaqtardyń pikirin tyńdaǵanda, bizdiń bas qalamyzdyń sáýleti men sánine erekshe rızalyqtaryn sezinip, kóńilimiz qýanyshqa keneletin. Tórtkúl dúnıeniń nazaryn aýdarǵan osyndaı halyqaralyq iri sharalarǵa Astana qalasynyń daıyndyǵy erekshe boldy. Azııada oıyndary kezinde de dúnıe júziniń túkpir-túkpirinen jınalǵan qonaqtar osyndaı iri sharaǵa qalanyń erekshe daıyndalǵandyǵyna tánti boldy.
Mine, dástúrli Astana kúni merekesinde qalamyz taǵy da qulpyryp shyǵa keldi. Maǵan Astananyń arhıtektýralyq sáýleti aıryqsha áser etedi. «Han Shatyr», «Báıterek», «Pıramıda» sııaqty álemdik sáýlet óneriniń standarttarymen salynǵan dúnıe júzilik arhıtektýralyq ansamblder qataryna kiretin astanalyq ǵımarattar kórgen jannyń kóńilinen shyǵatyndyǵy daýsyz. Bas qalamnyń bolashaǵy baıandy bolatyny haq.
Janat MAHAMBETOVA, Astana qalasy IID-niń kámelettik jasqa tolmaǵan balalar jónindegi ınspektor.
