Asyq oınaǵan azbaıdy

Tarıhy tereńnen tamyr tar­tatyn ulttyq oıyndarymyz qa­zir­gi tańda ilbip damyp keledi. Jasyratyny joq, oǵan degen suranys kóbine Ulystyń uly kúni naýryz merekesi tustaryn­da ǵana bolyp, ózge ýaqyttarda bir shetke ysyrylyp qala beretindeı kórinetin. Alaıda, keıingi kezderi Astanada osy olqy­lyqtardyń ornyn toltyrýda qa­lalyq týrızm, dene tárbıesi já­ne sport basqarmasy birshama jumystar tyndyrýda. Sonyń biri elordada qala kúni merekesi qurmetine jalaýyn kótergen «Altyn saqa» ulttyq asyq atý oıynynan III qalalyq ashyq týr­nıri der edik. Jasty da, jasamysty da asyq atýdyń eki túri boıynsha jınaǵan bul týrnırdiń ashylý saltanatynda sóz alǵan Týrızm jáne sport mınıstrligi sport ko­mıtetiniń tóraǵasy Elsııar Qana­ǵatov jarysqa qatysýshy­lar men ony uıymdas­tyrý­shy­larǵa sáttilikter tileı kelip, asyq atý oıynyn damytý bú­ginde mınıstrlik tarapynan qol­ǵa alynyp otyrǵandyǵyn aıt­ty. Sondaı-aq ol atalǵan oıyn túrin aldaǵy ýaqytta res­pýblıkalyq deńgeıde ótkizý josparda turǵandyǵyn da nazardan tys qaldyrmady. – Atalmysh jarysqa jyl­daǵy dástúr boıynsha tilek bildirgender sany eki júzden asyp jyǵyldy. Bul, árıne, qala deń­geıinde ótkizilgen shara úshin jaman kórsetkish deı almaımyz. Desek te tól sportymyzdy nasıhattaý qaı kezde de artyqtyq etpeıdi. Ony, sondaı-aq, únemi damytyp otyrý lázim. Jaqynda ǵana elordada ótken Dúnıe júzi qazaqtarynyń kezekti quryl­taıy­na kelgen shet eldik qan­dastarymyz elimiz bekitken ereje boıynsha bul oıyndy damy­tamyz dep jatyr. Mine, bul da óskeleń urpaqtyń atadan balaǵa mıras bolyp qalǵan osynaý murasyn qadirleı bilýde óz septigin tıgizeri sózsiz, – deıdi týr­nırdiń bas tóreshisi, elimizge eń­begi sińgen jattyqtyrýshy Jomart Sabyrjan. Ulttyq oıyndarymyzdyń ishin­­de asa tanymal jáne keń taraǵan túrleriniń biri osy asyq atý oıyny sanalady. Ǵasyrlar boıy halyqtyń zerdesinde saqta­lyp kelgen osy bir ǵazız oıyndy óskeleń urpaqty tárbıeleýdiń quraly retinde tıimdi paıda­lan­ǵannan utarymyz kóp. Asyq oı­naý balanyń jastaıynan júı­ke júıelerin shyńdap, olardy dál­dik­ke, ustamdylyqqa, baısal­dylyqqa tárbıeleıdi. Sondyqtan da qalalyq ashyq týrnır ataýy­men ótkizilgen merekelik jarys­tyń keń qanat jaıýy tóńireginde jasalǵan jumystar qashan da qoldaýǵa laıyq dep aıtýǵa tolyq negiz bar. Ábdirahman QYDYRBEK.