1 mıllıard teńgege tehnıka alyndy

Aýyz sý – ómir, densaýlyq. Ońtústikte 900-den astam aýyldar bar bolsa sonyń 512-sinde aýyz sý máselesi kúrdeli kúıinde qalyp keldi. Qazir aýyldardyń janynan kúrkirep aǵyp jatqan ózender joq. Bolǵan jaǵdaıda da tazartylmaı ishilgen sý qaýipti. Oblystyq ákimdik qudyqtan nemese ta­sy­maldap sý iship otyrǵan aýyldardyń proble­masyn sheship, táýligine 24 saǵat taza sý berýge barsha múmkindikterdi jasap jatyr. Onyń syr­tynda uıyq basqan aryqtardy tazartý, drenaj júıelerin jańartý bar. Munyń bárine tehnıka kerek. Jyl saıynǵy memlekettik sa­typ alýda jeńip alǵan merdiger­lerdiń kóbiniń artynan aryz borap jatady. “Is bitti, qý ketti”. Qazannyń qulaǵyn usta­ǵan­darǵa ustata­tyn­daryn  bylaı qoıǵanda, ózinde qalatyn paı­dany kóbeıtý úshin taza qubyrdyń ornyna burynǵy óndiris oryn­darynan qazylyp al­ynǵan, ishinen jermaı ıisi ańqyǵan, syrtyn tot jegen qubyrlardy salyp berip, sytylyp ketetinder bar. Mun­daı kózboıaý­shylyqtardan qutylýdyń joly – aýdan-qalalardaǵy servıstik ortalyq­tardy kúsheıtip, aýdan, qala ákim­digine qa­rasty memlekettik qazynalyq kásip­oryn­dar­dy arnaıy tehnıkalarmen qamtama­syz etý. Oblystyq ákimdik oblystyq máslı­hat­pen kelise otyryp oblystyq bıýdjetten 954 mln. teńgege 221 dana tehnıka men qon­dyr­ǵy sa­typ alyp, aýdan, qalalardaǵy mekemelerge bólip berdi. Atap aıtsaq, avtokran, traktor-ekskavator, dońǵalaqty traktor, trak­tor tirkemesi, sheberhana avtokóligi, jyljy­maly kompressor, gazben dánekerleý jabdyǵy, metall joný stanogy, sý sorǵysh jáne júk tasý men avtotıegish tehnıkalar servıstik orta­lyq­tardyń bir qolyn eki etti dese de bolady. Tehnıkalar Shymkenttegi Ál-Farabı ala­ńynda memlekettik kommýnaldyq kásiporyn basshylary men tehnıka júrgizýshilerine tabys etildi. – 2009 jyly oblysta 96 kommýnaldyq kásiporyndar boldy, – dedi oblys ákimi As­qar Myrzahmetov. – Olarǵa taldaý júrgizge­nimizde toqsanǵa jýyǵynyń aty bar da zaty joq bo­lyp shyqqandyqtan tarattyq. Ola­r­dyń jyl­dyq tabysy 5-10 mln. teńge bolyp kelgen eken. Ońtaılandyrý, jańa tehnıkala­r­men qamta­ma­syz etý arqyly 500 mln. teńgege tabysqa shyqty. 2010 jyly 47 sý sharýashylyǵyna bıýd­jetten 725 mln. teńge qaralǵan bolsa, ózi­­miz­diń qazynalyq kásip­oryndarymyzdyń ese­­binen 275 mln. teńge únemdeldi. Sondyq­tan, bul baǵyt ózine artylǵan senimdi aqtady. Oblys ákimi osy arnaýly tehnıkalar aýyz sý, aýyldardy gazdandyrý, kanaldardy tazartý sııaqty jumystarda jaqsy jemis beretindigine senetindigin, Táýelsizdiktiń 20 jyldyǵyna arnalǵan tartý ekendigin aıtty. Tusaýkeserde sóz alǵan oblystyq máslı­hattyń depýtaty Amanulla Ramanqulov servıstik ortalyqtardy aýdan bıýdjeti esebinen de qoldaý qajettigine toqtalyp, osy tehnı­kalarǵa qosymsha 4 burǵylaý qondyrǵysy satyp alynǵandyǵyn aıtty. Iаǵnı, qudyq­tardy burǵylaý jekeniń emes, memlekettiń esebinen júrgiziledi. Halyqqa paıdasy úl­ken. Aýdan, qala ákimderiniń atynan 29 teh­nı­kaǵa ıe bolǵan Maqtaaral aýdanynyń ákimi Serik Turbekov oblys ákimdigi men oblystyq máslıhatqa rızashylyǵyn bildirdi. Jańa teh­nıkaǵa ıe bolǵan júrgizýshiler endi kúr­meýli máselelerdi ózimiz sheshe alamyz deıdi. Baqtııar TAIJAN. Ońtústik Qazaqstan oblysy.