Patrıotızm – táýelsizdikti tulǵalandyratyn qasıet

El Táýelsizdiginiń 20 jyldyǵyna oraı Aqtaýda áskerı-patrıottyq klýbtardyń respýblıkalyq sleti oıdaǵydaı ótti. Bilim jáne ǵylym mınıstrligi men respýblıkalyq qosymsha bilim berý oqý-ádistemelik ortalyǵy uıymdastyrýymen dástúrge aınalǵan áskerı-patrıottyq klýbtardyń Respýblıkalyq sleti merekeli jyly ásem Aqtaýda ótti. Táýelsiz Qazaqstannyń bolashaq ıeleriniń bilimdi, batyl da shıraq, densaýlyqtary myqty bolýynyń mańyzy zor. Ondaı azamattardyń Otanǵa, týǵan jerge degen patrıottyq sezimderi de erekshe bolady. Sodan bolar, Aqtaýǵa elimizdiń 13 oblysy men 2 qalasynan 14-15 jastaǵy 200-ge tarta jasóspirim keldi. Olar ásem qalamen tanystyqtan soń slettiń jumysyn «Máńgi alaý» janynda Uly Otan soǵysynda qaza tapqan, qaharman jaýynger bola bilgen atalaryn únsizdikpen eske alýdan bastady. Alty kúnge sozylǵan slette jasóspirimder áskerı óner baıqaýynan soń sýǵa júzýden jarysyp, «Mergen», «Qorǵaný» operasııalarynda ózderiniń mergendikterin, jyldamdyqtary men sheberlikterin kórsetti. Áskerı aǵalarynyń táýir baǵalaryna ıe boldy. Slet qorytyndysynda jalpykomandalyq esep boıynsha Qyzylorda oblysy birinshi orynǵa shyqty. Ekinshi orynǵa Atyraý, úshinshi orynǵa Soltústik Qazaqstan túlekteri ıe bolsa, al mańǵystaýlyqtar tórtinshi orynǵa turaqtady. Jeńimpaz jasóspirimderdiń barlyǵyna da arnaıy syılyqtar tapsyrylyp, maqtaý qaǵazdarymen marapattaldy. Sondaı-aq Mańǵystaýdyń túpqazyǵy – Túpqaraǵan aýdanyna saıahatqa shyǵyp, áskerı kemelerdi tamashalady. Jolaman BOShALAQ, Mańǵystaý oblysy.