"Qurmetti qazaqstandyqtar, otandastar! Ár jyl saıyn mamyrajaı, kúnshýaqty mamyr kúninde biz Uly Jeńis merekesin atap ótemiz. Bul jeńistiń maǵynasy óte úlken. Adamzattyń tarıxynda mundaı surapyl soǵys bolǵan emes. Ondaǵan mıllıon xalyqtyń ómirin alyp ketken, qansha qalalardy kúıretken fashızmge qarsy soǵysta bizdiń babalarymyz úlken jeńiske jetti. Osy jeńistiń arqasynda mynadaı ashyq aspan astynda, beıbitshilikte ómir súrip, balalarymyzdy, urpaǵymyzdy ósirip, memleketimizdi nyǵaıtyp jatyrmyz", - dep atap ótti Memleket basshysy.
Prezıdent elimizde ardagerlerimizdiń qatary kún sanap, sırep bara jatqandyǵyn qynjylyspen atap ótti.
"Otan qorǵaýshylar" alańynda gúl shoǵyn qoıý - qaza tapqan babalarymyzǵa taǵzym, qatary sırep bara jatqan ardagerlerge qurmet. Qazaqstan ol kezde 6 mıllıon xalqy bar memleket edi. Onyń 1,8 mıllıony soǵysqa qatysyp, teń jartysy maıdannan qaıtqan joq. Qazaqstan maıdanda da, tylda da qoldan kelgenshe barlyq kómegin tıgizdi. Sondyqtan elimizdiń búkil ardagerlerin, xalqyn Uly Jeńis merekesimen quttyqtap, elimiz aman, jurtymyz tynysh bolsyn, aspanymyz ár ýaqytta ashyq bolsyn deımiz!", - dedi Elbasy.
Eske sala keteıik, búgin Nursultan Nazarbaev Ekinshi dúnıejúzilik soǵysyndaǵy Jeńistiń 72 jyldyǵyna oraı Astanadaǵy "Otan qorǵaýshylar" monýmentine gúl shoqtaryn qoıǵan bolatyn.
Saltanatty sharaǵa UOS ardagerleri, QR Prezıdenti Ákimshiliginiń, QR Úkimetiniń, QR Parlamentiniń, ortalyq memlekettik organdarynyń, dıplomatııalyq korpýstardyń ókilderi jáne qala jurtshylyǵy qatysty.
Sońǵy derekter boıynsha Qazaqstannan maıdanǵa attanǵan 1 mln 200 myń jaýyngerdiń 600 myńy úılerine qaıtyp oralmady. Jalpy, burynǵy Keńes Odaǵynyń 27 mıllıonǵa jýyq adamyn jalmaǵan qandy qyrǵynda elimizden attanǵan 500-den astam jaýynger 1934 jyly bekitilgen eń joǵarǵy Keńes Odaǵynyń Batyry atanǵan bolatyn, onyń 100-den astamy - qazaqtar. Sonymen qatar 142 qazaqstandyq Dańq ordeniniń tolyq ıegeri atansa, Keńes Odaǵynyń orden, medaldarymen marapattalǵan qazaqstandyqtar sany 100 myńǵa jýyqtaıdy. Soǵys ardagerleriniń qatary jyl ótken saıyn sırep barady. Búginde Qazaqstanda Uly Otan soǵysynyń 2 myńǵa jýyq ardageri turady.
