Konsorsıýmnan kúter úmit kóp

Qazaq ulttyq agrarlyq ýnıversıtetinde «UBH «Qaz­Agro» AQ-tyń qatysýymen «Agrarlyq ınnovasııa men óndiristi naryq arqyly – qýatty Qazaqstandy birge qalaımyz» atty eki kúndik respýblıkalyq ǵylymı-tá­ji­rı­belik semınar ótti. Aýyl sharýashylyǵy mınıst­r­li­giniń mamandary, elimizdiń 14 aımaǵynan sharýa qo­ja­lyqtary men fermerler, áleýmettik kásipkerlik korporasııa ókilderi qatysqan jıynda ÚIIDB-ni júzege asyrý jáne Astana men Almaty qalalarynda azyq-túlik beldeýin qalyptastyrý sheńberindegi kókeıkesti máseleler qa­ralyp, atalǵan joo-men Agrarlyq ǵylymı-óndiristik konsorsıým qurý jóninde memorandýmǵa qol qoıdy. Aýyl sharýashylyǵy salasyna joǵary bilimdi ári bilikti mamandar daıarlap, agrarlyq ónerkásip keshenindegi memlekettik ındýs­trııalyq-ınnovasııalyq damý baǵ­darlamasynyń talap turǵysynan is júzine asýyna asa joǵary jaýapkershilikpen atsalysyp kele jatqan agrarlyq ýnıversıtet ǵa­lymdarynyń aıtýynsha, bul qa­dam aýylsharýashylyq ónimderin sapaly daıyndap, áleýetin art­tyrýda agrarlyq óndiriske yqpal etpek. Memorandým aıasynda taraptar otandyq agroónerkásip kesheninde ǵylymı óndiristik konsorsıým qurýǵa nıetti bolyp, UAÝ-da bas qosýynyń sebebi – ýnıversıtet qabyrǵasynda Qazaq­stan-japon ınnovasııalyq orta­lyǵy, 6 ǵylymı-zertteý ınstı­tý­ty jáne 31 izdenýshiler zert­ha­na­sy jumys istep, mundaǵy ǵa­lym­dar sońǵy jyldary aýyl sha­rýashylyǵy salasynda kóptegen ınnovasııalyq jobalar usyný­yn­da. Osy rette semınar barysyn­da atalmysh oqý ornyndaǵy qazaq-japon ınnovasııalyq ortalyǵyn­da birlesip júzege asyrǵan jáne josparlanyp otyrǵan jobalar­dyń, ǵylymı-zertteý ortalyq­ta­ry men ınnovasııalyq zerthana­lar­dyń, ýnıversıtet ǵalymdary­nyń bitken ǵylymı jumystary­nyń tusaýkeseri ótti. Onyń ús­ti­ne, azyq-túlik qaýipsizdigin saq­taý­da el Úkimeti de kóptegen tyń jobalardy jyl sanap iske asy­rýda. Sondaı-aq munda otandyq aýylsharýashylyq ónimderin tek ishki rynokqa táýeldi etpeı, syrt­qa shyǵarýǵa da áleýetimiz jetetini aıtyldy. Jıynda QazUAÝ rektory Tilektes Esbolov elimizdegi azyq-túlik qaýipsizdigin qamtamasyz etý­de agrarlyq ınnovasııa men óndiristi rynok arqyly qa­lyp­tas­tyryp, onyń máselelerin sheshýde bar múmkindikterdi biriktirý qajettigin atap ótti. Al «Qaz­Agro» UBH» AQ basqarma tóraǵa­sy­nyń orynbasary Qaırat Aı­tý­ǵanov QazUAÝ-dyń ǵalymdary, ÁKK jáne «QazAgro» arasyndaǵy ınnovasııalyq zertteýler júrgi­zip, ony iske asyrýdaǵy áriptestik qarym-qatynas ózekti másele bo­lyp sanalatynyn, sondaı-aq bo­la­shaqta aýyl sharýashylyǵy sa­la­synda atqarylar ister kóp ekenin alǵa tartty. «Bizdiń boljam boıynsha, tek iri qara etin eks­port­taýdy 2016 jyly 60 myń tonnaǵa, 2020 jyly 200 myń tonnaǵa jetkizýdi kózdep otyr­myz. Qazirdiń ózinde memleket birte-birte jaqsy kórsetkishterge qol jetkize bastady. Osynyń bar­lyǵy búgingi aýyl sharýashy­ly­ǵyndaǵy ǵylym men tereń bilimniń jemisi, – dedi ol. Semınardyń ekinshi kúni «Aý­yl sharýashylyǵy óndirisindegi agrarlyq ǵylymnyń jetistigi» atty dóńgelek ústel ótip, onda ǵylym men óndiristegi tıimdi is-qımyldyń, ekonomıkadaǵy agrar­lyq salaǵa degen qoǵamdyq qy­zy­ǵýshylyqty arttyrý, respýblı­ka­nyń agroónerkásip keshenindegi jo­balardyń damýyna dem berý máseleleri de tarazy talqysyna salyndy. Gúlzeınep SÁDIRQYZY.