Germanııa Eýropany súırep shyǵa ala ma?
Shamamen 260 mıllıard eýrodaı qarjy jumsalǵan Grekııa ekonomıkasyn qutqarý jónindegi operasııanyń bar bolǵany Eýropada jalǵasyp jatqan daǵdarystyń jekelegen kórinisi ǵana bolýy múmkin.
Kelesi kezekte Irlandııa nemese Portýgalııa sııaqty shaǵyn elder ǵana emes, sonymen birge Ispanııa, Italııa bálkim, tipti Fransııa sııaqty Eýroodaqtyń iri ekonomıkalarynyń da turýy múmkin. RIA-Novostı agenttigi uıymdastyrǵan Máskeý – Berlın telekópirinde sarapshylar problemany sheshýdiń ámbebap tásilderiniń joq ekenin moıyndady. EO elderi, birinshi kezekte Germanııa Grekııa ekonomıkasyna ústi-ústine aqsha jumsaýda. Sonymen birge Germanııanyń búkil Eýropany súırep shyǵa almaıtyny da belgili bolyp otyr.
Armııa Kaırdiń bas alańyn tazartýda
Eldiń eks-prezıdenti Hosnı Mýbarakqa sot prosesi bastalar aldynda armııa men polısııa qalanyń ortalyq alańyn ereýilshilerden tazartty, dep jazady La Stampa gazeti.
Brondy áskerı avtomobılder men polısııa bólimderi kúsh kórsetý aksııasyn ótkizý barysynda Tahrır alańyn ereýilshilerden bosatty. О́kimettiń kútpegen is-áreketi júzdegen belsendiler tarapynan qatań narazylyq týǵyzyp, olar tártip saqshylaryna tas atqylady, dep jazady joǵaryda atalǵan basylym. Operasııa barysynda áskerıler aspanǵa oq atyp, polısııa bolsa, qarsylyq bildirgenderge rezeńke dúre qoldanyp, qurylǵan shatyrlardy qulatyp tastaǵan.
Atom elektr stansalary jabylmaqshy
Germanııa prezıdenti Krıstıan Výlf elde 2022 jylǵa qaraı barlyq AES-terdiń jumys isteýin toqtatatyndyǵy týraly zańdy bekitti.
Memleket basshysy ákimshiliginiń habarlaýynsha, prezıdent zań jobasymen muqııat tanysyp, onyń eldiń konstıtýsııasyna qaıshy kelmeıtinine kóz jetkizgen. Zań taıaý kúnderi kúshine enýge tıis. Ol 1980 jylǵa deıin salynǵan 8 AES-ti shuǵyl túrde jabýdy qarastyrady. Qalǵan 9 reaktor 2015 jyldan bastap 2022 jylǵa deıin birtindep jabylatyn bolady. Maýsym-shilde aılarynda zań jobasyn GFR parlamentiniń eki palatasy da bekitken bolatyn.
Bosqyndar búlinshilik uıymdastyrdy
Afrıkadan shyqqan bosqyndar osy elde turýǵa qajetti qujattardyń tym baıaý beriletinine narazylyq retinde Italııada kóterilis uıymdastyrdy.
Barı qalasynda burq ete qalǵan tártipsizdikterge bosqyndarǵa arnalǵan ortalyqta elde turý úshin qujat alý kezegin kútip jatqan ımmıgranttar túgelge derlik qatysqan kórinedi. Júzdegen adam qala syrtyndaǵy aınalma jolǵa shyǵyp, avtokólikter qozǵalysyn tolyqtaı jaýyp tastaǵan. Mıgranttar avtomobıl dońǵalaqtaryn, qoqys salatyn jáshikterdi órtegen. Kóterilisshiler qalaǵa alǵash kelgen polısııa otrıadyna tas laqtyryp, odan keıin kelgenderdi shabýylmen basyp alyp, eki áıeldi kepildikke alǵan kórinedi.
Fransııa lıvııalyq oppozısııany qarjylandyrýda
Parıj Mýamar Kaddafı men onyń aınalasyndaǵylardyń tyıym salynǵan esep-shotyndaǵy 259 mıllıon dollardy Lıvııa oppozısııasyna bergen.
Fransııa SIM ókilderi aqsha gýmanıtarlyq muqtajdarǵa jumsalady degendi aıtýda. Degenmen batystyq sarapshylar qarjynyń bir bóliginiń qarý-jaraqqa jumsalatynyn da joqqa shyǵarmaı otyr. О́kinishke qaraı, musylmandar úshin qasıetti sanalatyn Ramazan aıynyń basynda da Taıaý Shyǵysta tynyshtyq ornaı qoıǵan joq. Jaqynda Kaddafıge jaqtas áskerı bólimder Djosh eldi mekenin oppozısıonerlerden keri qaıtaryp alǵan.
Bishkek Manas atana ma?
Qyrǵyzstanda eldiń astanasy Bishkekti Manas dep ataýǵa qoldaý kórsetý jóninen qol jınaý naýqany bastaldy.
«Jıvı Kyrgyzstan» partııasynyń jetekshisi Toktoım Ýmetalıevtiń habarlaýynsha, 1 qyrkúıekke deıin 10 myń qol jınaý josparlanyp otyr. Qala 1991 jyldan beri Bishkek degen ataýǵa ıe. Degenmen, áýe dıspetcherleri áýejaıdyń resmı ataýynyń Manas ekenine qaramastan, áli kúnge deıin tıisinshe FRU kodyn paıdalanyp keledi. Sol sııaqty Qyrǵyzstandaǵy amerıkalyq áskerı baza da Manas dep atalady.
Kelimsekter orys tilin bilýi tıis
Reseıge keletin sheteldik jumysshylar orys tilin biletindigin dáleldeıtin emtıhan tapsyrýy tıis.
Federaldyq mıgrasııalyq qyzmet basshysy Konstantın Romodanovskıı osyndaı bastama kóterdi. Ol mundaı qadamnyń qajettiligin birneshe sebeptermen túsindiredi. Birinshiden, ol gastarbaıterlerdiń ózderin aldanyp qalýdan qorǵaý úshin qajet. Ekinshiden, áleýmettik turaqtylyq jaıyn da oılaǵan jón. О́ıtkeni, «óz» jumys oryndarynda oryssha bilmeıtin bógde adamdardy kórý jergilikti jumyssyzdarǵa óte jaǵymsyz áser etpek.
Telefondardy tyńdaýǵa ruqsat etiledi
Chehııada jergilikti BAQ-tarǵa saıasatkerlerdiń telefondaryn jasyryn tyńdaý arqyly alynǵan aqparatty jarııalaýǵa ruqsat beretin senzýra týraly zańǵa engizilgen jańa túzetýler kúshine endi.
Biraq, zańgerlerdiń atap kórsetýinshe, tek «qoǵam múddesine qyzmet etetin» málimetterdi ǵana jarııalaýǵa bolady. Máselen, kez kelgen jolmen alynǵan sybaılas jemqorlyq jáne basqa da qylmystar týraly aqparatty jarııalaýǵa ruqsat etiledi. Tek osyndaı jaǵdaıda ǵana jýrnalısterdiń «qupııa aqparatty taratty» degen jazalaýlardan qaýiptenbeýine bolady.
Internet materıaldary negizinde ázirlendi.
