Úmitkerlerdiń arasynda bolgarlyq Krıstıan Kostov ta bar. Jas ánshiniń baıqaýǵa ázirligin bilmek maqsatynda habarlasqan bolatynbyz. Krıstıan ýaqytynyń óte tyǵyz ekenine qaramastan, bizdiń saýalymyzǵa jaýap berýge tyrysty.
– 2015 jyly Bolgarııada ótken X FACTOR baıqaýynda ekinshi oryn alǵan edim. Osy sebepti de tóreshiler ESC 2017 konkýrsyna qatysýymdy qup kórdi. Bolgar Ulttyq televıdenıesi «Eurovision-2017» baıqaýyna irikteý jarııalap, úmitker retinde tanystyryldym. Búginde basym kópshilik óziniń bilgenin aıtyp, bilmegenimdi úıretip, kómektesip jatyr. Jastyǵym meniń – basty kózirim. Degenmen «saǵan áli tájirıbe kerek» deıtinder de joq emes,– deıdi Krıstıan.
Krıstıan Kostov 2000 jyly Máskeý qalasynda dúnıege kelgen. Kishkentaıynan darynymen kózge túsken balaqaıdy ata-anasy Máskeýdegi ataqty «Neposedy» balalar ansambline oqýǵa beredi. 2012 jyly «Detskaıa Novaıa Volna» halyqaralyq jasóspirimder baıqaýyna qatysýy onyń óner jolyndaǵy juldyzyn jarqyrata tústi. Dál osy jyly Lına Arıfýlınanyń «Shkola mýzykı» balalar televızııalyq jobasyna shaqyrtý alǵan ol, baıqaýda Batyrhan Shúkenovpen birge óner kórsetip, kópshilik kózaıymyna aınaldy. Sol kezde onyń jasy nebári on eki jasta edi.
Otbasy týraly, anasynyń qazaq qyzy ekendigin estigenimizdi aıtyp, jón-jobasyn suradyq.
– Iá, meniń anam Záýresh qazaq qyzy. Ákem men anam Keńes Odaǵy kezinde Máskeýde ınstıtýtta oqyp júrgende tanysqan eken. Anam ákemdi bir kórgennen unatyp qalǵandyǵyn aıtyp otyrady. Ákem Konstantın bolsa qazaqstandyq arýdyń júregin jaýlap alǵanyna áli kúnge sene alar emes, – dep kúledi Krıstıan.
Osyndaıda «jigittiń jaqsy bolmaǵy – naǵashydan» degen maqaldyń beker aıtylmaǵanyn túsinesiń. Ony «óner men ónegeni úıretken atam men ájem» dep Krıstıannyń ózi de qýattaıdy.
– Boıymdaǵy óner atamnan berilgen dep aıtsam artyq aıtpaǵan bolar edim. Sizder meniń Seıfolla atamdy kórseńizder ǵoı, júrgen jeri dýman, kez kelgen otyrystyń juldyzyna aınalady. Jalpy, biz otbasymyzben ónerge jaqynbyz. Anam men tátem ekeýi karaokeniń hanshaıymdary. Meniń kishi baýyrlarym – Arman men Sofııa Máskeýdegi ataqty V.S. Loktev ansambliniń horynda óner kórsetedi, – dep aqtaryla sóıledi.
Krıstıan Bostondaǵy Berklı mýzykalyq kolledjine oqýǵa qabyldanǵan. «Eurovision» baıqaýyna qatysýy sebepti oqýǵa kelesi jyldan bastap tolyq kirispek. Shyǵarmashylyǵy týraly sóz bolǵan tusta, amerıkalyq ánshi Brýno Mars pen brıtandyq Ed Shırannyń ónerin únemi nazarda ustaıtyndyǵyn aıtady. Ol Dımash Qudaıbergenniń de esimimen tanys bolyp shyqty. «Dımashtyń tehnıkalyq bazasy myqty ári mańdaıy jarqyraǵan tenor» dep baǵalaǵan Krıstıan ánshiniń Fransııadaǵy tabysy úshin erekshe qýanypty. Al ájesi men atasy týraly aıtqan bir aýyz lepesinen jıenniń naǵashy jurtyna degen iltıpaty men súıispenshiligin sezindik.
– О́kinishke qaraı, Qazaqstanǵa barmaǵaly kóp boldy. Biraq týystarymyz Máskeýge jıi keletindikten, olar bizben birge turady dep aıtsam da bolady. Ájem meni besik jyrymen ósirdi. Al atam maǵan erteli-kesh tarıh pen geografııa pánderin oqytty. Ol álem kartasy men astanalaryn kózin jumyp turyp jatqa soǵady. Olar maǵan jaqyndarymdy súıýdi, jaqsy kórýdi úıretti,– deıdi.
El gazeti «Egemen Qazaqstan» atynan habarlasyp jatqanymyzǵa alǵysyn bildirgen Krıstıan basylymǵa óziniń tilektes ekenin jetkizdi:
«Habardarmyn, birer jyldan keıin ǵasyrlyq mereıtoıyn toılaıtyn irgeli basylym ǵoı. Jýrnalıstıkanyń ozyq úlgisin kórsetip kele jatqan gazet ujymy men basylym oqyrmandaryna barlyq jaqsylyq ataýlyny tileımin».
Erke kúnniń qalyqtaǵan aq qusyndaı bolǵan órimdeı ónerpaz Krıstıan Kostov «Beautiful mess» ánimen 11 mamyr kúni ekinshi jartylaı fınalda óner kórsetpek. Júrek qylyn shertetin móldir de tunyq daýysymen án tolqynyna ózgeshe lep ákelgen naǵashysyna tartqan jıenniń án álemindegi dúbiri túgesilmesin dep tileıik!
Aıa О́MIRTAI,
«Egemen Qazaqstan»
