Aýyl tirligin túzedi

Elbasynyń jyl saıynǵy jol­daý­laryn toǵyz joldyń torabyna or­na­lasqan qaraoılyqtar erekshe yntamen qabyldaıdy. Bıylǵy qundy qujatta eldi mekenderdi áleýmettik jańǵyrtý máselelerine nazar aýdarylǵany belgili. Osy oraıda olar jumyspen qamtý­dyń jańa strategııasyn, turǵyn úı-kommýnaldyq sharýashylyqty, halyq­ty sapaly aýyz sýmen qamtý jaıy naqtylanǵanyn bilgende shyn qýanǵan eken. Bul tegin bolmapty. Jaǵymdy jańalyq qatarynda Ile aýdany Qaraoı aýylynda 50 jyldan beri jóndeý kór­megen sý júıeleri jańartylyp, aýyz sý máselesi tolyq sheshimin taba­tyn­dyǵy da bar. – Elimizde turǵyn úı-kommýnaldyq sharýashylyǵyn modernızasııalaýda keń kólemdi jumystar bastalǵany belgili. Baǵdarlama óńirde de qolǵa alyndy. Buǵan deıin aýyl turǵyndary ınvestısııa kútpeı-aq arnaıy jospar jasap, jumys júrgizgen bolatyn. Qaraoılyqtar óz kúshterimen aýyldyń turǵyn úı-kommýnaldyq salasyn jetildirý maqsatynda jańa jobany iske asyrýdy bastap ketti, – deıdi aýyldyq okrýg ákimi Vıktor Porotıkov. Ári-beri ótken saıyn osy aýyldaǵy jumystyń júıeliligi nazarǵa birden ilinedi. Ortalyqtandyrylǵan gaz jú­ıe­si tartylyp, jaryqtandyrylǵan. Asfalt tóselgen. Jasyl jelekpen kómkerilgen kósheleri aýyldyń kórkin asha túsýde. Halyqtyń tirligi de túzel­gen. Osy mekendegi kommýnaldyq má­se­lelerdi sheshýmen qurylǵanyna 15 jyl bolǵan «Qaraoı sý» óndiristik kooperatıvi aınalysýda. Osylaısha kooperatıv osyndaǵy strategııalyq ma­ńyz­dy nysan – sýmen qamtýdy tolyq­taı nazarǵa alǵan. Búginde eldi meken turǵyndaryn sýmen qamtamasyz etýde 4 uńǵyma jumys istese, jaqyn arada taǵy bireýin iske qosý úshin jumys qarbalas júrgizilýde. Aýyl keńeıip, jańa úıler saly­nyp, jańa kósheler boı kóterip jatyr. Halyq sanynyń úzdiksiz ósýine oraı mem­leketten 380 mln. teńge qarjy bóli­nip, eki jyldan beri jańa skvajınalar iske qosylyp, baǵdarlama ba­ıyp­ty júzege asýda. Endi az kúnde sý qubyry iske qosylady, deıdi koope­ra­tıv­tiń bas ınjeneri Ernazar Jálim­bekov. Jaqsy ómir, jaıly mekendi qala­ǵan halyqqa bılik te osylaısha jana­shyrlyq kórsetýde. Aýyl ákimi, belsendiler birlesip, aımaqtyq modernıza­sııa­laý jobasyn júzege asyrýǵa osy­laı kirisip, atqarylatyn jumys jospary da qurylǵan. Búgingi kúni Qaraoı aýyl­dyq okrýginde jańartý jumystary jedel júrgizilip, jyl saıyn 600 metr sý júıesin aýystyrý kózdelse, bólingen qarjy tıimdi paı­dalanylýda. Tozyǵy jetken, jańartýdy qajet etetin 27 shaqyrym sý joly bar. Mine, bıylǵy jyly sý júıelerin qalpyna keltirý bastalsa, 12 shaqyrymǵa jýyq sý qubyrlary aýystyrylady. Aýyz sýmen qatar sharýalardyń egis­tik alqaptaryna sý jetkizýge de nazar aýdarylǵan. Sýarmaly egistikterdi úzdiksiz sýmen qamtamasyz etý úshin bıyl aryq qazyldy. Kúzdik jáne jazdyq daqyldar jaıqalyp tur. Buǵan sharýalar da rıza. Jańa kanaldyń qu­ry­lys jumystary da qarqyndy júrip jatyr. Kúmisjan BAIJAN, Almaty oblysy.