Qazaqstandyq azamatqa qol ushyn berýde

Keshe Syrtqy ister mınıstrliginde atalǵan vedomstvonyń resmı ókili Asqar Abdrahmanov jýrnalıster úshin kezekti brıfıng ótkizdi. Brıfıng barysynda A.Abdrahmanov 12 tamyz kúni Astanada Ujymdyq qaýipsizdik sharty uıymyna múshe memleketter basshylarynyń beıresmı kezdesýi ótetinin málimdedi. «Kezdesýge qatysýshylar halyqara­lyq ahýal men uıymnyń jaýapkershiligindegi aımaqta saıası turaqtylyqty saqtaýdyń joldary jóninde pikir alma­sady. Kún tártibinde Soltústik Afrıka jáne Taıaý Shyǵystaǵy jaǵdaıdyń damýyn qosa alǵanda, ǵalamdyq jáne aı­maqtyq qaýip­sizdik máseleleri qaralady», – dedi ol. Sonymen qatar, resmı ókildiń sózine qaraǵanda, uıymǵa tóraǵalyqty atqarý­shy Belarýs tarabynyń qaýymdastyqtyń basym baǵyttary boıynsha kótergen bastamalarynyń júzege asyrylý barysy talqylanbaq. Budan keıingi kezekte resmı ókil pav­lodarlyq stýdent qyzdyń Ame­rıkadaǵy gospıtaldardyń birinde es-tússiz jat­qan­dyǵyna toqtalyp ótti. Onyń aıtýyn­sha, A.Ahmetova ózi jumys isteıtin qonaqúıdiń haýyzynda belgisiz jaǵdaıda es-túsinen aıyrylǵan kúıinde tabylǵan. Polısııa qyzmetkerleri kelip jetkenshe, ol sýdan shyǵarylǵan. «Bizdiń dıplomat­tardyń málimetteri boıynsha, A.Ahmetova óte aýyr jaǵ­daıda es-tússiz bolǵan», – dep atap ótti resmı ókil. Elimizdiń Syrtqy ister mınıstrligi Aınurdyń apaıynyń shuǵyl arada AQSh-qa ushyp barýy úshin vıza alýǵa járdem bergen eken. Qazirgi ýaqytta ol Amerıkada. Sonymen qatar elimizdiń Nıý-Iorktegi Bas konsýldyǵy da oǵan qajetti qoldaý kórsetip otyrǵan kórinedi. A.Abdrahmanov sonymen qatar, Qytaıda motosıkldiń mas júrgizýshisin qaǵyp óltirgen qazaqstandyq jóninde de málimet berdi. Tótenshe oqıǵa Qytaıda, Qotalǵash eldi mekenine taıaý jerde oryn alǵan. Qaza tapqan qytaılyq azamattyń qan quramynan ishimdiktiń belgileri ta­bylǵan. «Jol-kólik oqıǵasy saldarynan qytaı azamaty qaza tapty. El zańnamasyna sáıkes, avtobýs júrgizýshisine qatysty tergeý amaldary júrgizilýde, ol áli aıaqtalǵan joq», – dedi resmı ókil. Sonymen qatar, A.Abdrahmanov eli­mizdiń azamatynan Qytaıdyń quqyq qorǵaý organdary isti jabý úshin iri kólemde aqsha talap etti degen aqparatty joqqa shyǵardy. «Bul oraıda áńgime qaza bolǵan azamattyń otbasyna ótemaqy tóleý jaıynda bolyp otyr», – dedi ol. «Egemen-aqparat».