Qulager – qazaq rýhynyń qanaty

Kókshetaý jurtshylyǵy sha­Har­dyń kireberis qaqpasynda kermaraldaı kerilgen ataqty Qulager eskertkishiniń ashylý saltanatyna qatysyp, júrekjardy múbárák tilekterimen bólisti. – Halqymyzdyń tarıhy men dala mádenıetiniń ajyramas bóli­gi sanalatyn Qulager beınesi biz úshin asa qymbat, – dedi oblys ákimi Sergeı Dıachenko quttyqtaý sózin­de. – Qasıetti Kókshe jerinde Aqan seriniń áni, Qulagerdiń izi qal­ǵan. Ol – qalyń qazaqtyń ar­ǵy­maǵy, barshamyzdyń rýh qa­na­ty­myz. Ásem bezendirilgen eskertkish halyqtyń, jastardyń súıik­ti ornyna aınalyp, el saltanaty­nyń, qyzyq-qýanyshymyzdyń baı­­raǵyndaı jelbireıdi. Ushqyr­lyq­tyń, sulýlyq pen tektiliktiń sım­voly sanalatyn qymbat jádiger el rýhynyń beriktigin de aıǵaqtaıdy. Mine, aqjaıma da aǵytylyp tústi. Bıiktegi 8,5 metrlik qus­qa­natty Qulager Saryarqanyń kerimsal samalymen ekpindep, ushyp ketkeli tur. Júrek jelpinisindegi tulparymyzdyń jer jarǵan dań­qy men qıyn taǵdyrynyń tálim­derin túıip ósken jasampaz hal­qy­myz da jarqyn bolashaǵyna samǵaı túskendeı tátti kúı keshti. Osyndaı tolǵanys­ty sátte Qazaq eli ult­tyq at sporty túr­leri assosıasııa­sy­nyń vıse-prezıdenti, byltyr Kók­shetaý-Astana avto­ba­nynyń boıynda Qulagerge ornatyl­ǵan eskertkish ıdeıa­sy­nyń avtory ári uıymdastyrýshysy Sádibek Túgel oblys ákiminiń ıyǵyna shapan japty. Kókshe­niń qadirli aqsa­qal­dary Búrkitbaı Ba­tyr­hanov, Qasqyr­baı Ábýov, Moıseı Chjen el qýanyshyna ortaq­ta­syp, bata­la­ryn ber­di. Búgin­gi­niń serisi atanǵan Iran Tasqara aǵamyz Aqannyń «Qu­­­lagerin» terbetip, jurtshy­lyq­ty teńseltip tastady. Alaqaı shashý shashylyp, telegeı án-kúı tógildi. Dál osy kúni des bergendeı qala irgesindegi ıppodromda ult­tyq sport túrleri – kókpardan, qyz qýý men teńge alýdan, aýda­rys­paqtan Qazaq eli Táýel­siz­di­gi­niń 20 jyldyǵyna arnalǵan 7-shi respýblıkalyq chempıonattyń ja­laýy kóterildi. Dodaly ja­rys­qa barlyq oblystardan, Astana men Almaty qalalarynan 300-ge jýyq sportshy qatysýda. Kókshe jerin bes kún boıy dýmanǵa bó­leı­tin jarystyń alǵashqy kúninde kókparshylar baq synasty. Baqbergen AMALBEK, Aqmola oblysy.     Sýretti túsirgen  Tólegen Qosshyǵulov.