Qaıta úmittendirgen qazaq boksy

Koreıanyń Inchhon qalasynda bokstan Azııa chempıonaty týyn tú­sir­di. Aıtýly dodaǵy qazaqtyń byl­ǵary qolǵap sheberleri de bar­ǵan. Aqjoltaı aǵaıyn! Eki jigit altyn­nan alqa taǵynyp, taǵy eki azamat kúmisti kúlimdep alyp, bir sportshy qola medalmen elge oraldy. Jasy­ratyny joq, birazdan beri qurlyq­aralyq básekelerde bá­si­miz tómen bolyp júrgen. Bul joly jelbirep barǵan tý, jelbirep qaıtty. Jartylaı fınalǵa qazaqtyń gúrzi judyryqty bes jigiti joldama alǵan. Olar: Ilııas Súleı­menov, Aıdar Ámirzaqov, Arman Rysbek, Rýstam Sybaev jáne Dosjan Ospanovtar bolatyn. Atalǵan jigitterdiń arasynan Arman Rys­bek qana jeńisti jolyn jalǵaı almaı qaldy. Qalǵany fınalǵa alqynbaı jetti. Sonymen – fınal. Aldymen sharshy alańǵa 52 kılo salmaq boıynsha synǵa túsken Ilııas Súleımenov kóterildi. Onyń qarsylasy qytaılyq Iong Jıang. Birinshi raýndtyń alǵashqy sekónt­terinen bastap Ilııas shabýylǵa bas­ty. Soǵan qaramastan, qaptal­daǵy tóreshiler birinshi raýndty teń dep sanady. Esep – 6:6. Sol sát­ten-aq tóreshilerdiń kimge búıregi bu­ra­tyny anyq boldy. Ekinshi raýndta Ilııastyń ekpini basylyp qaldy. Biraq tóreshiler bizdiń jigitti bir upaımen alǵa shyǵardy. Bir soqyr úmit sol sátte álsiz ǵana tutanǵan. Desek te, jekpe-jektiń sońynda Jıangtyń qoly kókke kóterildi. Sóıtip, Súleımenov kú­mis júldeni qanaǵat tutty. Qazaq jigitteriniń qatysýymen ótken ekinshi kezdesýde de qarsyla­sy­myz qytaılyq boldy. Ol – Lıý Djıang. Bul kezdesýdegi kórinis te alǵash­qydaǵydaı qaıtalandy. Osy aıqasta bizdiń jigit basym boldy. So­laısha, Aıdar Ámirzaqov qazaq qorjynyna alǵashqy altyn júl­deni saldy. Kelesi kezek 69 kılo salmaq boıynsha óner kórsetetin Rýstam Sybaevta. Onyń bul jolǵy qarsy­lasy Qytaıdyń Qashqar aımaǵynan shyqqan azamat. Boıy Rýstamnan uzyn. Sondyqtan araqashyqtyqty alshaq ustap, alystan soqqy jasap júrdi. Sonyń nátıjesinde jeńiske jetti. Rýstam Azııa chempıonatynyń kúmis júldegeri atandy. Asa aýyr salmaqta qytaılyq alyp Jang Jıleıge qarsy Dosjan Ospan shyqty. Júrek jutqan jigit eken. Bul kezdesýde Dosjan jeńdi. 6:4 esebimen qytaılyq qarsylasyn qapyda qaldyrdy. Al fınalda Dosjan ırandyq Májıt Abdol Sepahvandıdi 18:13 esebimen utty. Qyrkúıekte bokstan álem chem­pıonaty ótedi. Onda London Olım­pıadasyna joldama taratylady. Ult­­tyq quramanyń bapkeri Myr­za­ǵalı Aıtjanov birinshi nómirli boks­shylardy jabýdyń astynda bap­tap jatyr qazir. Sondyqtan olar­­dyń birde-bireýin Azııa chem­pıonatyna jibergen joq. Esesine, quramadaǵy ekin­shi nómirli jigit­ter­diń joly ashyldy. Sóıtip, Inchhonda bizdiń qosal­qy quram óner kórsetti. Nátı­jesi joǵarydaǵydaı. Bes azamaty­myz júldemen oraldy. Osydan-aq qazaq boksynyń qaıta túlep jat­qanyn kórýge bolady. Ekinshi nómirli jigitterdiń ózi Azııa qurlyǵynda Qytaı quramasyn ǵana aldyna jiberip jalpy esepte ekinshi oryndy ıelendi. Bul qýanarlyq tabys. Erjan BAITILES. Qyzylorda. Sýrette: Dosjan Ospanov (sol jaqta) pen Aıdar Ámir­zaqov.