Áskerı tehnıka sherýge daıyn

Keshe Qorǵanys mınıstrliginiń uıymdastyrýymen Astananyń irgesindegi lokomotıv deposynyń janynda Táýelsizdiktiń 20 jyldyǵy jáne Konstıtýsııa kúnine arnalǵan áskerı sherý daıyndyǵynyń tanystyrylymy ótti. Astana tóńiregindegi bul aımaqta saltanatty áskerı marshtardyń, áskerı tehnıkanyń daýysy estilip, komandırlik pármenderdiń berilip jatqanyna bir aıǵa jýyq ýaqyt ótti. О́zderińiz biletindeı, sońǵy eki jyldaǵy Konstıtýsııa kúnin elordamyz erekshe daıyndyqpen atap ótýdi dástúrge aınaldyryp keledi. Bul jyly da solaı bolmaq. Sebebi, bıylǵy jyl – Táýelsizdiktiń 20 jyldyǵy. Konstıtýsııa kúni barsha qazaq­stan­dyqtar Otan qorǵaýshylarymyzdyń sap túzep, áskerı sherýmen halyq aldynda júrip ótkenin ǵana tamashalap qoımaı, el áskeriniń tehnıkalyq qýatyna da kýá bolmaq. Esterińizge sala keteıik, ótken jyly mehanıkalandyrylǵan lektiń pa­radtyq eseptobyn 150-den asa jaýyn­gerlik tehnıka quraǵan bolatyn. Al bıyl­ǵy jyly olardyń sany artyp, eli­mizdiń bas alańynan 250-den astam ás­kerı tehnıka júrip ótetin bolady. Elorda kósheleri bul aýyr tehnıkalardan eshbir zardap shekpeıdi. О́ıtkeni, bul joly da tankter, BMP-lar men MTLB-lar shynjyr tabandaryna rezeńke «tápish­ke­ler» kıgen eken. 30 tamyz kúni Astana jurt­shylyǵy Táýelsizdik saraıy­nyń al­dynan mehanıkalandyrylǵan lekten áýe shabýylyna qarsy qorǵanys ás­ker­leriniń «Strela-10», «S-300», «S-200», «S-125», sondaı-aq «S-75» syndy zamanaýı qarý­laryn da kóretin bolady. Odan ózge, ás­kerı paradqa «Naıza», «Akasııa», «Msta», «Tıýlpan», «Smerch», «Rapıra», «Shtýrm», «Grad», «Ýragan» sııaq­ty orýdııalar men keshender, D-30 gaýbı­sasy qatysady. Bul topty «Land Rover», «Hammer» syndy avtotehnıkalar tolyq­tyrmaq. Mehanıkalandyrylǵan lektiń bıyl­ǵy jylǵy taǵy bir jańalyǵy tankterge qoldaý kórsetetin jaýyngerlik mashınalar, aýyr oq atatyn júıeler jáne jetildirilgen BTR-82 áskerı tehnıkasy bolmaq. Bul rette Qorǵanys mınıstriniń qarý-jaraq jónindegi orynbasary, general maıor Aman­jol Ospanov: «Áskerı sherýge jal­py 139 aýyr tehnıka jumyldyrylyp otyr. Odan ózge 20-ǵa jýyq tehnıka rezervte saqtaýly. Desek te, osy kúnge deıingi daıyndyǵymyzda olardyń eshbiri syr bermeı, óz qyzmetterin oıdaǵydaı at­qarýda», – dep áskerı aýyr tehnıkalardyń daıyndyǵyna oń baǵasyn berdi. Eseptoptar, áskerı tehnıkanyń belgilengen ýaqyttary, ekıpajdar ár qımyl­daryn saýatty oryndady. Olardyń ara-qashyqtyǵyndaǵy árbir ólshemderi esep­teý­li ekendigi anyq baıqalyp turdy. Bul sherýde elimizdiń áskerı qyzmetshileri óz­deri­niń saptyq daıyndyǵyn tolyqtaı óz deń­geıin­de oryndaıtynyna, árbir qımy­ly­­nyń oryndy qozǵalatynyna senim mol. Se­bebi, jaýyngerlik daıyndyqtar qazirdiń ózinde óz nátıjesin berip otyr. Olardy kórgen basshylyq daıyndyq óte jaqsy degen toqtamǵa keldi. Juldyz BAIDILDA.