Munda kópten kútken ımandylyq úıi ashylyp, jurtshylyq saltanaty ótkizildi. Meshittiń qurylysy bir jyldyń ishinde aıaqtalyp, oǵan osyndaǵy qazaq otbasy túgel atsalysty. Jurtshylyq, ásirese, bastalǵan istiń aıaǵyna jetýine bar kúsh- jigerin jumsaǵan jergilikti ımam Qanapııa Abdrahmanovtyń tynymsyz eńbegi men uıymdastyrýshylyq qabiletine rızashylyǵyn bildirýde. Yntymaq-birligi jarasqan aýyl qýanyshynda Qatarkól aýyl okrýginiń ákimi Mereke Qusaıynov, Naýan haziret atyndaǵy oblystyq meshittiń naıb ımamy Nurlan Ibenuly, aıtysker aqyn Qýanysh Ospanov quttyqtaý tilegin arnap, jyrdan shashý shashty. Imandylyq úıinde alǵashqy juma namazy oqylyp, quran baǵyshtaldy. Keshkisin aýyzashar dámi berilip, Taýarıh namazy oqyldy.
Baqbergen AMALBEK. Aqmola oblysy.
SPORT AÝLASYN SALYP BERDI. «Nur Otan» HDP «Jas Otan» jastar qanaty men «Bolashaq» fılıaly «20 ıgi is» aksııasy sheńberinde balalardyń oıyn aýlalaryn qalpyna keltirý jóninde bastama kótergen bolatyn. Onyń alǵashqy kezegi oblys ortalyǵynyń shetkeri shaǵyn aýdany – Bylǵary zaýytynda boı kóterdi. №12 mekteptiń aýlasynda jeke kásipkerlerdiń qarjylyq qoldaýymen sport alańy salynyp, oqýshylar bos ýaqyttaryn osynda ótkizetin boldy. Jazda fýtbolmen, qysta hokkeımen alańsyz aınalysa alady. Jasotandyqtar mundaı sharalardy Jumysshy kenti, Benzostroı, DSR shaǵyn aýdandarynda da jalǵastyrýdy kózdep otyr.
О́mir ESQALI. Soltústik Qazaqstan oblysy.
RAMAZAN AIYNDAǴY SAÝAPTY ShARA. Qasıetti Ramazan aıyna tán adamdardyń bir-birine degen qaıyrymdylyǵy men meıirimdiligin, izgi nıeti men shynaıy peıilin bul kúnde jezqazǵandyqtar razylyqpen qabyl alyp júr. Olar qalada alǵashqylardyń biri bolyp osy shaqta saýapty isterge shapaǵat shýaǵyn shashqan «Sámadı» sýpermarketi dúkender júıesi boıynsha ósimdik maıynyń 10 paıyzǵa arzandatylǵan baǵamen satylýyna dán rıza. Qazir úlken suranymdaǵy bul ónimge kúnbe-kún qoljetimdi.
Aıqyn NESIPBAI. Jezqazǵan.
MURATBEKTIŃ QYMYZYNA SURANYS KО́P. Atyraýda qazaqtyń ulttyq sýsyny – qymyzdy daıyndaýǵa den qoıýshylar birtindep kórine bastady. Solardyń qataryndaǵy «Tólegen» sharýa qojalyǵyn basqaratyn Muratbek Násipqalıev te bıe baılap, qymyz ashytýdy qolǵa aldy. Qazir ol zaıyby Nurjamal ekeýi eki bıeni kúnine áldeneshe ret saýady. О́zderi ábden daıyndaǵan qymyzdyń ár lıtrin 500 teńgeden satady. – Qymyzǵa suranys tipten kóbeıip tur. О́zimizdiń Eltaı aýylynan, aýdan ortalyǵy – Inderbordan suratýshylar kúniburyn kezekke turatyn boldy. Qymyzǵa suranys kóbeıgesin, keleshekte qymyzhana ashýdy oılastyryp júrmin, – deıdi sharýager.
Joldasbek ShО́PEǴUL. Atyraý oblysy.
ZAISANDA SÚT ZAÝYTY AShYLADY. Osydan eki jyl buryn zaısandyq kásipker Aıdar Barysov qańyrap bos qalǵan eski ǵımaratty satyp alyp, ony kúrdeli jóndeýden ótkizgen edi. Zaısan qalasynda búginge deıin birde-bir sút zaýyty bolmaǵan, sonaý toqsanynshy jyldary Qarabulaq aýylynda paıdalanýǵa berilgen sút zaýyty jabylyp qalǵan. Isker azamat 22 mıllıon teńgege jóndeý jumystaryn júrgizip, osynshama qarjyǵa qajetti qural-jabdyqtar ornatty. Amanshylyq bolsa, taıaý kúnderi sút zaýyty jumysyn bastaıdy. Jańa kásiporyn bes túrli, sonyń ishinde, irimshik, qaımaq, aıran, sary maı, sút sııaqty taǵamdardy shyǵarmaq. Onyń táýligine alty tonnaǵa deıin sút ónimderin shyǵarýǵa múmkindigi bar, al sút aýyl adamdarynan satyp alynady dep josparlanýda. Eki aýysymda 24 adam eńbek etpek.
Ońdasyn ELÝBAI. Shyǵys Qazaqstan oblysy.
«JAS ISKERDIŃ» ALǴAShQY TÚLEKTERI. Aqtóbe qalalyq ishki saıasat bóliminiń uıymdastyrýymen jumys isteı bastaǵan Aqtóbe qalalyq jastar máslıhatynyń jas kásipkerlerge arnalǵan «Jas isker» mektebiniń alǵashqy túlekteri sertıfıkattarǵa ıe boldy. Bastapqyda kásipker bolýǵa 60 úmitker tilek bildirgenimen, olardyń jıyrmasy ǵana osy mekteptegi oqýlaryn aıaǵyna deıin jetkizdi. «Jas isker» mektebiniń tyńdaýshylaryna «Damý» kásipkerlikti damytý qory, qalalyq kásipkerlik bólimi jáne iri kásiporyndar men mekemelerdiń ókilderi dáris oqydy. Kásipkerlikti ıgerýge talaptanýshylar úsh apta oqyp, úsh apta tájirıbeden ótti. Jas kásipkerlerdiń ózderiniń bıznes jobalary bar, endi olar elimizde júzege asyrylyp jatqan baǵdarlamalarǵa qatysa alady.
Satybaldy SÁÝIRBAI. Aqtóbe oblysy.
JAŃA QONYS JOǴARY SAPA KEPILI. «Qazaqstannyń turǵyn úı qurylys jınaq banki» AQ-tyń Qyzylorda oblystyq fılıaly ózderiniń jańa da jaıly ǵımaratyna qonys tepti. Keńseniń ashylý saltanatyna oblys ákimi Bolatbek Qýandyqov qatysyp, quttyqtady. Al bank tóraıymy N.Naýryzbaeva el táýelsizdiginiń 20 jyldyǵyndaǵy jańa qonys bank qyzmetiniń sapasyn arttyryp, onyń qyzmetin paıdalanýshylardyń sanyn ulǵaıtýǵa oń áser beredi dep baıandady. Qazirdiń ózinde oblys boıynsha salymshylardyń sany 11 myń adamdy quraıdy. Olardyń turǵyn úı jınaǵy 16 mıllıard teńgege jetken.
Erjan BAITILES. Qyzylorda.
