Ár festıvaldiń óz jańalyǵy bolady

19-24 qyrkúıek araly­ǵyn­da Almaty qalasynda VII halyqaralyq «Eýrazııa» kınofestıvali ótedi. Festıval Mádenıet mınıstr­ligi, Sh.Aımanov atyndaǵy «Qazaqfılm» aksıonerlik qoǵamy jáne Kınematografıster odaǵy men «Eýrazııa» halyqaralyq kınofestıval dıreksııasynyń mu­ryndyq bolýymen uıymdas­tyrylyp otyr. Sońǵy jyldary Ortalyq Azııa elderiniń fılmderi saıys­qa túsip júrgen festıvaldiń kon­kýrstyq baǵdarlamasyna 2011 jyly ma­ńyz­dy ózgeris endi. Bı­ylǵy jyly «Eýrazııanyń» aıasy keńeıip, Eýropa, Azııa jáne TMD elderiniń jańa týyndylary baq synaıtyn aýqymdy halyqaralyq konkýrsqa aınaldy. Festıval barysynda úzdik fılm (Bas júl­de), úzdik rejıssýra, sondaı-aq úzdik akter men úzdik aktrısalar arnaıy júldelermen marapatta­la­dy. «Eýrazııa-2011» kıno­fe­stı­va­li­niń halyqaralyq qazylar alqa­syn ońtústikkoreıalyq rejısser Kım Kı Dýk basqarady. Onyń «Arırang» atty sońǵy kartınasy «Erekshe oqıǵa» baǵdarlamasy boı­ynsha kórsetiledi. Qazylar al­qasynyń quramyna japon rejısseri Ioıchı Saı, Reseı halyq ártisi, rejısser Vladımır Hotınenko jáne fransýz akteri, rejısser, sazger Jıl Marshan kiredi. Baǵdarlamanyń joǵarǵy deń­geıi men konkýrstyq kınofestıvaldan talap etiletin álemdik standarttar nátıjesinde «Eýrazııa» kınofestıvalinde FIPRESSI jáne NETPAK kınosyn­shy­larynyń qazylar alqasy osymen úshinshi jyl qatarynan halyq­ara­lyq qazylar alqasymen teń ju­mys júrgizip jatqanyn aıta ketken jón. Konkýrstyq baǵdarla­ma­daǵy ózgeristiń mańyzdylyǵy qa­zaqstandyq kartınalardyń sheteldik jetekshi kınotaspalarǵa bá­sekeles retinde qatysýynda bo­lyp otyr. Bul qazirgi tańda Qa­zaqstannyń kınoındýstrııasynda bolyp jatqan oń ózgeristerge de baılanysty. 2010 jyly otandyq kıno úsh­in kórermenderdiń qyzyǵýshy­ly­ǵyn arttyratyn fılmder tú­sirýde aıryqsha múmkindikter paıda boldy. Bul kınorejıs­ser­lerdiń jańa býynyna úlken múm­kindikter bergen jyl der edik. Atap aıtsaq, «Eýrazııanyń» byl­tyrǵy konkýrstyq baǵdarlama­sy­na 15 shaqty qazaqstandyq fılm­niń ishinen A.Sataı men F.Sháripovtiń fılmderi iriktelip alynǵan bolatyn. Bıyl baıqaýǵa jan-jaqtan úmitterin úkilegen 20-ǵa jýyq fılm usynylyp otyr. Aıta ketý kerek, bul tý­yndylar bir-birine múldem uqsa­maı­tyn, ózindik órnegi bar, ár­qaı­sysy óz aldyna dara fılmder. Soǵan qaraǵanda 2011 jyl otan­dyq kınoóndiris úshin qarqyndy ózgerister jyly bolmaq. Bıylǵy jyly túsirilip bol­ǵan fılmderdiń ishinde R.Áb­dirashevtiń estetıkalyq sulý­lyǵy­men baýrap alatyn «Balalyq shaǵymnyń aspany» fılmin, A.Sataıdyń «Lıkvıdator», S.Tá­ýe­kelovtiń «Jeruıyq», E.Nurmu­ham­betovtyń «Ańshy bala» jáne D.Salamattyń «Kishkentaı» fıl­min erekshe atap ótýge bolady. G.Nasyrovtyń «Gákký», J.Posha­nov­tyń «Jel qyzy» jáne T.Baı­túkenov pen T.Qasymjanovtyń «Sýperbaha» fılmderi kıne­ma­to­grafııalyq tájirıbelik ádiste­rimen erekshelenedi. Avtordyń keıipker men ýaqyt jónindegi oıyn, sezimin dálme-dál jetkizetin óner osy kınematografııa ekenin D.О́mirbaevtyń «Stýdent», N.Tórebaevtyń «Shýaqty kúnder» fılminen ańǵarýǵa bolady. Dástúr boıynsha bıylǵy jy­ly da «Eýrazııa» kınofestıvaline álemdik kıno juldyzdary qaty­sady. Bıyl festıvaldiń negizgi qonaqtarynyń arasynda «Oskar» syılyǵynyń júldegeri, fransýz aktrısasy Jıýlet Bınosh, ame­rı­kalyq akter, prodıýser ári ssenarıst Oýen Ýılson bar. Qanat ESKENDIR. Almaty.