Dári-dármek ózimizde óndiriledi

Indýstrııa ıgiligi El ekonomıkasynyń qarqyndy damýy táýelsiz memleketimizdiń qaı salany da tııanaqty ıgerýine yqpal etip otyrǵany shyndyq. Buryndary dári-dármektiń basym bóligin alys-jaqyn shetelderden alyp keldik. Shymkenttegi jalǵyz farmasevtıka zaýytynan basqa otandyq dári-dármek óndiretin óndiris orny joqqa tán bolatyn. Elbasy halyqtyń densaýlyǵynyń myqty bolýyn, jasynyń uzaq bolýyn oılastyrýy nátıjejesinde óziniń 2010 jylǵy Qazaqstan halqyna Joldaýynda «Dári-dármekpen qamtamasyz etýdiń tıimdi júıesi úshin barlyq bazalyq jaǵdaılardy jasadyq. Dárilerdiń 50 prosenti bizdiń elimizde shyǵarylatyn bolady» – dep batyl aıtýy tegin emes. Memleket basshysy asqan jaýapkershilikti qajet etetin kirpııaz salany damytýǵa da el ekonomıkasynyń qýaty men ǵylymı izdenistiń múmkindigi jetetinine senim bildirdi. Osy Joldaýda alǵa qoıylǵan mindetterdi júzege asyrýdyń tıimdi bastamalary, tııanaqty jobalary ómirge joldama ala bastady. Farmasevtıka salasyn damytýdyń alǵashqy qarlyǵashy retinde Aqtóbede ashylǵan «Vesel Aqtóbe LTD» JShS-niń dári shyǵaratyn zaýytyn aıtýǵa ábden bolady. Bul osy seriktestiktiń «Aqtóbe» áleýmettik- kásipkerlik korporasııasymen birigip júzege asyrǵan jobasy. –Biz áýeli ótkizý rynogyna marketıngtik zertteý júrgizdik. Sonyń nátıjesinde biz shyǵaratyn dári-dármekterdiń suranysqa ıe ekenin baǵamdadyq. Bul batys óńirinde dári óndiretin birden-bir kásiporyn. Munda dári shyǵarý shıkizatty óńdeýden bastap kapsýla men qoraptarǵa túrip, tutynýshyǵa jetkenge deıingi jumystar júrgiziledi. О́ndiristik tehnologııany negizinen ózimiz jasadyq. Árıne, mundaı tehnologııa TMD elderinde bar, alaıda, biz ózimizshe jetildirip ornattyq,–deıdi seriktestiktiń dırektory Gúlnara Imanalına bizben áńgimesinde. Kásiporyn basshysynyń aıtýynsha, joba quny 300 mıllıon teńge turady. Zaýytta qazirdiń ózinde jeti túrli dári shyǵarylýda. Aýmaǵy 600 sharshy metrdi alatyn zaýyt dári óndirisine qajetti shıkizatty túgeldeı Batys Eýropadan, Qytaıdan jáne Úndistannan alady. Kásiporynnyń óndiristik sehtary men qorapqa salý bólmesinen basqa shaǵyn zerthanasy bar. Munda shıkizat pen daıyn ónimderge zertteý júrgiziledi. Daıyn ónimder dárilik zattardy saraptaýdyń ulttyq ortalyǵyna jiberiledi. Dáriler barlyq talaptarǵa saı keletin bolsa ǵana ótkizýge ruqsat etiledi. Qazir kásiporynda 15 adam jumys isteıdi. Bolashaqta olardyń sany 20 –ǵa jetedi dep kútilýde. Biren-saran Ýkraınadan kelgen mamandar bolmasa, negizinen jergilikti kadrlar eńbek etedi. Qazir zaýytta eki túrli tabletka jáne bes túrli kapsýldegi dári shyǵarylady. Olar mı tamyrlarynyń qyzmetin jaqsartýǵa, vırýsqa , tumaýǵa , dıllereıaǵa, asqazan aýrýlaryna qarsy jáne joǵary jáne tómengi tynys alý organdary aýrýlaryn emdeýge qoldanylady. –Bul zańdy tirkeýden ótip, shyǵarýǵa ruqsat etilgen dári túrleri. Jalpy, biz generıkter shyǵaramyz. Bul dárilerdiń brendtermen sapasy birdeı bolǵanymen, olarǵa qaraǵanda anaǵurlym arzan. Sondyqtan da bizdiń dárilerimizge suranys joǵary bolady dep oılaımyz. Biz tek osy dárilerdi ǵana shyǵaryp qoımaımyz, bolashaqta dári assortımentin keńeıte túspekpiz. Jalpy, ónimderimizdi «Farmasııa» SK arqyly elimizdiń barlyq aımaqtaryna ótkizýdi oılastyrýdamyz. Ústimizdegi jylǵy tamyz aıynyń aıaǵyna taman dárilerimizdiń alǵashqy tobyn ótkizemiz. Oǵan 83 myń qorap ártúrli dári shyǵaramyz,–deıdi seriktestik dırektory. Dári zaýyty dırektorynyń óndiris jónindegi orynbasary Konstantın Kovalev bizdi óńdiristik -tehnologııalyq jumys prosesimen tanystyrdy. Shaǵyn bólmelerdegi sý jańa qondyrǵylardan dárilerdiń qalaı shyǵarylatynyn áńgimeledi. Bólmeler tap-taza, kóldeneń jatqan eshteńe kórinbeıdi, bári oryn-ornynda. Dári óndirýge qajetti quraldar da aınadaı jaltyrap tur. Bul jerde sanıtarlyq tazalyqtyń qatań saqtalatyny ańǵarylady. Shıkizat saqtaý qoımasy, zerthana, óndiristik seh arnaıy quraldarmen jaraqtandyrylǵan. Dárilerdi qorapqa túrý bólmesinde eki adam qoraptardy daıyn ónimderdi túrýge daıyndaýda. О́z isterine berilgenderi sonshama, jumystan bas kóterer emes. –Qoraptardy Almatydan alamyz. Bul jaǵynan kidiris joq. Shıkizat qoryn da jasap aldyq. Jalpy zaýyttyń óndiristik qondyrǵylaryn iske qosý-retteý jumystary júrgizildi. Taıaýda kásiporyndy resmı ashyp, buǵan deıin shyǵarylǵan dárilerimizdi sata bastaımyz. Sóıtip, zaýyttyń tolyq qýatynda jumys isteýine kóshemiz,–deıdi Konstantın Kovalev. Biz qajet kezinde qoldanyp, dárihanalardyń sórelerinen kórip júrgen dárilerdiń endi óz qalamyzda shyǵaryp jatqanyna rıza boldyq. Bul dárilerdiń túrleri kóbeıe túsetinin estip, jańa zaýyttyń adam densaýlyǵyn nyǵaıtýǵa qyzmet etetinin, sondaı-aq, óńir ekonomıkasynyń damýyna úles qosatynyn jaqsylyqqa jorydyq. Satybaldy SÁÝIRBAI. Aqtóbe oblysy.