Qaýmalaǵan qaýym dán rıza

Gazetimizdiń budan burynǵy nómirlerinde habarlaǵanymyzdaı el Táýelsizdiginiń 20 jyldyq toıyna oraı jolǵa shyqqan «Meniń Qazaqstanym» arnaıy poıyzy Qaraǵandy oblysynyń Balqash qalasy men Shyǵys Qazaqstan oblysynyń Aıagóz aýdanynda boldy. Munda da qonaqtardy temir jol vokzalynan jergilikti halyq qurmetpen qarsy aldy. Aldymen Balqash jerine toq­taǵan poıyz jolaýshylary belgilengen baǵdarlama boıynsha tur­ǵyn­darmen jolyǵyp, olardyń talap-tilekterin tyńdap, tolǵan­dyr­ǵan saýaldaryna jaýaptar ber­di. Sondaı-aq, qonaqtar óndi­ris­ti ólke Balqash qalasynyń bir­qatar kórikti jerlerin aralap, birshama maǵlumattar aldy. Osy­dan seksen jyldaı buryn Balqash kóliniń soltústiginde 20 shaqy­rym­daı jerdegi Qońyrat mys kenti negizinde iri mys qorytý zaýytynyń qurylysy bastalǵan eken. Sonyń negizinde 1937 jyly Balqash shahary boı kóteripti. Elimizdiń tústi metallýrgııa sala­sy­nyń eń mańyzdy ortalyq­tary­nyń biri sanalatyn qala halqy mańaıyndaǵy kentterdi qosqanda jetpis myńnan astam kórinedi. Tek óndiris salasynda ǵana emes, aıdyndy Balqash kólin týrızm ortalyǵyna aınaldyrý jó­nin­degi irgeli jumystarǵa da kýá boldyq. Qalada týrısterdi orna­las­tyrý úshin 8 qonaq úı saly­nyp, qyzmet kórsete bastapty. Maý­sym­dyq kezderde qonaqtar qaıyq­pen serýendeý, balyq aýlaý qural­daryn jalǵa alý, ózge de servıstik qyzmetterdi paıdalaný­lary­na mol múmkindikter jasa­lyp­ty. Sony­men birge, kól jaǵa­jaıyndaǵy kóptegen demalys úıleri de týrısterge qyzmet ete bastapty. 1967 jyly Londonda ótken halyqaralyq kórmede Balqash mysy eń taza degen dúnıejúzilik etalonǵa ıe bolyp, qazaq aby­roıyn asyrǵanyn osy tusta eske sala ketsek deımiz. «Meniń Qazaqstanym» arnaıy poıyzy Aıagóz jerine taban tiregende, qaýmalaǵan elmen birge, symdaı tartylǵan sardarlar men sarbazdar úrmeli orkestrmen saltanatty jaǵdaıda qarsy aldy. Jalpy, aýdanda seksen myń­daı turǵyn bolsa, onyń qyryq myńǵa jýyǵy aýdan ortalyǵynda turady. Halyqqa qyzmet kórse­tý­de jaqsy jumystar júrgizilýde eken. Aýdandyq qyzmet kórsetý ortalyqtarynyń jumysy jurt kóńilinen shyǵyp otyrǵanyna tánti boldyq. Astanadan shyqqan bul poıyz­daǵy delegasııa músheleri halyq­pen ótkizgen qoǵamdyq qabyldaý­lar­da turǵyndardyń belsendilik tanytqanyn aıtady. Máselen, «Nur Otan» HDP ortalyq appa­ra­­ty­nyń ókili Sábıt Amanjolov, Parlament Májilisiniń depýtaty Tólegen Ybyraevtardyń qabyl­daýynda bolǵan 30 adamnyń talap-tilekteri negizinen densaýlyq saqtaý salasyna baılanysty bo­lyp­ty. Sonymen birge, aýyz sý máselesin de nazardan tys qal­dyr­mapty. Medısınadan keńes alýǵa kelgen­der­diń deni suraq­tary­na naqty jaýaptar alyp qanaǵattan­ǵan­daryn aıtty, deıdi Densaýlyq saqtaý mınıstrliginiń mamany Ernar Myrzaqulov bizben oı bólisken kezde. Ol sonymen birge turǵyn­dardyń kópshiligi aýrý­hanaǵa jatý úshin joldama alýǵa, konsýltatıvtik dıagnostıkalyq kómekke muq­taj kórinedi. Al Ádi­let mınıstr­liginiń ókili Qanat Myq­tybaev otyzǵa jýyq azamat­tyń saýal­dary­na jaýap berse, Eń­bek jáne halyq­ty álýmettik qorǵaý mınıstrliginiń sarapshysy Ámına Aıýpova 42 adamnyń ataýly áleý­met­tik kómek jáne balalar járdem­aqysy tóńire­gindegi suraqtar jaıynda kelgenin tilge tıek etti. Ańyzdar men abyzdar eli Aıagóz jerine kelgen «Meniń Qa­zaq­stanym» poıyzyndaǵy óner sańlaqtary jergilikti jurtshy­lyq­ty keshkisin án-jyrǵa bóledi. Ábdirahman QYDYRBEK.