Jaqsylyq ÚShKEMPIROV, Grek-rım kúresinen Olımpıada jáne álem chempıony:
– Týrızm jáne sport mınıstrligi uıymdastyryp otyrǵan bul shara óte quptarlyq bastama. Búginde egemen el bolǵanymyzǵa 20 jyl toldy. Bul bizdiń el bolyp, bir belesti baǵyndyryp, jańasha qyrymyzdan tanylýymyzdyń joly ispettes. Sonyń dáleli retinde uıymdastyrylyp otyrǵan Sport forýmynyń maqsaty – sport salasyna jańadan kelip jatqan teorııalardy, ınnovasııalyq tehnologııalardy tájirıbege engizý, olardy ejelgi sport túrlerimen sabaqtastyra otyryp, odan ári damytý. Sebebi, HHI ǵasyr jańa tehnologııalar ǵasyry ekeni barshaǵa málim. Ony óskeleń urpaq ulttyq dástúrimizben birge baılanystyryp otyrýdy ádetke aınaldyrýy shart. Damýshy el retinde sportqa da erekshe serpin berip, ony túrli jaǵdaıda qubyltyp, sol arqyly táýelsiz elimizdiń jetistigin kórsete bilý – barshamyzǵa mindet.
Sport – ejelden kele jatqan, tamyryn tereńge jaıǵan sala. Búginde qanatyn keńge jaıyp, óziniń san qyrly tarmaqtaryn álemge pash etýde. Aldaǵy ýaqytta da, shyraǵy sónbeı, odan ári damı túsetini esh shúbásiz. 2008 jyly ótken Beıjiń Olımpıadasynda bizdiń sportshylarymyzdyń basymdyq tanytqany, bıylǵy jylǵy VII Qysqy Azııa oıyndaryndaǵy Qazaqstan sportshylarynyń eń bıik satydan kórinýi arqyly elimiz álemge tanylyp jatyr. Bul – qýanarlyq jáıt. Elbasynyń bastamasymen kóptegen sport nysandary ashylýda. Demek, onyń bolashaǵynan úlken úmit kútýge bolady. Bul rette bizdiń aldymyzda úlken mindet tur. Iаǵnı, sol arhıtektýra jaǵynan damyǵan elderdegi iri nysandarmen ıyq teńestire alatyn sportqa arnalǵan nysandarymyz, halyqaralyq arenadan oıyp turyp oryn alatyn sport saraılaryna laıyqty bapkerler men jattyqtyrýshylar, sapaly sportshylar daıyndaýymyz qajet. Ustazdan shákirt ozady demekshi, bizdiń sońymyzdan ózimiz sııaqty Olımpıada chempıondarynyń kóptep shyǵatynyna senimim mol.
Rýslan Sámıev, Aqtóbe oblysy, Temir aýdany №3 orta mektebiniń dene tárbıesi muǵalimi, sport nusqaýshysy:
– Bıyl tuńǵysh ret ótkizilip jatqan Sport forýmynyń mańyzy orasan zor. Forýmǵa jan-jaqtan qatysýshylar kelip jatyr. Sporttyń damýy týraly úlken máseleler qozǵaldy. «El Qaıraty» respýblıkalyq, aýyldyq dene tárbıesi-sport qoǵamy» qoǵamdyq birlestigi qurylyp jatyr. Osy arqyly úlken jetistikterge jetemiz dep úmittenemiz. Bılik tarapynan qoldaý bolyp jatsa, aýyl sporty kóterilýi tıis. Elimizdiń sport deńgeıi, qudaıǵa shúkir, joǵary qarqynmen damyp keledi. Aýyldaǵy jastardy sportqa tartý arqyly kórsetkishterimizdi budan da jaqsartamyz degen oıymyz bar. Aýyl sportyn kóterý barysynda sport quraldary alynyp, sport alańdary men jattyǵý keshenderi talapqa saı salynatyn bolsa, aýyldaǵy balalar úshin úlken talpynys bolar edi. Elimiz boıynsha úlken sportty qarjylandyrý máseleleri durys jolǵa qoıylǵan, al aýyldyń sportynda qarajat jetispeýshiligi baıqalady. Biraq, osy joly ótkizilgen forýmnan keıin bul olqylyqtardyń da orny tolar.
Maıra Isaeva, Qaraǵandy oblysy týrızm, dene shynyqtyrý jáne sport basqarmasynyń bólim bastyǵy:
– Qaraǵandy oblysy boıynsha búgingi tańda 40-qa jýyq balalar sport mektebi, oblystyq ınternattar, joǵary deńgeıli sport keshenderi bar. Osylardyń bárinde 24 644 oqýshy sporttyq tárbıe alady. Sonymen qatar, 1500-den astam bala «Qazaqmys»UK» AQ-tyń demeýshiligimen ashylǵan jeke mektepterde bilim alýda. Bıýdjettiń jyl saıynǵy kóbeıýine baılanysty sport mektepterindegi saıystar sany da artyp keledi. Sońǵy 5 jyl ishinde sporttyq is-sharalardyń kórsetkishteri edáýir deńgeıge kóterildi. Álemdik jeńimpazdar, Azııa jeńimpazdary bizden shyǵyp jatyr. Bul – elimiz úshin úlken maqtanysh. Sport mektebine jyl saıyn keletin balalardyń sandarynan-aq olardyń sportqa degen qyzyǵýshylyqtaryn anyq baıqaımyz. Barlyq mektepterde sporttyń 63 túrinen, al onyń ishinde 37 olımpıadalyq oıyn túrlerinen balalar sabaq alady. Oblystyq sport mektepterindegi balalardyń barlyǵy tegin oqıdy. Eń bastysy, olardyń sportqa degen yntalary bolsa jetkilikti, qalǵan jaǵdaıdyń bárin ózimiz jáne demeýshiler tarapynan qanaǵattandyrýǵa tyrysamyz. Kóptegen oblystar ózge oblystardyń talantty jastaryn ózderine qarajat kózderimen shaqyryp jatady. Al bizde olaı emes. Barlyq talanttar túgeldeı ózimizdiń oblysymyzdan shyqqandar.
