Bul qazaqta jigitter bar marqasqa

Aqjaıyq óńirinde sporttyń damýy­na qoldaý kórsetip, janashyrlyq tany­typ júrgen kásipkerlerdiń qatarynda kimder bar degende Jarqyn Tájiǵa­lıev­tiń esimi aýyzǵa birinshi oralady. Negizgi mamandyǵy qurylys ınjeneri bola tura, onyń týabitti jaratylysy men bitim-bolmysy sportpen bite qaınasyp keledi. Jas kezinen ózi de sportpen aınalysqan Jarqyn Serik­uly­nyń qazaq kúresinen túıe balýan – respýblıka chempıony atanǵan kezi de bolǵan. Biz oǵan jolyqqan kúni boıy men soıy birdeı kelisken, nar tulǵaly aza­mat­tyń júzi jarqyn da jaıdary kórindi. Onyń bet álpetinde áldebir qýanysh pen jaq­sy­lyqtyń nyshany aıqyn ańǵary­lyp turdy. Munyń syry da kóp keshikpeı belgili boldy. J.Tájiǵalıevtiń qol­daý kór­setýi­men óńirden jasaqtalǵan jas doıby­shylar komandasy budan birneshe kún buryn Bal­tyq boıyndaǵy Es­to­nııaǵa, álem chem­pıo­natyna qatysý úshin attanyp ketken eken. Sol jaqtan Jaıyqqa qýanyshty habar jetipti. Komanda músheleriniń biri Altynaı Juma­gel­dıeva álem chempıony atanypty. Mine, óz aty báıgeden ozyp kelgennen beter qýanýynyń syry osynda eken. Budan basqa Jarqyn Serikuly Ja­ıyq óńirinde birneshe álem chempıo­ny­nyń shyǵýyna sebepker, dáneker bola bilipti. Olardyń deni – aýyl jastary. So­lar­dyń arasynda grek-rım kúresi­nen álem chem­pıony Artýr Úmbet­qalıev te bar. J.Tájiǵalıev óziniń negizgi maman­dyǵyna saı qurylys fırma­laryn­d­a jetekshilik qyzmet jasaı júrip, sodan túsken paıdanyń belgili bir bóligin aýyldaǵy sport deńgeıin kóte­rýge jumsap keledi. Onyń kásipkerlik qyzmetiniń ekinshi bir tarmaǵy halyqqa qyzmet kórsetý salasyna – qoǵamdyq tamaqtandyrý júıesin jetildirýge ba­ǵyt­talǵan. Budan túsken tabystyń ájep­táýir bóligi taǵy da sporttyń kókjıegin kóterýge ketedi. «Oblystyń shalǵaı aýdandarynda Jarqyn Serik­ulynyń qoldaýymen shahmat, at báıge­si, kúres, jaıaý jarys sekildi sport túrlerinen uıymdastyrylǵan jarys­tar aýyl jastarynyń arasynda sala­matty ómir saltyn qalyptasty­rý­ǵa eleýli septigin tıgizdi», deıdi Batys Qazaqstan oblys­tyq dene shynyqtyrý jáne sport basqar­masynyń bastyǵy Mú­silim Ońdaǵanov. Esimi Aqjaıyq óńirine keńinen tanymal kásipker Jarqyn Serikuly­nyń sportqa degen janashyrlyǵynyń taǵy bir erekshe kórinisin aıtpaı ketý ábestik bolar edi. Ol taıaý jáne alys shetelderge ártúrli sport saıys­tary­na baratyn jastar men sportshylardy materıaldyq turǵydan qoldap qana qoımaı, janashyr ári jankúıer retinde olarmen birge ózi de erip júretindigi. Ári chempıonattar qansha kúnge sozyl­sa, sonsha kún bola­tyndyǵy. Aıtalyq, byltyr Qostanaı qalasynda Azııa chem­pıonaty ótken kezde ol koman­da­daǵy on eki balamen birge on kún sol jaqta júripti. Áıteýir, bul eńbegi esh ketpegen. Oblystan barǵan tórt sportshy Azııa chempıony atanyp qaıtypty. Temir QUSAIYN, Oral.